ކުރީގެ ރައީސް ޔާމިންގެ ސަރުކާރުގައި ހިގައިދިޔަ ވައްކަމާއި ޚިޔާނާތާއި ކޮރަޕްޝަންގެ މައްސަލަތައް ބަލާ، އެކަންކަމުގެ މައްޗަށް އިންސާފު ގާއިމްކޮށް ދިނުމަށް މިސަރުކާރުން ފެށި މަސައްކަތުގެ ތެރެއިން، އެންމެ ފުރަތަމަ ޖަލަށް ލެވުނީ ކުރީގެ ރައީސް ޔާމިން ކަމުގައި ދެންނެވިދާނެއެވެ. އެއީ އެމްއެމްޕީއާރުސީގެ ބޮޑު ޚިޔާނާތުގެ ތުހުމަތުގައެވެ.
މިގޮތުން، ޔާމިންގެ މައްޗަށް ކުރެވުނު ޚިޔާނާތުގެ ތުހުމަތުތަކާއެކު މިހާތަނަށް 2 ހުކުމެއް އައިސްފައިވާއިރު، އެއިން އެއްވެސް ޝަރީއަތަކީ އިންސާފުވެރިކަމާއެކު ހިނގައިދިޔަ ޝަރީއަތްތަކެއްކަމަށް ޚުދު އެމަނިކްފާނުވެސް ގަބޫލުފުޅެއް ނުކުރައްވައެވެ. އޭގެ ނަތީޖާއަކަށް ވެގެން ދިޔައީ، ޔާމިން މިނިވަންކުރުމަށް އިދިކޮޅު ޕީޕީއެމްއިން ފެށި މަސައްކަތްތައް ދުވަހެއް ދުވަހަކަށް ފުޅާކޮށް، މާލޭގެ މަގުތަކުގައި ކުރި އިހުތިޖާޖުތަކުގެ އިތުރަށް، އެމަސައްކަތް ގައުމުން ބޭރަށްވެސް ގެންދާންޖެހުމެވެ.
މިގޮތުން، ޔާމިން މިނިވަންކުރުމަށް އިދިކޮޅު ޕީޕީއެމްއިން އެކުލަވާލި "ޚާރިޖީ ޓީމުގައި" އެންމެ ފުރަތަމަ ދުވަހުއްސުރެ ހިމެނިގެންދިޔަ، ޕާޓީގެ އިސް ލީޑަރޝިޕްގައި ހިމެނޭ ބޭފުޅުންކޮޅެއް ތިއްބެވިއެވެ. އޭގެ ތެރޭގައި ހިމެނޭ ބޭފުޅުންނަކީ، ޔާމިންގެ ވެރިކަމުގައި ޔޫތު މިނިސްޓަރކަން ކުރެއްވި އަދި އެ ސަރުކާރުގައި ބައެއް ގައުމުތަކުގެ ސަފީރުކަންވެސް ކުރެއްވި މުހައްމަދު ހުސެއިން ޝަރީފް (މުންދު)އާއި، ކުރީގެ ޑިފެންސް މިނިސްޓަރ އަދި މިހާރުގެ މަޑުއްވަރި ދާއިރާގެ މެމްބަރު އާދަމް ޝަރީފްއާއި، ކުރީގެ އިކޮނޮމިކް މިނިސްޓަރ އަދި މިހާރުގެ މާވަށު ދާއިރާގެ މެމްބަރު މުހައްމަދު ސައީދުއެވެ. އޭގެ އިތުރުން، ދެން އެ ޓީމުގައި ފަހުން ހިމެނުނީ ޕީޕީއެމްގެ ނާއިބު ރައީސް، ނައިފަރު ދާއިރާގެ މެމްބަރު އަހުމަދު ޝިޔާމެވެ.
މިބޭބޭފުޅުންގެ މަސައްކަތެއްގެ ގޮތުގައި އެންމެ ފުރަތަމަ ދުވަހުފެށިގެންވެސް ކަނޑައަޅާފައިވަނީ، ޔާމިންގެ މައްޗަށް ކުރި "ބޭއިންސާފު ޝަރީއަތުގެ" ވާހަކަތައް ގައުމުން ބޭރުގެ ސަފީރުންނާއި، ޖަމިއްޔާ ޖަމާއަތްތަކާއި، އަދި އޭގެ އިތުރުން ގައުމުތަކުގެ ވެރީންނާހަމައަށް ފޯރުކޮށްދީ، ޖަލުގައި އޮންނެވި ޕާޓީގެ ލީޑަރު މިނިވަންކުރުމަށް ސަރުކާރަށް ޕްރެޝަރު ކުރުވުމުވެ.
އަދި ވަކީން ޚާއްސަކޮށް ރިޔާސީ އިންތިޚާބު ގާތްވެގެން އަންނައިރު، އިދިކޮޅު ރިޔާސީ ކެނޑިޑޭޓް ޖަލުގައި ބާއްވައިގެން މިނިވަން އިންސާފުވެރި އިންތިޚާބަކަށް ނުދެވޭނެކަން ބޭރުގެ ފަރާތްތަކަށް އަންގާދީ، ވަކީން ޚާއްސަކޮށް ރިޔާސީ އިންތިޚާބަށް ޔާމިން މިނިވަންކުރުމަށް ސަރުކާރަށް ގޮވާލާ، އެމަގުން ސަރުކާރަށް ޕްރެޝަރު ކުރުމެވެ.
ރާއްޖެއިން ބޭރަށް މަދު ދަތުރު ތަކެއް، ކޮންމެ ދަތުރަކަށްފަހު "ފޮނި" ވާހަކަތައް، ނަތީޖާއެއް ނުނެރެވޭ!
ޚިޔާނާތާއި މަނީ ލޯންޑަރިންގެ ތުހުމަތުގައި 11 އަހަރަށް ޖަލަށް ލާފައިވާ ކުރީގެ ރައީސް ޔާމިން މިނިވަން ކުރުމަށް އެކުލަވާލި ޓީމުން ވަނީ ފާއިތުވި ތަނުގައި ރާއްޖެއިން ބޭރަށް ދަތުރުތައް ކޮށްފައި ވެއެވެ.
އެހެންނަމަވެސް، އެޓީމުން ކޮށްފައިވަނީ މަދު ދަތުރުތަކެއް ކަންވެސް ފާހަގަ ކޮށްލެވެއެވެ. އޭގެ ތެރޭގައިވެސް ހިމެނެނީ އަވައްޓެރި ސްރީ ލަންކާގައި ގާއިމްކޮށްފައިވާ ބޭރުގެ ބައެއް މިޝަންތަކާއި ބައްދަލު ކުރުމަށް އެޓީމުން ކުރި ދަތުރުތަކެވެ. ޔޫރަޕްގެ ގައުމުތަކަށް މި ޓީމުން ފާއިތުވެދިޔަ ތަނުގައި، ރައީސް ޔާމިން ޖަލުން މިނިވަންކުރުމަށް ހުޅަގާއި ޔޫރަޕްގެ ގައުމުތަކުގެ އެހީތެރިކަން ހޯދުމަށް ދަތުރެއް ކުރިކަމެއް އެނގިފައެއް ނުވެއެވެ.
"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، ސްރީ ލަންކާގައި ގާއިމްކޮށްފައިވާ ބޭރުގެ މިޝަންތަކާއި، ނުވަތަ ސަފީރުންނާއި ބައްދަލުކުރުމަށް ޕީޕީއެމްގެ "ޚާރިޖީ ޓީމުން" ކުރި ދަތުރުތަކުގައި ސަފީރުންނާއި ބައްދަލު ކުރުމުގެ ފުރުސަތު ލިބިފައިވަނީވެސް މަދު ގައުމުތަކަކާއިއެވެ. އޭގެ އިތުރަށް ޔޫރަޕިއަން ޔޫނިއަންގެ ބައެއް މަންދޫބުންނާއި ބައްދަލު ކުރުމުގެ ފުރުސަތު ލިބިގެންގޮސްފައި ވެއެވެ. އޭގެ ނަތީޖާއެއްގެ ގޮތުން، ޔާމިންގެ މައްޗަށް ކުރިކަމަށް ޕީޕީއެމްއިން ބުނާ "ބޭއިންސާފު ޝަރީއަތުގެ" އަޑު ޔޫރަޕްގެ ގައުމުތަކަށް ފޯރުކޮށް ދިނުމުގެ ފުރުސަތު އެޓީމަށް ފާއިތުވެދިޔަ ތަނުގައި ލިބިފައި ވެއެވެ.
އެހެންނަަމަަވެސް އިސްވެ ދެންނެވުނު ޑިޕްލޮމެޓިކް އޮފިޝަކުންނާއި އަދި ޔޫރަޕިއަން ޔޫނިއަންގެ މަންދޫބުންނާއި ބައްދަލުވި މަދު ފަހަރުވެސް އެފަރާތްތަކާއި ބައްދަލު ކުރުމުގެ ފުރުސަތު އެ ޓީމަށް ހޯދާ ދީފައިވަނީ، އެމްޑީޕީގެ ރައީސްކަމުގައި އޭރު ހުންނެވި، މަޖިލިސް ރައީސް މުހައްމަދު ނަޝީދު މެދުވެރިވެގެން ކަމަށްވެސް "ޚަބަރު އޮންލައިން"އާއި މައުލޫމާތު ހިއްސާކުރި ޕީޕީއެމްގެ އިސް ފަރާތުން ވިދާޅުވެފައިވެއެވެ. އެފުރުސަތު ޕީޕީއެމްގެ ޚާރިޖީ ޓީމަށް ލިބިފައިވަނީ، ނައިފަރު ދާއިރާގެ މެމްބަރު ޝިޔާމް ނަޝީދާއި ގުޅުއްވައިގެން ކަމަށްވެސް އެފަރާތުން ވިދާޅުވެފައި ވެއެވެ.
ސްރީ ލަންކާގައި ތިއްބަވާ ސަފީރުންނާއި ބައްދަލު ކުރުމުގެ ފުރުސަތުވެސް ލިބުނީ ޝިޔާމް ނަޝީދަށް ގުޅުއްވައިގެން ނަޝީދު މެދުވެރިކޮށް. މިއިން އެއްވެސް ބައްދަލުވުމަކަށްފަހު ވެސް، ކުޑަމިނުން ރައީސް ޔާމިން މިނިވަންކުރުމަށް ގޮވާލާ، ނުވަތަ އިންސާފު ހޯދުމަށް ގޮވާލާ އެއިން ފަރާތަކުން ސްޓޭޓްމަންޓެއްހާ މިންވަރުވެސް އާންމު ކޮށްފައެއް ނުވޭ. ނަތީޖާ ސުމެއް.
ނަޝީދު މެދުވެރިކޮށް ލިބުނު މަދު ފުރުސަތެއްގައި ބޭރުގެ ފަރާތްތަކާއެކު ޕީޕީއެމްގެ ޚާރިޖީ ޓީމުން ކުރި މަސައްކަތުން އެއްވެސް ނަތީޖާއެއް ނެރެވިފައި ނުވާކަމަށް މޭރުން ކުރައްވަމުން "ޚަބަރު އޮންލައިން" އާއި މައުލޫމާތު ހިއްސާކުރި ފަރާތުން ވިދާޅުވެފައި ވެއެވެ.
ފާއިތުވެދިޔަ ތަނުގައި، ރައީސް ޔާމިން މިނިވަން ކުރުމަށް ބޭރުގެ ފަރާތްތަކުގެ އެހީތެރިކަން ހޯދުމަށް ކަމަށްބުނެ، ޕީޕީއެމްގެ އިސް ފަރާތްތަކުން އަވައްޓެރި ސްރީ ލަންކާއަށް ކުރި ދަތުރުތަކަށްފަހު، ޕީޕީއެމްގެ ޓީމުން، އެ ދަތުރުތައް "ޒީނަތްތެރިކޮށް" އެތަކެއް ވާހަކައެއް ދެއްކި ނަމަވެސް، ޑިޕްލޮމެޓިކް އެއްވެސް ފަރާތަކުން ޔާމިން މިނިވަން ކުރުމަށް، ނުވަތަ ކުޑަމިނުން ޔާމިނަށް އިންސާފު ހޯދާ ދިނުމަށް ގޮވާލާ ސްޓޭޓްމަންޓެއްހާ މިންވަރުވެސް އާންމު ކޮށްފައި ނުވާކަން މިފުރުސަތުގައި ފާހަގަ ކޮށްލާން ޖެހެއެވެ.
ކުރީގެ ރައީސް ވަހީދު ޚާރިޖީ ޓީމުގައި ބައިވެރިއެއް ނުކުރި!
"ޚަބަރު އޮންލައިން" އަށް މައުލޫމާތު ލިބިފައިވާ ގޮތުގައި، ޔާމިން މިނިވަން ކުރުމަށް އެކުލަވާލި "ޚާރިޖީ ޓީމުގައި"، ފަހުން ޕީޕީއެމްއަށް ސޮއި ކުރެއްވި، ކުރީގެ ރައީސް ވަހީދު ހިމެނުމަށް ބައެއް ފަރާތްތަކުން ޚިޔާލު ދީ އަދި މަސައްކަތްވެސް ކުރިއެވެ. އަދި ޚުދު ރައީސް ވަހީދުވެސް އެޓީމުގައި، ރައީސް ޔާމިން މިނިވަން ކުރުމަށް މަސައްކަތް ކުރެއްވުމަށް ބޭނުންފުޅު ވެވަޑައިގަތެވެ.
އެއާއެކު ސާފުވާން އޮތް އެއް ހަގީގަތަކީ، ކުރީގެ ރައީސެއްގެ ހައިސިއްޔަތުން، ބޭރުގެ ގައުމުތަކާއި އަދި ޖަމިއްޔާ ޖަމާއަތްތަކާއި، ރައީސް ވަހީދަށްވުރެ ބޮޑު ގުޅުމެއް އޮންނާނޭ އެެހެން ބޭފުޅަކު ޕީޕީއެމްގެ ލީޑަރޝިޕްގައި މިވަގުތު ނެތްކަންވެސްމެއެވެ. އަދި ޑިޕްލޮމަސީގެ އުސޫލުތައް ހަމަޖެހިގައި އޮންނަ ގޮތަށް ބަލާއިރު، ބައިނަލްއަގުވާމީ ކަންކަމުގައި ކުރީގެ ރައީސުންނަށް ލިބޭ ސަމާލުކަން، ރައީސް ޔާމިން މިނިވަން ކުރުމަށް އެކުލަވާލި "ޚާރިޖީ ޓީމުގައި" ރައީސް ވަހީދު ހިމެނިވަޑައިގަތުމުން ލިބިގެންދާނެކަމީވެސް ޝައްކެއް އޮތްކަމެއްވެސް ނުމެ ނޫންމެއެވެ.
އަދި އެ ޓީމުގައި ރައީސް ވަހީދު ހިމެނިވަޑައިގަތުން ވެގެން ދިޔައީހީ ޔާމިން މިނިވަންކުރުމުގެ މަސައްކަތަށް ލިބިގެންދާނެ ވަރަށްވެސް ބޮޑު ކުރިއެރުމަކަށް ކަމީވެސް ކަށަވަރުވެ ޔަގީންވާން އޮތް ކަމެކެވެ. އެހެންނަމަވެސް، ކޮންމެވެސް ސަބަބަކާހެދި، ޔާމިން މިނިވަންކުރުމަށް އެކުލަވާލި "ޚާރިޖީ ޓީމުގައި" ކުރީގެ ރައީސް ވަހީދު ހިމެނުމަށް ޕީޕީއެމްގެ ލީޑަރޝިޕްގެ ބައެއް ބޭފުޅުން ބޭނުންފުޅެއް ނުވިއެވެ.
މުންދުމެން، ސައީދުމެން ބޭނުމެއް ނުވި ރައީސް ވަހީދު އެ ޓީމުގެ ހިމަނަން. މުންދުގެ ދަރިފުޅު ބަލިވެގެން ކަމަށްބުނެ، ރާއްޖެއިން ބޭރަށް ދަތުރުކުރުން ދަތިކަމަށް ބުނެ، ފަހުން "ޚާރިޖީ ޓީމުން" ވަކިވީ. އެހާ ހިސާބުންވެސް ރައީސް ވަހީދަށް ފުރުސަތު ދޭން ބޭނުމެއް ނުވި.
ރައީސް ޔާމިން މިނިވަން ކުރުމަށް ބޭރުގެ ފަރާތްތަކުގެ އެހީތެރިކަން ހޯދުމަށް އިދިކޮޅު ޕީޕީއެމްއިން ކުރި މަސައްކަތްތަކުން ކުރީގެ ރައީސް ވަހީދު ބާކީ ކުރިގޮތުގެ ތަފްސީލުތައް ހިއްސާ ކުރައްވަމުން ޕީޕީއެމްގެ އިސް ބޭފުޅަކު ވިދާޅުވެފައި ވެއެވެ.
ހަމައެއާއެކު، ރައީސް ވަހީދަށް ފުރުސަތު ނުދެއްވާ، ރައީސް ޔާމިން މިނިވަންކުރުމުގެ ނަމުގައި ބޭރުގެ ފަރާތްތަކާއި ބައްދަލުކުރި އެޕާޓީގެ އިސް ބައެއް ބޭފުޅުން، ރިޔާސީ އިންތިޚާބުގައި އެބޭފުޅުން ވާދަކުރެއްވުމުގެ ޝައުގުގައި، އެބޭފުޅުން އަމިއްލަފުޅަށް ބޭރުގެ ބައެއް ޑިޕްލޮމެޓުންގެ ތާއީދު ހޯއްދެވުމަށް މަސައްކަތް ކޮށްފައިވާކަމަށްވެސް، ފަހުން ބައެއް ފަރާތްތަކުން ފަހުން ތުހުމަތު ކޮށްފައިވެސް ވެއެވެ.
ރިޔާސީ އިންތިޚާބު ބޯމަތިވި އިރިވެސް، ބޭރުގެ ފަރާތްތަކުން ޔާމިނަށް ފުރުސަދޭން ގޮވައެއް ނުލި!
އެއްވެސް ޝައްކެއް ނެތް ގޮތުގައި، ރިޔާސީ އިންތިޚާބެއް ގާތްވެގެން އަންނައިރު، ގައުމެއްގެ އިދިކޮޅު ލީޑަރު އަދި އަމުދުން އިދިކޮޅު ރިޔާސީ އިދިކޮޅު ކެނޑިޑޭޓް ޖަލުގައި އޮންނެވުމަކީ ނުވަތަ އެހާލަތު އެގޮތުގައި ބޭއްވުމަކީ އެއްވެސް ސަރުކާރަކަށް ފަސޭހަކަމެއް ނޫނެވެ.
އެތަޖުރިބާ އެންމެ ގާތުން ކޮށްފައިވަނީވެސް ރައީސް ޔާމިންގެ ސަރުކާރުންނެވެ. އެއީ 2018ގެ ރިޔާސީ އިންތިޚާބު ގާތްވެގެން އައިއިރު، ކުރީގެ ރައީސް ނަޝީދުގެ އިތުރުން އިދިކޮޅު ހުރިހާ ލީޑަރުން ކަހަލަ ގޮތަކަށް، އޭރު ގައުމުން ބޭރަށް އަރުވާލެވި އަދި އަނެއްބައި ލީޑަރުން ޖަލުގައި ތިއްބަވަން ޖެހުމުން ބޭރުގެ ފަރާތްތަކުން އޭރުގެ ސަރުކާރަށް ކުރިމަތި ކުރުވި ޕްރެޝަރާއި ގޮންޖެހުންތަކެވެ.
އަދި އިދިކޮޅު ލީޑަރުންނަށް ފުރުސަތު ނުލިބޭ އިންތިޚާބެއް މިނިވަން ނުވާނެކަމަށްބުނެ، ރާއްޖެއާއި ދެކޮޅަށް ދަތިކުރުމުގެ ފިޔަވަޅު އަޅާނެކަމުގެ އިންޒާރުވެސް ބޭރުގެ ފަރާތްތަކުން، އޭރުއޮތް ރައީސް ޔާމިންގެ ސަރުކާރަށް ދީފައި ވެއެވެ.
ހަމަ އެބީދައިން، ހުރިހާ އިދިކޮޅު ލީޑަރުން ޖަލުގައި ނެތެއްކަމަކު، މިއަދުވެސް މިއޮތީ އެހާލު މެދުވެރި ވެފައެވެ. ރިޔާސީ އިންތިޚާބަށް އޮތީ އެންމެ ދޮޅުމަހެއްހާ ދުވަހެވެ. އިދިކޮޅު ލީޑަރު އޮންނެވީ ޖަލިުގައެވެ. އިންތިޚާބުގައި ވާދަކުރާނޭ އިދިކޮޅު ކެނޑިޑޭޓަކު އަދިވެސް ނެތެވެ. އެއާއެކު އިދިކޮޅި ޕީޕީއެމްއިން މިހާރު ބުނަމުން ދަނީ ޔާމިނަށް ވާދަ ނުކުރެވޭ އިންތިޚާބެއް މިނިވަން ނުވާނެކަމަށާއި، ދެން ޖެހޭނީ އިންތިޚާބު ފަސް ކުރުމަށް ކަމުގައެވެ.
އެހެންނަމެވެސް، މިއިން އެއްވެސް ކަމަކަށް ބޭރު ދުނިޔޭގެ އެއްބާރުމެއް ތާއީދެއް ނެތެވެ. އެފަރާތްތަކުގެ ހިލަމެއްވެސް ނުވެއެވެ. ޖަލުގައި އޮންނެވި އިދިކޮޅު ކެނޑިޑޭޓް މިނިވަން ކުރުމަށް ގޮވައެއްވެސް ނުލައެވެ. އަދި އެފަދަ ހާލަތެއްގައި މިނިވަން އިންސާފުވެރި އިންތިޚާބެއް ނުބޭވިދާނެ ކަމަކަށްވެސް ބޭރުގެ ފަރާތްތަކުން ބުނަމުންނެއްވެސް ނުދެއެވެ.
ހަގީގަތުގައި ފާއިތުވި 4 އަަހަރު، ރައީސް ޔާމިން މިނިވަން ކުރުމުގެ ނަމުގައި އިދިކޮޅު ޕީޕީއެމް "ޚާރިޖީ ޓީމުން" ކުރި މަސައްކަތުގެ އެއްވެސް ނަތީޖާއެއް ފެންނާކަށް ނެތެވެ. އަމަސައްކަތަށް ދެވެން އޮތީ "ސުމެއް" އެވެ.
