ރައްޔިތުންގެ މަޖިލީހުގެ ބޮޑު ޢައުލަބިއްޔަތަކުން މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައިވާއިރު، ދެން އިތުރަށް މަޖިލީހުގެ ރިޔާސަތުގައި މަޖިލީހުގެ ރައީސް މުހައްމަދު ނަޝީދު އިންނަވައިގެން ނުވާނެކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޤާމުން ވަކި ކުރެއްވުމަށް 54 މެމްބަރުންގެ ސޮޔާއެކު ރައްޔިތުންގެ މަޖިލީހަށް އިއްޔެ ވަނީ ހުށަހަޅާފައެވެ. މީގެ ތެރޭގައި ހިމެނެނީ އެމްޑީޕީގެ 50 މެމްބަރަކާއި، މިނިވަން ތިން މެމްބަރުންގެ އިތުރުން އެމްޑީއޭގެ ލީޑަރު އަހުމަދު ސިޔާމް މުހައްމަދެވެ. މަޖިލިސް ރައީސްގެ އިތުރުބާރު ނެތް މައްސަލަ މަޖިލީހަށް ހުށަހެޅީ އެމްޑީޕީގެ ޕީޖީ ގްރޫޕުގެ އިސްނެންގެވުމުގެ މަތީންނެވެ.
ދައުލަތުގެ މީޑިއާގައި ރޭ ވާހަކަ ދައްކަވަމުން އަސްލަމް ވިދާޅުވީ ރައްޔިތުންގެ މަޖިލީހުގެ މެމްބަރުންގެ ސާފު ޢައުލަބިއްޔަތުން ނަޝީދު ރިޔާސަތުގައި ބޭންދުމާއި ދެކޮޅު ހައްދަވާއިރު މަޖިލީހުގެ ރިޔާސަތުގައި ނަޝީދު އިންނެވުމަކީ ރަނގަޅު ގޮތެއް ނޫންކަމަށެވެ.
އަޅުގަނޑު ގަބޫލުކުރާ ގޮތުން މި އަންނަ ހޯމަ ދުވަހު މިހާރު މަޖިލީހުގެ ރައީސް، ރައީސް މުހައްމަދު ނަޝީދުގެ އިތުބާރު ނެތްކަމަށް މިހާރު އެ ވަނީ ހުށަހެޅިފައި. އެހެންވީމާ ރައީސް މުހައްމަދު ނަޝީދު އިންނަވައިގެން ނުވާނެ މަޖިލީހުގެ ރިޔާސަތުގައި.
– އަސްލަމް ވިދާޅުވިއެވެ.
އަސްލަމް ވިދާޅުވީ މަޖިލީހުގެ ރައީސްގެ އިތުރުން މަޖިލީހުގެ ނައިބް ރައީސް އީވާގެ އިތުބާރު ނެތްކަމަށްވެސް އޮތީ ހުށަހެޅިފަ ކަމަށެވެ. މިހާލަތުގައި ދެބޭފުޅުންވެސް ދެން އިތުރަށް މަޖިލިސް ރިޔާސަތަށް އަރައި ވަޑައިގެންނެވުމަކީ ޑިމޮކްރަސީއާއި ބީރައްޓިހި ކަމެއްކަމަށެވެ.
ބޭފުޅެއްގެ އިތުބާރު ނެތްކަމަށް އެހާ ބޮޑު އަޣުލަބިއްޔަތަކުން ހުށަހެޅުނީމަ ދެން އަސްލުގައި އިތުބާރު ނެތް. އެހެންވީމާ އިތުބާރު ނެތި މަޖިލީހުގެ ރިޔާސަތު ބެލެހެއްޓެވުމަކީ އެންމެ އެކަށީގެންވާ ގޮތެއްވެސް ނޫން.
– އަސްލަމް ވިދާޅުވިއެވެ.
ރައްޔިތުންގެ މަޖިލީހުގެ ރައީސާއި ނައިބް ރައީސްގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައިވާއިރު، މިއީ މަޖިލީހުގެ ތާރީހުގައިވެސް މަޖިލީހުގެ ރައީސާއި ނައިބް ރައީސްގެ އިތުބާރު ނެތް މައްސަލައެއް ހުށަހެޅުނު ފުރަތަމަ ފަހަރެވެ. މިހާލަތުގައި މަޖިލީހުގެ ރިޔަސަތު ބަލަހައްޓަވާނީ ކޮން ބޭފުޅެއް ކަމެއް މަޖިލީހުގެ ގަވާއިދުގައި ބަޔާންކޮށްފައި ނެތެވެ.
މަޖިލީހުގެ ރައީސާއި، ނައިބް ރައީސްގެ އިތުބާރު ނެތް މައްސަލައިގެ ތެރެއިން މަޖިލިސް ނައިބް ރައީސް އީވާގެ މައްސަލަ އަންނަ އާދީއްތަ ދުވަހަށް އެޖެންޑާ ކުރެވުނު ނަމަވެސް، މަޖިލިސް ރިޔާސަތުން ޖަލްސާ ބާއްވަން ނިންމެވީ ހޯމަ ދުވަހުއެވެ. ބެލެވޭ ގޮތުގައި މިމައްސަލަވެސް މަޖިލީހުގައި ކުރިއަށްދާނެ ކަމަށް ނުބެލެއެވެ. މިމަހު އީދު ބަންދަށް ސަރުކާރު ބަންދުވާ ދުވަހުން ފެށިގެން މަޖިލިސްވެސް މިދައުރަށް ޗުއްޓީއަށް ދާނެއެވެ.
މިކަންކަން މިހެން ހުރުމުން މަޖިލީހުގެ މިދައުރުގައި މަޖިލީހުގެ ރައީސާއި، ނައިބް ރައީސްގެ އިތުބާރު ނެތް މައްސަލަ މަޖިލީހުގައި ކުރިއަށް ދިއުމަކީ ފަސޭހަ ކަމެއްކަމަށް ނުބެލެއެެވެ. މިހާތަނަށް މަޖިލީހުގައި ބަންޑާރަ ނައިބްގެ އިތުބާރު ނެތްމައްސަލަ ގޮސްފައި އޮތް ގޮތަށްބަލާއިރު މިމައްސަލަތައްވެސް އެމަގުން ދިއުމުގެ ފުރުސަތު ބޮޑެވެ.
