ދައުރުން ބޭރުން ރައްޔިތުންގެ މަޖިލީހުގެ ޖަލްސާއެއް ބޭއްވުމަށް މަޖިލީހުގެ މެޖޯރިޓީ ޕާޓީން ހުށަހަޅައިފިއެވެ.
މަޖިލީހުގެ ޤަވާއިދު ބުނާގޮތުން ދައުރުން ބޭރުގައި ޖަލްސާއެއް ބާއްވަން ހުށަހެޅުމުން 14 ދުވަސްކުރިން ޖަލްސާ ބާއްވަންޖެހެއެވެ. މަޖިލީހުގެ އެމްޑީޕީ ޕީޖީ ގްރޫޕްގެ ތަރުޖަމާން ވިދާޅުވީ މަޖިލީހުގައި ހުރި މުހިންމު މަސައްކަތްތައް ނިންމުމަށް ދައުރުން ބޭރުން ޖަލްސާއެއް ބޭއްވުމަށް އެމްޑީޕީގެ ޕީޖީ ގްރޫޕުން ހުށަހަޅާފައިވާކަމަށެވެ.
މަޖިލީހުގެ ގަވާއިދު ބުނާގޮތުން ދައުރުން ބޭރު ޖަލްސާއެއް ހުށަހެޅުމަށް މަޖިލީހުގެ 3 ބައި ކޮށްފަ 1ބައި މެމްބަރުންގެ ސޮޔާއިއެކު މަޖިލީހަށް ހުށަހެޅުމުން އެޖަލްސާ 14 ދުވަސްތެރޭގައި ބާއްވަން ޖެހެއެވެ. 14 ދުވަސް ގުނާނީ ބަންދު ދުވަސްތައްވެސް ހިމަނައިގެންނެވެ.
ޝަފީގު ވިދާޅުވީ މަޖިލީހުގެ ޖަލްސާތައް ކުރިއަށް ގެންދިއުމަށް ސީދާ ހުރަސް އަޅުއްވައި ގޮތްދޫ ނުކުރަނީ މަޖިލިސް ރައީސް މުހައްމަދު ނަޝީދު ކަމަށެވެ. މިއަދުވެސް މަޖިލިސްގައި ހުރި އިތުބާރު ނެތް މައްސަލަތަކާއި، އެނޫންވެސް މައްސަލަތައް އެޖެންޑާ ނުކުރައްވާ ސަބަބާއި ގުޅޭގޮތުން ސުވާލު ކުރެއްވުމުންވެސް މަޖިލިސް ރައީސް ޖަވާބެއް ދެއްވާފައި ނުވާކަމަށެވެ.
އޭނާ ވިދާޅުވީ މަޖިލިސް ހުއްޓުވާފައިވާ އޮތް އޮތުމަކީ އެމްޑީޕީގެ ބޮޑު ކަންބޮޑުވުމެއްކަމަށެވެ. ރައްޔިތުންގެ މަޖިލީހުގެ ޖަލްސާތައް ނުބޭއްވި އޮތުމަށްފަހު ބޭއްވި މިއަދުގެ ޖަލްސާއަށް އެޖެންޑާކޮށްފައިއޮތީ މަޖިލީހުގެ ކޮމިޓީތައް އެކުލަވާލުމުގެ މަސައްކަތްކުރުމަށް ބަހުސްކުރުމެވެ. ނަމަވެސް ކޮމިޓީތަކުގައި ސިޔާސީ ޕާޓީތަކާއި، ވަކި ޕާޓީއަށް ނިސްބަތްވެވަޑައިނުގަންނަވާ މެންބަރުން ތަމްސީލްކުރައްވާނެ ގޮތެއް ނިންމެވުން އޮންނާނީ ދެން އޮންނަ މަޖިލީހުގެ ޖަލްސާއެއްގައިކަމަށް މަޖިލީހުގެ އެޖެންޑާގައި އޮތީ ކަނޑައަޅަފައެވެ.
މިކަމާއި ގުޅިގެން މިއަދުގެ ޖަލްސާގައި އެމްޑީޕީގެ ޕާލިމަންޓްރީ ގްރޫޕްގެ ލީޑަރު އަދި މެޖޯރިޓީ ލީޑަރު މުޙައްމަދު އަސްލަމް ވިދާޅުވީ، މަޖިލީހުގައި އެޖެންޑާކޮށް ބަހުސްކުރެވޭ މަސައްކަތެއް ނިމިއްޖެނަމަ ވޯޓަށް އަހަން ވާނެކަމަށް މަޖިލީހުގެ ޤަވާއިދު ބަޔާންކުރާކަމަށެވެ. އަސްލަމް ވަނީ ކޮމިޓީތައް އެކުލަވާލުމަށް ވޯޓަށް ނާހައި މަޖިލިސް ޗުއްޓީއަށް ދިއުމަކީ ކަންބޮޑުވުމެއްގެ ގޮތުގައި ފާހަގަކުރައްވާފައެވެ.
އިތުރު ޖަލްސާއެއް ބާއްވައިގެން މަޖިލީހުގައި ހުރި މުހިންމު މަސައްކަތްތައް ކުރިއަށް ގެންދިއުމަށް އަސްލަމް ހުށައެޅުއްވި ނަމަވެސް އިތުރު ޖަލްސާއެއް ބޭއްވުމަށް ރިޔާސަތުން ނުނިންމަވައެވެ. މަޖިލިސް ޗުއްޓީއަށް ދިޔަނަމަވެސް، ދައުރުން ބޭރުން ޖަލްސާ ބޭއްވުމަށް އެދުމަށް މަޖިލީހުގެ ޤަވާއިދު ހުރަހެއްނެތެވެ.
