ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކެމްޕޭނަށް ރަށްރަށަށް ވަޑައި ގަންނަވާއިރު ޚިޔާލް ފާޅު ކުރުމަށް ހުރަސް އަޅައި ފުލުހުން ހިންގާ ޢަމަލުތައް އެރަށުގައި ހިންގޭނީ ކައުންސިލްގެ ހުއްދަ ލިބިގެންކަމަށް ތުލުސްދޫ ކައުންސިލުން ބުނެފިއެވެ.
ރިޔާސީ އިންތިހާބުގެ ކެމްޕޭނަށް ރައީސް އިބްރާހީމް މުހައްމަދު ސޯލިހު ކ. ތުލުސްދޫއަށް ވަޑައިގަންނަވާއިރު ފުލުހުންނަށް ރަށުގެ އެއްވެސް ސަރަހައްދެއް ބަންދުކޮށް ކޯޑަން ކުރެވޭނީ ކައުންސިލުން ހުއްދަ ލިބިގެން ކަމަށް އެ ކައުންސިލުން ވަނީ ކަނޑައަޅާފައެވެ. ތުލުސްދޫ ޕީޕީއެމްގެ 5 ކައުންސިލަރުން ސޮއިކޮށް ނެރުނު ބަޔާނުގައި ބުނީ އެމްޑީޕީން ރިޔާސީ އިންތިހާބުގެ ކެމްޕޭނަށް ރަށްރަށަށް ދާއިރު ގާނޫނު އަސާސީން ރައްޔިތުންނަށް ލިބިދޭ ހިޔާލު ފާޅުކުރުމުގެ މިނިވަންކަމަށް ހުރަސް އަޅާ ކަމަށެވެ.
އެގޮތުން ހިޔާލު ފާޅުކުރުމުގެ މިނިވަން ކަމަށް ހުރަސް އަޅާ އެ ބާރު ކަނޑުވާލާ ރައްޔިތުންގެ މަސްލަހަތު ގެއްލޭ ގޮތަށް ރައްޔިތުންނާއި ފުލުހުންނާއި ކުރިމަތިލާ ހަމަނުޖެހުމަށް މަގުފަހިވާ ގޮތަށް ކަންކަން ހިނގަމުންދާތީ އެކަންކަން ހަރުކަށި އިބާރާތުން ކުށްވެރިކުރާ ކަމަށް ގަރާރުގައި ބުނެފައިވެއެވެ. ލާމަރުކަޒީ ގާނޫނުން ލިބިދޭ ބާރުގެ ދަށުން އެ ރަށެއްގެ އަމަންއަމާންކަން ބެލެހެއްޓުމާއި ރަށުގެ މަސްލަހަތު ހިޔާމަތްކޮށް ރައްކާތެރިކުރުމަކީ ކައުންސިލްތަކުން ކުރުން ލާޒިމުކުރުވާ ކަމެއް ކަމަށް މި ގަރާރުގައި ފާހަގަކޮށްފައިވެއެވެ.
ތުލުސްދޫ ކައުންސިލްގެ ގަރާރުގައި ބުނެފައިވަނީ ލާމަރުކަޒީ ގާނޫނުން ލިބޭ ބާރުގެ ދަށުން ރަށުގެ އެއްވެސް ސަރަހައްދެއް ފުލުހުންނަށް ބަންދުކުރެވޭނީ އެ ކައުންސިލުގެ ހުއްދަ ލިބިގެން ކަމަށެވެ.
މި ގަރާރުގައި ވަނީ ރައީސް ޔާމީން މިނިވަންކޮށް މިނިވަން ވާދަވެރި ރިޔާސީ އިންތިހާބެއް ބޭއްވުމަށް ސަރުކާރަށް ގޮވާލާފައެވެ. ރައީސް ޞާލިހު ވަޑައިގަންނަވަ ގިނަ ރަށްރަށުން އެމަނިކުފާނާއި ދެކޮޅަށް ޚިޔާލް ފާޅު ކުރާއިރު އެއްވާ މީހުންނަށް ރައީސަށް އަޑު ނީވޭ ވަރަށް ފަހަތަށް ޖައްސާކަން ފާހަގަކޮށްލެވެއެވެ.
ކޮމެންޓު ފޮނުވާ