ރާއްޖޭގައި އުފެދޭ އެއްވެސް ވެރިކަމެއްގައި އަދާލަތު ޕާޓީގެ ބަހެއްވެސް އޮތުމަށް ބޭނުން ނުބާކަމުގައި އެމްޑީޕީގެ ފުރަތަމަ ރައީސް އަދި ރައްޔިތުންގެ މަޖިލިހުގެ ކުރީގެ މެމްބަރު އިބުރާހިމް އިސްމާއިލް (އިބުރާ) ވިދާޅުވެއްޖެއެވެ.

އިބުރާ ކުރެއްވި ޓުވީޓެއްގައި ވިދާޅުވީ އަދާލަތު ޕާޓީގެ ވެރިކަމަށް ތާއީދު ނުކުރެވޭ ކަމަށާއި، އަދި ވެރިކަމުގައި އެޕާޓީގެ ބަހެއް ކިޔެންވެސް އޭނަ ނޭދޭ ކަމުގައެވެ. އަދި އޭނާ އިތުރަށް ވިދާޅުވީ މިރާއްޖޭގެ އެއްދުވަހުން އަނެއް ދުވަހަކަށް ތާލިބާނުންގެ ސިފަ ދަނީ ބޮޑުވަމުން ކަމަށާއި، މިރާއްޖެ ނެތިދިއުން ގުޅިފައި އޮތީ އެކަމާ ކަމުގައެވެ.

ޢަދާލަތު ޕާޓީގެ ވެރިކަމަކަށް ތާއީދެއް ނުކުރެވޭ. ވެރިކަމުގައި އެޕާޓީގެ ބަހެއް ކިޔެންވެސް ނޭދެން.

އެއްދުވަހުން އަނެއްދުވަހަށް ޠާލިބާނުންގެ ސިފަ މިރާއްޖޭގައިވަނީ ބޮޑު.

މިރާއްޖެ ނެތި ދިއުން ގުޅިފައި އޮތީ މިކަމާ.

— Maverick Ibra (@ibramandhu) July 4, 2023

ރާއްޖޭގެ ވެރިަކމުގެ ނިޒާމުގައި އަދާލަތު ޕާޓީގެ ބަހެއްވެސް އޮންނަން ބޭނުން ނުވާކަމުގައި އިބުރާ ވިދާޅުވެފައިވާއިރު، އަދާލަތު ޕާޓީއަކީ ރައީސް ސާލިހުގެ ސަރުކާރުގެ ކޯލިޝަން ބައިވެރިއެެކެވެ. އަދި އެޕާޓީގެ އިސްވެރިން ރައީސް ސާލިހުގެ ސަރުކާރުގެ އިސް މަގާމްތަކުގައި ތިބިއިރު، އެޕާޓީންވަނީ ކުރިޔަށް އޮތް ރިޔާސީ އިންތިޚާބުގައިވެސް ރައީސް ސާލިހަށް ތާއީދުކުރުމަށް ނިންމާފައެވެ.

އިބުރާ ފާހަގަ ކުރެވިފައިވަނީ އަބަދުވެސް އަދާލަތު ޕާޓީއަށް ފާޑު ވިދާޅުވާ އަދި އެޕާޓީއާއި ވަރަށް ދެކޮޅު ބޭފުޅެއްގެ ގޮތުގައެވެ.