މަސްތުވާ ތަކެތީގެ މައްސަލައެއްގެ ތުހުމަތުގައި، އިންތިގާލީ އިންސާފު އޮފީހުގެ މުވައްޒިފަކު ހައްރުކޮށްފިއެވެ. އޭނާ ހައްޔަރު ކުރުމަށްފަހު ކޯޓަށް ގެންދިއުމުން ކުރިމިނަލް ކޯޓުންވަނީ6 ދުވަހަށް އޭނާ ބަންދުގައި ބެހެއްޓުމަށް އަމުރު ކޮށްފައެވެ.

"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި މިމައްސަލާގައި ހައްޔަރު ކޮށްފައިވާ އެއޮފީހުގެ މުވައްޒިފަކީ އިންވެސްޓިގޭޓަރެއްގެ މަގާމުގައި ހުރި މުހައްމަދު އިބުރާހިމްއެވެ.

އޭނާ ހައްޔަރު ކުރުމަށްފަހު އެކަށީގެންވާ މިންވަރަށް ހެކި ހުށަހަޅާފައިވާއިރު، އޭނާގެ މައްޗަށް ކޮށްފައިވަނީ މަސްތުވާތަކެތި ބޭނުން ކުރުމުގެ ތުހުމަތެވެ.

ކޯޓުން މުހައްމަދު އިބުރާހިމް ބަންދުގައި ބެހެއްޓުމަށް ކުރި އަމުރުގައި ވާގޮތުން، އޭނާއަކީ މީގެ ކުރިންވެސް ކުށުގެ ރެކޯޑު އޮންނަ މީހެއްކަން ފާހަގަ ކޮށްފައި ވެއެވެ. މީގެ އިތުރުން އޭނާގެ އަތުން ފެނުނު މަސްތުވާތަކެތި ތަހުލީލު ކުރި އެއީ މަސްތުވާ ބާ ވަތެއް ކަމުގައިވާ އޯޕީއައި އަދި ބެންޒޯކަމަށް ފުލުހުން ބުނެފައިވެއެވެ. މުހައްމަދު އިބުރާހިމް ވަނީ މި ދެބާވަތަށް ޕޮޒިޓިވްވެސް ވެފައެވެ.

2020 ވަނަ އަހަރުގެ ޑިސެމްބަރުގައި އުފެއްދި އިންތިގާލީ އިންސާފު އޮފީހުގެ މަސައްކަތަކީ ރައީސް މުހައްމަދު އަމީންގެ ވެރިކަމުން ފެށިގެން ރައީސް އަބްދުﷲ ޔާމީންގެ ވެރިކަމާ ހަމައަށް ނިޒާމީ ގޮތެއްގައި ރޭވިގެން ދައުލަތުގެ އިދާރާއަކުން ނުވަތަ އެތަނުގެ ވެރިޔަކު މީހެއްގެ އިންސާނީ ހައްގަކަށް އަރައިގެންފައިވާނަމަ، އެ މައްސަލައެއް ބަލައި އިންސާފު ހޯދައި ދިނުމެވެ.