ލ. ގަމުގައި ތަރައްޤީކުރާ ޓަރޝަރީ ހޮސްޕިޓަލާއި، ގދ. ގައްދޫގައި ތަރައްޤީކުރާ ހޮސްޕިޓަލުގެ ޢަމަލީ މަސައްކަތް އަންނަމަހު ފެށުމަށް ތައްޔާރުވަމުންދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީން ބުނެފިއެވެ.
ގަމުގައި ޓާޝަރީ ފެންވަރުގެ ހޮސްޕިޓަލެއް އަދި ގައްދޫ ޒަމާނީ ފެންވަރުގެ ހޮސްޕިޓަލެއް އެޅުމަކީ ރައީސް އިބްރާހީމް މުހައްމަދު ސޯލިހް ރިޔާސީ ވައުދެކެވެ.
އަތޮޅުތަކުގެ ޞިއްޙީ ފަރުވާގެ ކަންކަން ހަރުދަނާކޮށް، ޖާގައިގެ ދަތިކަން ކުރިމަތިވެފައިވާ ތަންތަނުގެ ޖާގަ އިތުރުކުރުމަށް ގިނަ މަޝްރޫޢުތަކެއް ސަރުކާރުން މިވަގުތުވެސް އެކި މަރުޙަލާގައި ތަކުގައި އަންނަނީ ހިންގަވަމުންނެވެ. އެގޮތުން މި ދެ ހޮސްޕިޓަލުގެ މަސައްކަތަކީ ހެލްތު މިނިސްޓްރީން ސްޕޭންގެ ކުންފުންޏެއްކަމަށްވާ ހޮމްޓް އެސްޕަނިއާއާއި ޙަވާލުކުރައްވައިގެން ހިންގަވާ ދެ މަޝްރޫޢެކެވެ.
އެކުންފުންޏާއެކު މި 2 ހޮސްޕިޓަލުގެ މަޝްރޫޢުގައި ސޮއިކޮށްފައިވަނީ 26 ޖެނުއަރީ 2023 ގައެވެ. ލ. ގަމުގައި ސަރުކާރުން ތަރައްޤީކުރައްވާ 130 އެނދުގެ ހޮސްޕިޓަލަށް ގާތްގަނޑަކަށް 492.35 މިލިއަން ރުފިޔާ ޚަރަދުވާނެއެވެ. އަދި ގައްދޫގައި ތަރައްޤީކުރައްވާ 30 އެނދުގެ ހޮސްޕިޓަލުގެ މަސައްކަތަށް ގާތްގަނޑަކަށް 226.50 މިލިއަން ރުފިޔާ ޚަރަދުވާނެއެވެ.
ސްޕޭންގެ ކުންފުންޏާއެކު ހެލްތު މިނިސްޓްރީން ވެފައިވާ އެއްބަސްވުމުގެ ދަށުން، މި ދެ ހޮސްޕިޓަލަށް ބޭނުންވާ ސްޓާފް އެކަމޮޑޭޝަން ބްލޮކްތަކާއި، މުޅި ހޮސްޕިޓަލަށް ބޭނުންވާ ފަރުނީޗަރާއި، މެޑިކަލް އިކުއިޕްމަންޓް ފޯރުކޮށްދިނުމަށް ހަމަޖެހިފައިވެއެވެ. އަދި މުވައްޒަފުން ތަމްރީންކުރުމުގެ މަސައްކަތްވެސް ކުރުމަށް ހަމަޖެހިފައިވެއެވެ.
މި ދެ ހޮސްޕިޓަލް ތެރެއިން ލ. ގަމު ޓަރޝަރީ ހޮސްޕިޓަލް ޢިމާރާތްކުރުމަށް ދީފައިވަނީ 36 މަސް ދުވަހުގެ މުއްދަތަކެވެ. އަދި ގދ. ގައްދޫ ހޮސްޕިޓަލުގެ މަސައްކަތް ޙަވާލުކޮށްފައިވަނީ 30 މަސްދުވަހުން ނިންމާގޮތަށެވެ.
މި މަޝްރޫޢަށް ފައިނޭސް ކުރުމަށް ހަމަޖެހިފައިވަނީ، ޑޮއިޗަރ ބޭންކުގެ ފަރާތުންކަމަށް ހެލްތު މިނިސްޓްރީން މީގެ ކުރިން ވިދާޅުވެފައިވެއެވެ.
