އެމްޑީޕީގެ ރައީސް މުހައްމަދު ނަޝީދު އިސްވެ އުފައްދަވާ ދަ ޑިމޮކްރޭޓްސް ޕާޓީ ރަޖިސްޓްރީ ކުރުމަށް އިލެކްޝަންސް ކޮމިޝަނަށް ހުށަހަޅާފައިވާ ލިސްޓު ކޮމިޝަންގެ ވެބްސައިޓުގައި އާންމު ކުރުމުގެ ކުރިން ސިޔާސީ ފަރާތްތަކަށް ކޮމިޝަނުން ލިސްޓު ލީކް ކޮށްފައިވާކަމުގެ ތުހުމަތު ދަ ޑިމޮކްރޭޓްސް ޕާޓީން ކޮށްފިއެވެ.
އެޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި އެޕާޓީ އުފެއްދުމުގައި އިސްކޮށް އުޅުއްވާ އެމްޑީޕީގެ ކުރީގެ ނާއިބު ރައީސް މުހައްމަދު ޝިފާޒްއައި ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވީ ސިޔާސީ ފަރާތްތަކުން އެލިސްޓު ހޯދާފައިވަނީ އެ ޕާޓީ ރަޖިސްޓްރީ ވިޔަނުދޭން، ނުފޫޒު ފޯރުވުމުގެ ބޭނުމުގައި ކަމުގައެވެ.
އެހެންނަމަވެސް އިލެކްޝަންސް ކޮމިޝަންގެ ވެބަސައިޓަށް އެ އާންމު ވުމުގެ ކުރީގައި އާންމު މެމްބަރުންގެ އަތުގައި އެލިސްޓު އޮތުން، އެއީ އިންތިހާއަށް އަޅުގަޑުމެން ކަންބޮޑުވާކަމެއް. އަދި އެއީ އަޅުގަޑުމެން ކުށްވެރި ކުރާކަމެއް. މިކަން މިމަގުން މި ހިނގީ ކިއްވެގެންތޯ ބެލުމަށްޓަކާ މިހަރުވަނީ އަޅުގަޑުމެން އިލެކްޝަންސް ކޮމިޝަނަށް އެކަން ބަލާ ދިނުމަށް އެދި ހުށަހަޅާފަ. އަދި ހަމަ އެއާއެކީގައި އެކަން ތަހުގީގު ކޮށްދިނުމަށް މޯލްޑިވްސް ޕޮލިސް ސާވިސްއަށްވެސް އަޅުގަޑުމެން ވާނީ މިއަދު ހުށަހަޅާފަ.
ދަ ޑިމޮކްރޭޓްސް ޕާޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝިފާޒު ވިދާޅުވެފައި ވެއެވެ.
އޭނާ ވިދާޅުވީ ލިބިފައިވާ މައުލޫމާތުތަކަށް ބަލާއިރު، ލިސްޓު ހޯދުމަށްފަހު ސަރުކާރުގެ އިސްފަރާތްތަކުން އެޕާޓީ ރަޖިސްޓްރީވިޔަ ނުދިނުމަށް އިންތިޒާމްވެގެން މަސައްކަތް ކުރަމުން ދާކަމުގައެވެ. އޭނާ ވިދާޅުވީ އެކަން ސާފުވާ އެއްސަބަބަކީ އެޕާޓީ ރަޖިސްޓްރީ ކުރުމަށް އިލެކްޝަންސް ކޮމިޝަނަށް ހުށަހެޅި ލިސްޓު ކޮމިޝަންގެ ވެބްސައިޓުގައި އާންމު ކުރުމުގެ ކުރިން، ސަރުކާރުގެ އިސް އޮފިޝަލުން ފެށިގެން ސިޔާސީ ވަޒީފާތަކުގައި ތިބި އެންމެ އާދައިގެން މުވައްޒަފުންވެސް އެ ލިސްޓު ގެންގުޅެމުން ދާތީ ކަމުގައެވެ.
އޭނާ އިތުރަށް ވިދާޅުވީ، ކޮމިޝަނަށް ލިސްޓު ހުށަހެޅިއިރު އެގެން ނެތް މައުލޫމާތު އާންމުވެފައިވާ ލިސްޓުގައި ހިމެނޭ ކަމަށެވެ. އޭގެ ތެރޭގައި އެޕާޓީއަށް ސޮއިކޮށްފައިވާ މެމްބަރުން ތިބި ސިޔާސީ ޕާޓީތައްވެސް އެގެން ހުރި ކަމަށާއި، އެހެންކަމުން އެއީ އިލެކްޝަންސް ކޮމިޝަނުން ފޯރުކޮށްދީގެން އުޅޭ މައުލޫމާތުތަކެެއްކަން އެގޭކަމަށްވެސް އޭނާ ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި ދަ ޑިމޮކްރޭޓްސް ޕާޓިން ބުނެފައިވަނީ ސަރުކާރުގެ ކުންފުނިތަކުގެ ތެރެއިން އެޕާޓީއަށް ވަންނަ މީހުންނަށް އެންމެ ބޮޑަށް ނުފޫޒު ފޯރުވަމުން ދަނީ ފެނަކަ ކޯޕަރޭޝަންއާއި އާރުޑީސީން ކަމުގައެވެ.
ކޮމެންޓު ފޮނުވާ