މާލޭ ރައްޔިތުންނަށް ޚާއްސަކޮށްގެން ސަރުކާރުން ދޭން ނިންމި ގޯތި ލިސްޓަށް މިހާތަނަށް ހުށަހެޅި ޝަކުވާތަކާއި އޮތް ކަންބޮޑުވުންތަކަށް ބަލާއިރު، މަދު ޝަކުވާތަކެއް ލިބެމުންދާކަމީ ލިސްޓުގެ މަސައްކަތް އިންސާފުން ކުރެވިފައިވާކަމުގެ ހެއްކެއް ކަމުގައި ޔޫތު މިނިސްޓަރ އަހުމަދު މަޚުލޫފް ވިދާޅުވެއްޖެއެވެ.
މަޚުލޫފް މިހެން ވިދާޅުވީ ލިސްޓާއިމެދު ޝަކުވާ ކުރަމުންދާ ފަރާތްތަކުން ކުރާ ޝަކުވާތަކަށްވެސް ޖަވާބެއް ދިނުމުގެ ގޮތުން ކަމަށް ބެލެވެއެވެ. މަޚުލޫފް ވިދާޅުވީ 1،000 މީހުންނަށް ވުރެ ގިނަ މީހުންނަށް ގޯތިލިބޭކަން ހާމަކޮށް ޢާންމުކުރި ލިސްޓަށް މަދު ޝަކުވާތަކެއް ހުށަހެޅުމަކީ ލިބޭ ބޮޑު ކުރިއެރުމެއް ކަމަށެވެ. މިނިސްޓަރ މަހުލޫފް ވިދާޅުވާ ގޮތުން ލިސްޓަށް އޮތީ 20 ޝަކުވާއެވެ.
10000 އަށްވުރެ ގިނަމީހުންނަށް ގޯތި ދޫކޮށް ވަގުތީ ލިސްޓެއް އާއްމުކުރުމުން، މިދިޔަ ދެތިންދުވަހު ތެރޭގައި ޝަކުވާގޮތުގައި ނޫނީ ކަންބޮޑުވުންތަކެއް ގޮތުގައި މިފެނުނީ 20 ވަރަކަށް ކަންތައް. ވަގުތީ ލިސްޓަކީ ގޯހެއް އޮތްނަމަ ޝަކުވާ ހުށައަަޅާ އެކަމެެއް އިސްލާހުކުރަންދޭ ފުރުސަތެއްކަމުން، މިވަރުގެ ބޮޑު ލިސްޓަކުން މިހާމަދު ކަންކަން ފާހަގަކުރެވޭކަމީ ވަރަށް ރަނގަޅު މަސައްކަތެއް ކުރެވިފައިވާ ކަމުގެ ހެއްކެއް.
– މަޚުލޫފް ވިދާޅުވިއެވެ.
ގޯތި ދިނުމުގައި ސަރުކާރުން ވަކި ޕާޓީއެއްގެ ކުލަޔަކަށް، މީހާގެ ފިކުރަކަށް ވިސްނުމަކަށް ނުބަލައި ގޯތި ހައްގުވާ ކޮންމެ މީހަކަށް ދޭން ނިންމި ނިންމުމަކީ މިކަން އިންސާފުން ކޮށްފައިވާކަން ހާމަވާ ކަމެއްކަމަށް މަޚުލޫފް ވިދާޅުވިއެވެ.
ވަކި ޕާޓީއެއް ވަކި އާއިލާއެއް ތަފާތުނުކޮށް ޝަރުތުހަމަވި ހުރިހާ ފަރާތްތަކަށް ހަމަހަމަކަމާއި އިންސާފުން ގޯތި ދީފައިވާކަން އެއީ ބަދަލުނުކުރެވޭނެ ހަގީގަތެއް.
– މަޚުލޫފް ވިދާޅުވިއެވެ.
މާލެ ސަރަހައްދުން ގޯތި ލިބޭ މީހުންގެ ވަގުތީ ލިސްޓާއި ގުޅިގެން ބައެއް ފަރާތްތަކުން ފާހަގަކުރަމުންދާ މައްސަލަތައް ބަލައި، ގޯތި ލިބޭ މީހުންގެ ދާއިމީ ލިސްޓުގައި އެމައްސަލަތައް ޙައްލުކުރައްވާނެކަމަށް ސަރުކާރުން ވަނީ ބުނެފައެވެ.
ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ކުރިއަށްދިޔަ ބިންވެރިޔާ ޕްރޮގްރާމްގެ ދަށުން ގޯތި ލިބޭ މީހުންގެ ލިސްޓު ޢާއްމުކުރައްވާފައިވަނީ މިދިޔަ ހޯމަ ދުވަހުގައެވެ. މާލެ ސަރަހައްދުން ގޯތި ލިބޭ މީހުންގެ ވަގުތީ ލިސްޓު އާއްމުކޮށްފައިވާއިރު އެ ލިސްޓަށް ޝަކުވާ ހުށަހަޅަން އަންނަމަހުގެ 15 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.
މި ލިސްޓު ހާމަކުރުމާއެކު ލިސްޓުގައި ހުރި ބައެއް މައްސަލަތައް ޢާއްމުން ދަނީ ފާހަގަކުރަމުންނެވެ. އެގޮތުން ދިވެހިންނާއި ކައިވެނިކޮށްގެން، ދިވެހި ރައްޔިތުކަން ލިބޭ ބިދޭސީންވެސް ގޯތި ލިބޭ މީހުންގެ ލިސްޓުގައި ހުރުމާއި، އެއްގޯއްޗަށްވުރެ ގިނަ ގޯތި ރާއްޖޭގެ އެކި ސަރަޙައްދުތަކުގައި އެމީހެއްގެ ނަމުގައި ހުރި ފަރާތްތަކަށް ގޯތި ލިބިފައިވާ މައްސަލަވެސް ބައެއް ފަރާތްތަކުން ފާހަގަކުރެއެވެ.
ގޯތި ލިބޭ ފަރާތްތަކުގެ ވަގުތީ ލިސްޓުގައި ޝަރުތު ހަމަވާ 19857 އެބަ ތިއްބެވެ. އޭގެތެރެއިން 10314 މީހަކަށް ގޯތިލިބޭކަމަށް ކޮމިޓީން ވަނީ ކަނޑައަޅާފައެވެ. އަދި ޝަރުތު ހަމަވާ އެހެން މީހުންނަށް ގޯތި ދިނުމަށް ސަރުކާރުން ވަނީ ނިންމާފައެވެ. މިފަރާތްތަކަށް ގޯތި ދޫކުރުމަށް ހަމަޖެހިފައިވަނީ ހުޅުމާލެއާއި ގުޅީފަޅާއި، ގިރާވަރު ފަޅު ހިއްކައިގެންނެވެ.
