އެމްޑީޕީގެ ރައީސް މުހައްމަދު ނަޝީދަކީ ރާއްޖޭގެ ވެރިކަން އެބޭފުޅާނޫން މީހަކު ކުރަން އެދޭނެ މީހެއް ނޫންކަމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

އެމްޑީޕީގެ ޕްރައިމަރީއަށްފަހު ޤާސިމާއި، ރައީސް ނަޝީދާއިއެކު ކުރެވެމުންދިޔަ މަޝްވަރާތަކާއި އަދި ޤާސިމް ވެރިކަމަށް ގެނައުމަށް ނަޝީދު ދެއްކެވި ދަޅަތަކާއި ގުޅޭގޮތުން މިއަދު ދެއްވި އިންޓަރވިއެއްގައި ޤާސިމް ވިދާޅުވީ ނަޝީދަކީ އޭނަ ނޫން މީހަކު ރާއްޖޭގެ ވެރިކަމަށް އައުމަށް އެދޭނެ މީހެއް ނޫންކަމަށެވެ.

ރައީސް ނަޝީދަށް އެމްޑީޕީގެ ޕްރައިމަރީން ނާކާމިޔާބުވި ހިސާބުން، މަޖިލީހުގައިވެސް އެކި ބޭފުޅުންގެ ކައިރީގައި ވެރިކަމަށް ގެންނަންވީ ޤާސިމްކަމަށް ވިދާޅުވިކަމަށެވެ. އަދި ސީދާ ނަޝީދު ބައްދަލުކޮށް ކަންކަން ކުރަންވީގޮތް ހިއްސާ ކުރެއްވިކަމަށެވެ. ނަމަވެސް އެކަމެއް ޤާސިމް ވިދާޅުވެ ވިދާޅުވީ، އެވަގުތު އެވަރަށް ފައިސާ ނުތުމުންނާއި، ހާލަތު ހުރިގޮތުން ނަޝީދު ބުނިހާ ގޮތެއް ހެދުމުގެ ފުރުސަތު ނެތްކަމަށެވެ. ނަޝީދުގެ އަމާޒުހުރީ އޭނާ ވެރިކަމަށް ގެނައުމަށް ގުރުބާންވާ މީހަކަށް ހެދުމަށް ކަމަށް ޤާސިމް ވިދާޅުވިއެވެ.

ރައީސް ނަޝީދުގެ ތޮބީއަތާއި މިޒާޖަކީ ކިހިނެތް ހުންނަ ކަމެއްކަން އެންމެނަށް އެނގޭނެ. ނަޝީދު ނޫން މީހަކު ވެރިކަން ކުރާކަމަށް އޭނަ ނޭދޭނެ. އެހެން މީހަކަށް ވެރިކަން ލިބޭކަށް ނަޝީދު ނޭދޭނެ.

– ޤާސިމް ވިދާޅުވިއެވެ.

ޤާސިމް ވިދާޅުވީ ރައީސް ނަޝީދާއިއެކު ކުރެވުނު މަޝްވަރާތަކުގައި ހުށަހެޅުމެއްވެސް ހުށަހެޅި ކަމަށެވެ. ހުށަހެޅި ކަރުދާހުން ފެނުނީ ރައީސް ނަޝީދު ވެރިކަމަށް ގެނައުމަށް ގުރުބާން ކުރާ މީހެއްގެ ގޮތުގައި ކަމަށެވެ. އަދި ނަޝީދުގެ މަޤުސަދަކީ އެމްޑީޕީ ހަލާކު ކުރީ ޤާސިމް އަޑީގައި ހުރެގެން ކަމަށް ދެއްކުންކަމަށެވެ. ނަމަވެސް އެޖާގަ ދިނުމަށް ބޭނުން ނުވާކަމަށް ޤާސިމް ވިދާޅުވިއެވެ.

ޤާސިމް ވިދާޅުވީ ނަޝީދު ހުށަހެޅި އެއްބަސްވުމަށް އެއްބަސް ނުވެވުނީ ނިޒާމުގެ މައްސަލަ އެކަނި އޮތުމުން ނޫންކަމަށެވެ. ނިޒާމުގައި މައްސަލަ ނެތްކަމަށާއި، މައްސަލައަކީ ނަޝީދު ވެރިކަމަށް އައުމަށް ކޮށަންޖެހޭ މަގު ކޮށުންކަމަށެވެ. ޤާސިމް ވިދާޅުވީ ވެރިކަމަށް ކުރިމަތިލުމަށް ނިންމާފައިވާ ނިންމުމަށް އެއްވެސް ބަދަލެއް ނުގެންނާނެކަމަށެވެ. އަދި ވެރިކަމަށް ކުރިމަތިލާން ނިންމުމުން ސަރުކާރުން ޕްރެޝަރު އަންނަ ކަމަށާއި މިހާރުވެސް އަންނަ ކަމަށެވެ. ނަމަވެސް ބިރުދައްކައިގެން މިފަހަރު ފަހަތަށް ނުޖެއްސޭނެކަމަށް ޤާސިމް ވިދާޅުވިއެވެ.

އަޅުގަނޑު މިފަހަރަކު ފަހަތަކަށް ނުޖެއްސޭނެ. ބިރެއްވެސް ނުދެއްކޭނެ. އަޅުގަނޑަކީ ކަނޑުކޮހެއް ނޫން. އެއްވެސް ދާއިރާއަކުން އަޅުގަނޑަށްވުރެ ވަކި ތަޖުރިބާ ހުރި މީހަކު މިޤައުމަކު ނުހުންނާނެ.

– ޤާސިމް ވިދާޅުވިއެވެ.

ޤާސިމް ވަނީ ރައީސް ނަޝީދު ވެރިންނާއި މުޚާތަބު ކުރައްވައި ހަޑިހުރުތުރު ބަހުން މުޚާތަބު ކުރެއްވި ކުރެއްވުންވެސް ކުށްވެރި ކުރައްވާފައެވެ. ޤާސިމް ވިދާޅުވީ އެއްވެސް މީހަކު އަނެކާއާއި ދިމާލަށް ހަޑިހުރުވަހުން މުޚާތަކުބުކޮށް ހެދުމަކީ އިސްލާމް ދީންވެސް ހުއްދަ ކުރާ ކަމެއް ނޫންކަމަށެވެ.

ޖުމްހޫރީ ޕާޓީގެ ކޮންގްރެސްއަށްފަހު ޖޭޕީއާއި ނަޝީދަށް ތާއީދު ކުރާ ފަރާތްތަކުން ކޯލިޝަނެއްގެ ތެރެއިން މަސައްކަތް ކުރުމަށް ވާހަކަ ދެއްކި ނަމަވެސް އެބަސް ނުވެވެވި މިވަނީ މަޝްވަރާތައް ހުއްޓާލާފައެވެ. ރައީސް ނަޝީދު ވަނީ އޭގެ ފަހުން ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމަށް ނިންމަވައި، ޕާޓީ ރަޖިސްޓްރީ ކުރުމަށްވެސް ހުށަހަޅާފައެވެ. އަދި ދަ ޑިމޮކްރެޓްސް އިން ވަނީ ރިޔާސީ އިންތިޚާބުގައި ވާދަ ކުރުމަށްވެސް ނިންމާފައެވެ.