މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ބަޖެޓުން މުސާރައަށް ޚަރަދުކުރި 4 މިލިއަން ރުފިޔާގެ ތަފްސީލުތައް ހާމަކުރުމަށް، އެ ޕާޓީގެ ޗެއަރޕަރސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެމްބަރު މީކާއިލް އަޙްމަދު ނަސީމް ގޮވާލައްވައިފިއެވެ.
މީސްމީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި މީކާއިލް ވިދާޅުވީ، ޕާޓީގެ މާލީ ކަންކަން ހާމަކުރުމަށް ހަމައެކަނި އަހަރަކު އެއްފަހަރު ނެރޭ އޮޑިޓް ރިޕޯޓަކުން ނުފުދޭ ކަމަށެވެ. އޭގެ ބަދަލުގައި ޕާޓީއަށް ލިބޭ އާމްދަނީއާއި ކުރާ ޚަރަދުތަކުގެ އިތުރުން، ޕާޓީގެ ހަރުމުދަލުގެ މަޢުލޫމާތުތައް ވެސް އާންމު މެންބަރުންނަށް ވަރަށް ސާފުކޮށް އެނގެން ހުންނަންޖެހޭނެ ކަމަށް އޭނާ ފާހަގަކުރެއްވިއެވެ. މީގެ އިތުރުން، ޕާޓީ އެންމެ އެކަށީގެންވާ ގޮތެއްގައި ނުހިންގޭތީ ލީޑަރޝިޕް ބަދަލުކުރުމަށް އާންމު މެންބަރުން އެދެމުންދާ ކަމަށްވެސް މީކާއިލް ވިދާޅުވިއެވެ.
އެމްޑީޕީގެ އެތެރޭގެ އިންތިޚާބާ ގުޅިގެން ޕާޓީގެ އެތެރޭގެ ކޯޅުންތަކާއި ޚިޔާލުތަފާތުވުންތައް ވަނީ އަނެއްކާވެސް ވަރަށް ބޮޑަށް ހޫނުވެފައެވެ. މިގޮތުން، ޕާޓީގެ ގައުމީ މަޖިލީހުގެ މެންބަރުން ތިއްބަވާ ވަޓްސްއަޕް ގުރޫޕެއްގައި ކުރީގެ ރައީސް މުޙައްމަދު ނަޝީދަށް ތާއީދުކުރައްވާ ބައެއް މެންބަރުން ވަނީ، ޕާޓީގެ ވަގުތީ ޗެއަރޕަރސަންގެ މަޤާމުގައި ހުންނެވި 'ގަޕޯ' ގެ އިސްތިއުފާއަށްވެސް ގޮވާލައްވާފައެވެ. އަދި މި މައްސަލަތަކާ ގުޅިގެން މީސްމީޑިއާގެ އެކި މަންސަތަކުގައި ދެ ފެކްޝަނުގެ ދެމެދުގައި ދަނީ ހޫނު ބަހުގެ ހަމަލާތަކެއް ރައްދުކުރަމުންނެވެ.
ކޮމެންޓު ފޮނުވާ