ރާއްޖޭގެ މަޝްހޫރު އެކްޓަރު/ޑައިރެކްޓަރު ޔޫސުފް ޝަފީއު (ޔޫއްޕެ) "ޖޯކަރު" ގެ ނަމުގައި ކޮމެޑީ ފިލްމެއް ގެނެސްދޭން ތައްޔާރުވެއްޖެ އެވެެ.
"ޖޯކަރު" އަކީ ޔޫއްޕެއާ ގުޅިގެން އިސްމާއީލް ޝަފީގާއި ޝާނީޒް އަލީ ޕްރޮޑިއުސްކޮށްފައިވާ އެއްޗެކެވެ. ފާހަގަ ކޮށްލެވޭ ކަމަކީ ޝަފީގް އަދި ޝާނީޒް އަކީ ވެސް ކާމިޔާބު ފިލްމް ތަކެއް ޕްރޮޑިއުސް ކޮށްފައިވާ ދެ ޕްރޮޑިއުސަރުން ކަމެވެ.
އެގޮތުން ޝާފީގް ވަނީ "ދައުވަތު" އާއި "ނޯޓީ 40″ އަދި "ފޯޓީ ޕްލަސް" ފަދަ ކާމިޔާބު ފިލްމް ތަކެއް ޕްރޮޑިއުސް ކޮށްފައިއެވެ. އަދި ޝާނީޒް އަކީ މިދިޔަ މެއި މަހު އޮލިމްޕަހުގައި އެޅުވި އަލީ ސީޒަންގެ "ލޯބިވެވިއްޖެ" ގެ ޕްރޮޑިއުސަރުއެވެ.
ދުވަސްތަކެއް ފަހުން ޔޫއްޕެ ޑައިރެކްޓްކުރި ފިލްމެއް ބެލުންތެރިންނަށް ގެނެސްދޭން ތައްޔާރުވަމުން އަންނަ އިރު، ގިނަ ބަޔަކު މި ފިލްމް އާއި މެދުގައި ކުރާ އުންމީދު ވެސް ބޮޑެވެ.
ޔޫއްޕެ ލިޔެ، ޑައިރެކްޓް ކޮށްފައިވާ މި ކޮމެޑީގެ ކާސްޓްގައި ތަޖުރިބާކާރުން ތަރިން ކަމަށްވާ ޝީލާ ނަޖީބާއި އަހުމަދު ނިމާލާއި އަހުމަދު ސައީދުގެ އިތުރުން އަލީ އާޒިމް ދޮން (އައްޔަ) އާއި ނާޝިދާ މުހައްމަދާއި އިބްރާހީމް ރަޝީދު (ބްރޯ) އާއި ހަމްދާމް ފާރޫގާއި އަހުމަދު ރިފްޝާނާއި ޝަހީދާ އަހުމަދާއި މޫސާ އަލީފް ހިމެނެ އެވެ.
