ރައްޔިތުންގެ މަޖިލީހުގެ ދާއިމީ ކޮމެޓީތަކުގެ މަސައްކަތްތައް ނުހުއްޓުވޭނެ ކަމަށާއި، އަންނަ ހަފްތާގެ ހޯމަ ދުވަހުން ފެށިގެން ރައްޔިތުންގެ މަޖިލީހުގެ މިނިވަން މުވައްސަސާކޮމެޓީގެ ބައްދަލުވުންތައް ފަށާނެކަމަށް އެކޮމެޓީގެ މުޤައްރިރު ރޮޒޭނާ އާދަމް ވިދާޅުވެއްޖެއެވެ.

ރައްޔިތުންގެ މަޖިލީހުގައި ހިމެނޭ އެމްޑީޕީގެ 12 މެމްބަރަކު އެޕާޓީން ވަކިވުމާއި ގުޅިގެންނާއި، މިނިވަން މެމްބަރެއްގެ ގޮތުގައި އިންނެވި ނިލަންދޫ ދާއިރާގެ މެމްބަރު އަބްދުލް މުހުސިން ހަމީދު އެމްޑީޕީއާއި ގުޅުމުން މަޖިލީހުގެ ދާއިމީ ކޮމެޓީތަކުގެ ކޮމްޕްޒިޝަން އެކުލަވާ ނުލެވި މަޖިލީހުގެ ކޮމެޓީތައް ވަނީ ހުއްޓިފައެވެ. މަޖިލީހުގެ މިދައުރު ފެށުނު ފަހުން މިހާތަނަށް އެއްވެސް ކޮމެޓީ ބައްދަލުވުމެއް ބާއްވާފައި ނުވެއެވެ.

ކޮމެޓީތައް ހުއްޓިފައިވާތީ ކަންބޮޑުވުން ފާޅު ކުރައްވާ މިނިވަން މުވައްސަސާ ތަކާއި ބެހޭ ކޮމެޓީގެ މުޤައްރިރު ރޮޒޭނާ އާދަމް ރޭ ދައުލަތުގެ މީޑިއާގައި ވާހަކަ ދައްކަވަމުން ވިދާޅުވީ މަޖިލީހުގެ ދާއިމީ ކޮމެޓީތަކުގެ މަސައްކަތް މަޖިލީހުގެ ރައީސަކަށް ނުހުއްޓުވޭނެ ކަމަށެވެ. މިނިވަން މުވައްސަސާތަކުގެ ކޮމެޓީގައި މިހާރުވެސް އިލެކްޝަންސް ކޮމިޝަނަށް ބޭފުޅަކު އައްޔަން ކުރުމުގެ މަސައްކަތް އޮތްއިރު އެމަސައްކަތްވެސް ނުކުރެވޭ ގޮތަށް އަދި ކޮމެޓީގައި ހުރި އެހެން މަސައްކަތްވެސް ނުކުރެވޭ ގޮތަށް ކޮމެޓީތައް ނުހުއްޓުވޭނެކަމަށް ރޮޒޭނާ ވިދާޅުވިއެވެ.

އަޅުގަނޑުމެން ހޯމަ ދުވަހު ކޮމެޓީ ބާއްވާނަން. ރިޔާސީ އިންތިޚާބުގެ ކުރިއަށް މިއޮތީ، އިލެކްޝަންސް ކޮމިޝަންގެ މެމްބަރެއްގެ ދައުރު ހަމަވާތީ އެމަޤާމަށް މީހަކު އައްޔަން ކުރަން އެބަޖެހޭ އަޅުގަނޑުމެންގެ ކޮމެޓީގައި އެކަން އޮތީ. އެކަން ކުރުމަށްޓަކައި އަޅުގަނޑުމެން ހޯމަ ދުވަހު ކޮމެޓީ ބާއްވާނަން.

– ރޮޒޭނާ ވިދާޅުވިއެވެ.

އޭނާ ވިދާޅުވީ މަޖިލީހުގައި ހިމެނޭ ބައެއް މެމްބަރުން ޕާޓީ ބަދަލު ކުރި ނަމަވެސް އެކޮމެޓީގައި ހިމެނޭ އެއްވެސް މެމްބަރަކު ޕާޓީ ބަދަލުކޮށްފައި ނުވުމުން ކޮމެޓީ ކުރިއަށް ގެންދެވޭނެ ކަމަށެވެ. މަޖިލީހުގެ މެޖޯރިޓީ ލީޑަރު މުހައްމަދު އަސްލަމް އިއްޔެ މަޖިލީހުގައި ބޭއްވި ނޫސްވެެރިންގެ ބައްދަލުވުމުގައި ވިދާޅުވީ ރައްޔިތުންގެ މަޖިލީހުގެ ދާއިމީ ކޮމިޓީތަކުގެ މަސައްކަތް ހުއްޓުވޭނެ ހާލަތެއް ނެތްކަމަށާއި، ކޮމިޓީތަކުގެ މަސައްކަތް ފަށައި، މަޖިލީހުގެ ނާއިބު ރައީސް އީވާގެ އިތުބާރު ނެތްކަމުގެ މައްސަލަ ކުރިއަށް ގެންދަންޖެހޭކަމަށެވެ.

ނޫސްވެރިންނަށް މައުލޫމާތު ދެއްވަމުން އެމްޑީޕީގެ ޕީޖީ ލީޑަރު އަސްލަމް ވިދާޅުވީ މަޖިލީހުގެ ދާއިމީ ކޮމިޓީތަކަކީ އަބަދުވެސް ދެމި އޮންނަ ކޮމެޓީތަކެއްކަން މަޖިލީހުގެ ގަވާއިދުގެ 106 ވަނަ މާއްދާގައި ބަޔާންކޮށްފައިވާކަމަށެވެ.