2008 ވަނަ އަހަރު ދިވެހިން ބަލައިގަތް އާ ގާނޫނު އަސާސީއަށްފަހު، މަލްޓި ޕާޓީ ޑިމޮކްރަސީއެއް ތައާރަފް ވެގެން ދިއުމާއެކު، ލިބިގެންދިޔަ އެންމެ ބޮޑު އެއް މިނިވަން ކަމެއްގެ ގޮތުގައި ފާހަގަ ވެގެން ދިޔައީ ޚިޔާލުފާާޅު ކުރުމުގެ މިނިވަންކަމެވެ.
މިނިވަންކަން "ތަންމިނަށް" ހުޅުވިގެން ދިއުމާއެކު ދިވެހި މުޖުތަމަޢަށް އައި މި ބޮޑު ބަދަލާއެކު، ލިބިގެންދިޔަ މިނިވަންކަމުގެ އިތުރަށް، އޭގެ ނަތީޖާއެއްގެ ގޮތުން ނުރަގަޅު އެތައް ބަދަލެއްވެސް މިއަދު މިވަނީ ތަޖުރިބާ ކުރަން ޖެހިފައެވެ.
މިގޮތުން ސިޔާސީ ޖަޒްބާތުގައި މައްލަވަ ކުރުމާއި، ފުރައްސާރަ ކުރުމާއި، އަދި ބައެއް ހާލަތްތަކުގައި މާރާމާރީ ހިންގުންފަދަ ނޭދެވޭ އެތައް އަމަލެއް ދިވެހި މުޖުތަމަޢުން ފެނި، އައި ސިޔާސީ ބަދަލާއެކު މުޅި މުޖުތަމަޢުގެ އިޖުތިމާއީ ފޭރާން ވީދި ހަލާކުވެގެން ގޮސްފައިވާކަމީ ފާޅުކޮށް ފެންނާން އޮތް ހަގީގަތެކެވެ.
ހަމައެއާއެކު، އިސްވެ ދެންނެވުނު، ނޭދެވޭ އެތައް އަމަލެއް މުޖުތަމައުގެ ތެރެއިން ފެންނަމުންދާއިރު، އެކަންކަން ބަލައިގެންފައިވާ އާންމު އެތައްބަޔަކު އެކަންކަން ނަކަލު ކުރަމުންދަނީ، ބައެއް ސިޔާސީ ލީޑަރުންގެ ކިބައިންކަންވެސް މި ފުރުސަތުގައި ފާހަގަ ކޮށްލާން ޖެހެއެވެ. މަގުމަތީގައާއި ސިޔާސީ ޕާޓީތަކުގެ ޖަލްސާތަކުގައި އަނެކުންނަށް މައްލަވަކޮށް، ވަގަށް ގޮވާ، ސިފަޔާއި ސިއްހަތާއި އަދި އަބިންދަރިންނާ އަޅުވާ އެކްޓިވިސްޓުން ދައްކާ ވާހަކަތަކަށް ބައެއް ސިޔާސީ ލީޑަރުންވެސް އަތް ޖައްސަވަނީއެވެ.
އަދި ނުވިތާކަށް، ކުރީ ސަފަށް ނިކުމެވަޑައިގެން ސިޔާސީ ބައެއް ލީޑަރުންވެސް، ދުލަށް އައިހާ އެއްޗެއް އަނުކުންނަށް ގޮވާ، އެބޭފުޅުން އެންމެ ދަށު ދަރަޖަށްއަށް ވެއްޓި ވަޑައިގަންނަވާތަން ފެންނަމުން މިދަނީ، ރައްޔިތުންނަށް ހެޔޮ މަގު ދައްކަވަންޖެހޭ ސިޔާސީ ލީޑަރުންގެ ކިބައިންކަމީވެސް، ދިވެހި މުޖުތަމަޢުން މިއަދު ފެންނާން އޮތް ސާފު ހަގީގަތެވެ.
ނަޝީދުގެ މައްލަވަ ކުރުމާއި ފުރައްސާރަ ރައީސަށް!
ވެރިކަންކުރާ އެމްޑީޕީގެ އެތެރޭގައި އުފެދެންފެށި ސިޔާސީ ކޯޅުންތައް ހައްދުން ނެއްޓި، އެޕާޓީ ބައިބައިވެ، ޚިޔާލު ތަފާތުވި ފަރާތްތަކުން އެންމެ ފަހުން މިހާރުވަނީ އެމްޑީޕީން ވަކިވެ އާ ސިޔާސީ ޕާޓީއެއް އުފައްދާފައެވެ.
މިގޮތުން އެމްޑީޕީގެ ކުރީގެ ރައީސް މުހައްމަދު ނަޝީދު އިސްވެ ހުންނަވާ އުފެއްދެވި "ދަ ޑިމޮކްރެޓްސް" ޕާޓީން މިހާރު ބާއްވަމުންދާ ޖަގަހަ ޖަލްސާތަކުގައި އެންމެ އާންމު ގޮތެއްގައި ފާޑުކިޔުން އަމާޒުކުރާ އެއްފަރާތަކަށް ވެގެންދަނީ ސީދާ ރައީސް ސާލިހުއެވެ.
އަދި މިހާރު ކުރިޔަށްދާ އެޕާޓީގެ ހަރުގެ ޖަލްސާތަކުގައި، ކުރީގެ ރައީސް މުހައްމަދު ނަޝީދު ބައިވެރިވެވަޑައިގެން ރައީސް ސާލިހަށް އެކި މޭރުމުން ފާޑުކިޔުން އަމާޒު ކުރަމުންދާއިރު، ރޭ އެޕާޓީން ބޭއްވި ހަރުގެ ޖަލްސާ ފާހަގަވެފެން ދިޔައީ މުޅި ތަފާތު، ރައީސް ސާލިހަށް ނަޝީދު އަމާޒު ކުރަމުންދިޔަ ފާޑު ކިޔުންތައް މުޅިން އާ ގިންތިއަކަށް، އާ ގިޔަރަކަށް ޖައްސަވާލެއްވި ޖަލްސާއެއްގެ ގޮތުގައެވެ.
މިގޮތުން އެ ޖަލްސާގައި ނަޝީދުވަނީ ރައީސް ސާލިހުގެ ސިފައަށާއި، އުމުރުފުޅާއި އަދި ސިއްޙީ ހާލުކޮޅަށްވެސް ނިސްބަތްކޮށް މަލާާތާއި ފުރައްސާކޮށް ވާހަކަ ދައްކަވާފައެވެ. ނަޝީދު ވިދާޅުވެފައިވަނީ، ރައީސް ސާލިހަކީ މިހާރު މުސްކުޅިފުޅު ވެފައިވާ ބޭފުޅެއް ކަމަށާއި، އެމްޑީޕީގެ ކެނޑިޑޭޓެއްގެ ގޮތުގައި ހުންނެވީ ކޮންމެ ދުވަހަކު ހެނދުނު ބޭސްކާން ޖެހިފައިވާ ރައީސެއް ކަމުގައެވެ.
އަޅުގަނޑު އެމްޑީޕީގެ މެމްބަރުންނަށް ތަކުރާރުކޮށް ދަންނަވަން ތިބޭފުޅުން ރައީސް އަދި ތިބޭފުޅުންގެ ކެންޑިޑޭޓް ކޮންމެ ދުވަހަކު ހެނދުނު މުށެއް ފުރައި ބޭސް ފަރިއްކުޅުއްވަން ޖެހިވަޑައިގަންނަވާ. ތިބޭފުޅުންގެ ކެންޑިޑޭޓުގެ ހިތުގެ އާލާސްކަންފުޅު. ތިބޭފުޅުންގެ ކެންޑިޑޭޓްގެ ސިއްހީ ހާލުކޮޅު އެއީ ވިސްނަވަން ޖެހޭނެ ކަންކަން.
ރައީސް ސާލިހުގެ ސިއްޙީ ހާލުކޮޅަށް މަލާމާތާއި ފުރައްސާރަ ކުރަމުން، އަދި ކުރީ ބަރީގައި އަތް ޖައްސަވަން އިންނެވި، ނަޝީދުގެ ޑިމޮކްރެޓްސް ޕާޓީގެ ކެނޑިޑޭޓް އިލްޔސް ލަބީބަކީ ޒުވާން އަދި ސިއްހަތު ރަގަޅު ކެނޑިޑޭޓެއްކަމަށް މޭރުން ކުރައްވަމުން ނަޝީދު ވިދާޅުވެފައިވެއެވެ.
ރޭގެ ޖަލްސާގައި އިތުތަށް ވާހަކަ ދައްކަވަމުން ނަޝީދުވަނީ ބޭއަދަބީ އިބާރާތްތަކުންވެސް ރައީސް ސާލިހުގެ ޒާތަށް ނިސްބަތްކޮށް ވާހަކަ ދައްކަވާ ފުރައްސާރަ ކޮށްފައެވެ.
މިގޮތުން މަލާމާތުގެ ރާގަށް ވާހަކަ ބައްޓަން ކުރައްވަމުން ނަޝީދު ވިދާޅުވެފައިވަނީ އެމަނިކުފާނަކީ ސްޓަންޓް ލައްވާފައި ހުރި ބޭފުޅެއް ނޫން ކަމަށާއި، މުށެއްފުރާ ބޭސްވެސް ކާން ނުޖެހޭ ކަމުގައެވެ. އަދި "ޑިލޭ ސްޕްރޭ" ޖަހަންޖެހޭ ކަމަށް ވިދާޅުވެ ނަޝީދު ވަނީ ބޭއަދަބީ އެތައް އިބާރާތަކުން ރައީސް ސާލިހުގެ ޒާތުފުޅަށް އަމާޒުކޮށް މައްލަވަކޮށް ރޭ ވާހަކަ ދައްކަވާފައެވެ.
އަޅުގަޑަށްވެސް ތިބޭފުޅާއަށްވެސް ހަމަ އޮފީހަށް ގޮސްފަ ކޮންމެ ދުވަހަކު ސެކެޓްރީ ލައްވައާއި ދެންތިބި ބައެއް ލައްވާ ވާކަމެއް ވޭވެ ބެހެއްޓޭތޯ ބެލިދާނެ. އެވެސް ދިއްދޫ މީހުން ބުނީ ޑިލޭ ސްޕްރޭ ޖަހާފައޭ ހުރީ. ފާސްޓު ސްޕްރޭއަކީ ޒުވާންކަން.
ރައީސް ސާލިހަށް ފުރައްސާރަކޮށް ވަހަކަ ދައްކަވަމުން ނަޝީދު ވިދާޅުވިއެވެ.
ރައީސް ސާލިހަށް މައްލަވަކޮށް، ނަޝީދު ވާހަކަ ދައްކަވަމުން ގެންދެވިއިރު، ހަރުގެއަށް ޖަމާވެތިބި "ދަ ޑިމޮކްރެޓްސް"ގެ އެކްޓިވިސްޓުން ގެންގޮސްފައިވަނީ އަންޖަހަމުންނެވެ.
ރައީސް ސާލިހުގެ އުމުރުފުޅަށާއި އަދި ސިއްހީ ހާލުކޮޅަށް ފުރައްސާރަކޮށް ވާހަކަ ދައްކަވަމުން، އެމަނިކްފާނު ކޮންމެ ދުވަހަކު ހެނދުނު "މުށެެއް ވަރުގެ" ބޭސް ކާންޖެހޭ ކަމަށް ނަޝީދު ވިދާޅުވި ނަމަވެސް، ރައީސް ސާލިހުގެ ސިއްޙީ ހާލުކޮޅު ހުރިގޮތުން، އެ އުސޫލުން ބޭސް ބޭނުން ކުރައްވާކަމެއްވެސް ނުވަތަ ނޫންކަމެއްވެސް މީޑިއާތަކަށް ކަށަވަރު ކުރެވިފައެއް ނުވެއެވެ.
އެހެންނަމަވެސް، ކެމްޕޭން ދަތުރުފުޅުތަކުގައި، ގަދަ އަވީގައި ގިނަ ރަށްތަކަށް މިހާރުވެސް ރައީސް ސާލިހު ދަތުރު ކުރައްވަމުން ގެންދަވާއިރު، އެމަނިކްފާނުގެ ސިއްޙީ ހާލުކޮޅު ރަގަޅު ނޫންކަމަށް މިހާތަނަށް ފާހަގަ ކުރެވިގައި ނުވާކަންވެސް މިފުރުސަތުގައި ފާހަގަ ކޮށްލާން ޖެހެއެވެ.
ފެނިގެންދަނީ ބަލިވެ ގޮތް ހުސްވެފައިވާ މަންޒަރު!
އެމްޑީޕީ ދޫކޮށް ނަޝީދު އާ ޕާޓީއެއް އުފެއްދިވި ނަމަވެސް، ކުރިން ބައެއް ފަރާތްތަކުން އުއްމީދު ކުރި ބީދައިން އެމްޑީޕީގެ ގިނަ އަދަދެއްގެ މެމްބަރުން އެޕާޓީ ދޫކޮށް ނަޝީދުގެ "ދަ ޑިމޮކްރެޓްސް" ޕާޓީއާއި ގުޅިފައެއް ނުވެއެވެ. އަދި އެޕާޓީ މިއަދުވެސް އޮތީ ކިރިޔާ 3،000 މެމްބަރުން ހަމަވާ، ރާއްޖޭގަ މިވަގުތު އޮތް އެންމެ ކުޑަ އެއް ޕާޓީގެ ގޮތުގައެވެ.
ހަމައެއާއެކު، ގިނަ ބަޔަކު ދެކޭ ގޮތުގައި ނަޝީދުގެ އާ ޕާޓީން ރިޔާސީ ކެނޑިޑޭޓެއްގެ ގޮތުގައި އެމަނިކުފާނު ނުނިކުންނަވާ، އެހެން ބޭފުޅަކު ނެރުއްވަން މަޖުބޫރުވެވަޑައިގަތީ، އެމްޑީޕީގެ އެތެރޭގައި ބޭއްވުނު ރިޔާސީ ޕްރައިމަރީން ބޮޑު ބައްޔަކުން ބަލިވެ، އޭރު ލިބިވަޑައިގެންނެވި ވަރާ ގާތަށްވެސް މުޅި ރާއްޖޭގައި ބޭއްވޭ އިންތިޚާބަކުން ވޯޓު ނުހޯއްދެވޭނެކަން ޔަގީންވެ، ގޮތް ހުސްވެގެންނެވެ.
އޭގެ ނަތީޖާއެއްގެ ގޮތުން، ޖަލްސާތަކުގައި ވާހަކަ ދައްކަވަމުން ކޯފާ އިސް ކުރެއްވުމާއި، ރައީސް ސާލިހާއި އެމްޑީޕީގެ ލީޑަރޝިޕަށް އަމާޒުކޮށް މަލާމާތާއި ފުރައްސާރައާއި މައްލަވަކުރުންފަދަ ހުތުރު އަދި ދަށުދަރަޖައިގެ އަމަލްތައް ނަޝީދުގެ ކިބައިން ފެންނަމުންދަނީ، ގިނަބަޔަކު ގަބޫކުރާ ގޮތުގައި "ކަތިވަޅި ގެއްލި، މަރިޔަނބު ގެއްލި، އަދި ކޮށި ދަނޑުވެސް ގެއްލި" ސަފުން ބާކީވެ ގޮސްގެންނެވެ.
އެއީ ނަފްސާނީ އިލްމުވެރިންނާއި، ސައިކޭޓްރިސްޓުންގެ ބަހުންނަމަ، ކުރިމަތިވަމުންދާ ނަފްސާނީ ހާލަތު ބަލިމަޑުކަމަކަށް ބަދަލުވެގެން ދިއުމުން އިންސާނާއަށް މެދުވެރިވާ ހާލަތެވެ. އަދި އެހާލަތު ޑޮކްޓަރުން ސިފަކުރައްވަނީ އެއީ ބޭސްކުރާންޖެހޭ ބައްޔެއްގެ ގޮތުގައިވެސްމެއެވެ.
ކޮމެންޓު ފޮނުވާ