ރަކީދޫ ބަނދަރާއި، ގޮނޑުދޮށް ހިމާޔަތް ކުރުމުގެ މަޝްރޫޢުގެ ނިމުން ރަސްމީކޮށް ފާހަގަކޮށްފި

ރަކީދޫ ބަނދަރު ހެދުމާއި، ގޮނޑުދޮށް ހިމާޔަތް ކުރުމުގެ މަޝްރޫޢުގެ ނިމުން ރަސްމީކޮށް ފާހަގަކޮށްފިއެވެ.

މި މަޝްރޫޢުތަކުގެ ނިންމުން ފާހަގަކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްއެވެ. މިއީ އެމަނިކުފާނު ވ.އަތޮޅުގެ ރަށްތަކަށް ކުރައްވަމުންދާ ރިޔާސީ ކެމްޕޭނުގެ ތެރެއިން ނިންމުން ފާހަގަ ކުރެއްވި މަޝްރޫއުތަކެކެވެ. މިދެމަޝްރޫޢުގެ މަސައްކަތްވެސް ކުރީ އެމްޑީސީސީންނެވެ.

ރަކީދޫ ބަނދަރު ތަރައްޤީކުރުމުގެ މަޝްރޫގެ މަސައްކަތް ނިންމާލާފައިވަނީ މިއަހަރުގެ އޭޕްރީލް މަހުގެ ތެރޭގައެވެ. މިބަނދަރުގެ މަސައްކަތަކީ ވ.ރަކީދޫގައި މުޅިން އަލަށް ކުރިއަށްގެންދިޔަ ޕްރޮޖެކްޓެކެވެ. މި މަޝްރޫޢުގެ ދަށުން، 5،654 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 11306 ކިއުބިކް މީޓަރުގެ ދޯނި އެހެލާ ސަރަޙައްދު ފުންކުރުމާއި، 198 މީޓަރުގެ ސަރަޙައްދެއްގައި އެއްގަމުތޮށި ލުމުގެ މަސައްކަތް އެމް.ޓީ.ސީ.ސީން ވަނީ ކޮށްފައެވެ. އަދި 156 މީޓަރުގެ ސަރަޙައްދެއްގައި ބޭރުތޮށި ލުމާއި، 44 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 594 އަކަ މީޓަރު ސަރަޙައްދެއްގައި ޕޭވްމަންޓް ހެދުމުގެ މަސައްކަތްވެސް އެކުންފުނިން ކޮށްފައިވެއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމް.ޓީ.ސީ.ސީއާއި ހަވާލުކޮށްގެން ކުރިއަށްގެންދިޔަ މި މަޝްރޫޢުއަކީ 18.5 މިލިއަން ރުފިޔާގެ މަޝްރޫޢެކެވެ.

ރަކީދޫގެ ގޮނޑުދޮށް ޙިމާޔަތްކުރުމަށް އެމްޓީސީސީން ކުރިއަށްގެންދިޔަ މަޝްރޫޢު ނިންމާލައިފައިވަނީ ޖޫން މަހުގެ ތެރޭގައެވެ. ރަކީދޫގެ ގޮނޑުދޮށް ޙިމާޔަތްކުރުމުގެ މަސައްކަތުގެދަށުން އެމްޓީސީސީންވަނީ 40 މީޓަރުގެ ސަރަޙައްދުގައި ގްރޮއިންސް ޖަހާ އެއްގަމު ތޮށިތަކެއް ލާފައެވެ. އަދި 200 މީޓަރުގެ ސަރަޙައްދެއްގައި ބޮޑު ހިލައިގެ ބޭރު ތޮއްޓެއްވެސްވަނީ ލާފައެވެ.

ރަށުގައި ފަތާ ސަރަޙައްދެއް ހެދުމަށް 560 ކިއުބިކް މީޓަރުގެ ސަރަޙައްދެއްވެސްވަނީ ފުންކޮށްފައެވެ. އަދި އެ ސަރަޙައްދުގައި 20 މީޓަރުގެ ގްރޮއިންސް ޖަހާ، 25 މީޓަރުގެ ސަރަޙައްދެއްގައި ރިވެޓްމަންޓް ޖަހާފައިވެއެވެ.