ކޮންމެ ކަމެއްގައިވެސް ކާމިޔާބީއާއި ހަމައަށް ވާސިލްވެވޭނީ އެކަމެއް ދެމެހެއްޓެވި ގޮތެއްގައި ދިގު މުއްދަތަކަށްކޮށް ސާބިތުވެ ހުރެގެން ކަމުގައި ހޯމް މިނިސްޓަރ އަދި އަދާލަތު ޕާޓީގެ ރައީސް އިމްރާން ވިދާޅުވެއްޖެއެވެ.
ރިޔާސީ އިންތިޚާބުގައި ރައީސް ޞާލިހަށް ތާއީދުކޮށް ރައީސް ޞާލިހު ދެވަނަ ދައުރަކަށް އިންތިޚާބު ކުރުމަށް މަސައްކަތް ކުރުމަށް އިމްރާންގެ އަދާލު ޕާޓީން ވަނީ ނިންމާފައެވެ. އެޕާޓީން ދަނީ ރިޔާސީ އިންތިޚާބަށް ތައްޔާރުވުމުގެ ގޮތުން ކެމްޕެއިން ހަރަކާތްތައް ކުރިއަށް ގެންދާނެ ގޮތަކާއި ގުޅޭގޮތުންނާއި ރިޔާސީ އިންތިޚާބުގެ ކެމްޕެއިންގައި ޢަދާލަތު ޕާޓީއިން ޙަރަކާތްތެރިވާނެ ޓީމްތައް ތައްޔާރުކުރުމަށް ބޭނުންވާ ޓްރެއިނިންތައްވެސް ފަށާފައެވެ.
އިމްރާން މިއަދު ވިދާޅުވީ ކޮންމެ ކަމެއްގައިވެސް ކާމިޔާބީ ލިބޭނީ އެކަމެއްގައި ސާބިތުވެ ދެމިހުރެ، ދެމެހެއްޓެނިވި ގޮތެއްގައި ކުރެވޭ ބުރަ މަސައްކަތުންކަމަށެވެ.
ކާމިޔާބަކީ ހަމަ ކުއްލިއަކަށް ލިބޭ އެއްޗެއް ނޫނެވެ. ކާމިޔާބަކީ ދެމެހެއްޓެނިވި ގޮތެއްގައި ދިގު މުއްދަތަކަށް ކުރެވޭ ބުރަ މަސައްކަތުގެ ނަތީޖާއެވެ.
– އިމްރާން ވިދާޅުވިއެވެ.
ރިޔާސީ އިންތިހާބަށް ތައްޔާރުވުމުގެ ގޮތުން އިމްރާން، އަދާލަތު ޕާޓީގެ ބައެއް މެމްބަރުންނާ ބައްދަލު ކުރެއްވުމަށް މީގެ ދެރޭ ކުރިން ބޭއްވި ޖަލްސާއެއްގައި ވާހަކަ ދައްކަވަމުން އިމްރާން ވިދާޅުވީ، ވޭތުވެދިޔަ ފަންސަވީހަކަށް އަހަރު ދުވަހުގެ ތެރެއިން އަށާރަ އަހަރުގެ ތެރޭގައި ރާއްޖެއަށް އައިސްފައިވާ މުހިންމު ބަދަލުތައް ގެނައުމުގައި އަދާލަތު ޕާޓީގެ ދައުރަކީ ވަރަށް މުހިންމު ދައުރެއް ކަމަށެވެ.
އިމްރާން ވިދާޅުވީ، ފާއިތުވި ތިން ރިޔާސީ އިންތިހާބުގައި ވެސް އެ ޕާޓީގެ ވިސްނުން ބައްޓަންކުރަމުން އައީ، އެޕާޓީގެ އަމާޒާ ހަމައަށް އައުމަށްޓަކައި ކަމަށާއި، އެ ވަގުތަކަށް އަދާކުރެވޭން އޮތް ދައުރު އެންމެ ފުޅާކޮށް އަދާކޮށްގެން ކަމަށެވެ.
އިމްރާން ވިދާޅުވީ، ދުނިޔޭގެ ސިޔާސީ ހަރަކާތްތަކާއި ސިޔާސީ ޕާޓީތައް މަސައްކަތް ކުރާ ގޮތާއި، ކުރިއަރާ ގޮތާއި، އެޕާޓީތަކުގެ ވިސްނުން ބައްޓަން ކުރަމުންދާ ގޮތާއި، ދަރުސްތަކުން އިބުރަތް ލިބިގަނެގެން އޭގެ މައްޗަށް މަސައްކަތް ބައްޓަން ކުރަންޖެހިފައިވާ ކަމަށެވެ.
