މާލެ ސިޓީ ކައުންސިލްގެ މުވައްޒަފުންނަށާއި ކައުންސިލްގެ ބެލުމުގެ ދަށުގައިވާ ސްކޫލްތަކުގެ މުވައްޒަފުން އަދި ކައުންސިލްގެ ބަސް ޕްރައިވެޓް ހަޔަރގެ ގޮތުގައި ކުއްޔަށް ހިފަން ބޭނުންވާ ފަރާތްތަކަށް އެ ޚިދުމަތް 01 ޖޫން އިން ފެށިގެން ދިނުމަށް ކައުންސިލުން ނިންމައިފިއެވެ.

އެ ކައުންސިލުން ވަނީ ބަހުގެ ހިދުމަތް ދިނުމާ ގުޅޭ އުސޫލެއް ވެސް އެކުލަވާއި މިދިޔަ މާޗް މަހުގެ 1 ގައި އާންމުކޮށްފަ އެވެ. އެ އުސޫލުގައިވާ ގޮތުން ކައުންސިލް ނޫން އިދާރާއެއްގެ މުވައްޒަފުން ބަހުގައި ދަތުރުކުރަން ބޭނުންވާ ނަމަ ކޮންމެ ދަތުރެއްގެ ކޮޅަކަށް 150ރ. އަށް ދަތުރުކޮށް ދޭނެ އެވެ. އަދި ދެކޮޅު ދަތުރެއް ނަމަ 300ރ. އަށް ދަތުރުކޮށް ދޭނެ އެވެ.

މީގެ އިތުރުން އެހެން އިދާރާއެއްގެ މުވައްޒަފުންނަށް މަސް ދުވަހުގެ މުއްދަތަށް 9،000ރ. އަށް އެ އޮފީހަކުން ބޭނުންވާ މުވައްޒަފުންގެ ދެކޮޅު ދަތުރު ހަމަޖައްސައި ދޭނެ އެވެ. ދަތުރަކަށް ވަކިން ބަސް ކުއްޔަށް ހިފާ ނަމަ ރޭޓަކީ 300.ރ. އެވެ. އަދި އެފަދަ ދަތުރުތަކުގައި އެއްގަޑި އިރަށް މަޑުކުރާ ނަމަ އިތުރު 100ރ. ގެ ފީއެއް ދައްކަން ޖެހޭނެ އެވެ.

މީގެ އިތުރުން ރޭގަނޑު 12:00 ގެ ފަހުން ދަތުރެއް ކުރާ ނަމަ ދަތުރެއްކޮށް ދޭނީ 600ރ. އަށެވެ.

މާލެ އަދި ހުޅުމާލޭގައި މާލޭ ސިޓީ ކައުންސިލްގެ ފަރާތުންދޭ ބަހުގެ ޚިދުމަތަކީ 24 ގަޑިއިރުގެ ޚިދުމަތެކެވެ. އެގޮތުން ހަމަޖެހިފައިވާ ތާވަލާ އެއްގޮތަށް 24 ގަޑިއިރު ދަތުރު ކުރާނެއެވެ. އަދި ޝެޑިއުލްގެ ބޭރުން އިތުރަށް ހަމަޖައްސާ ދަތުރުތަކަކީ ވެސް 24 ގަޑިއިރުގެ ޚިދުމަތެކެވެ. އުސޫލުގައިވާގޮތުން ކޮންމެ ގަޑިއެއްގައި ދަތުރަކަށް އެދުނު ކަމުގައި ވިޔަސް އެ ޚިދުމަތް ލިބިގެންދާނެއެވެ.

މާލޭ ސިޓީ ކައުންސިލްގެ ފަރާތުން މާލެ އާއި ހުޅުމާލޭގައި ތަޢާރަފްކުރާ ބަހުގެ ޚިދުމަތް ދެ ގިންތިއަކަށް ބަހާލެވޭނެއެވެ. އެއީ ފަސިންޖަރުން ދަތުރުކުރާ ބަސްތަކާއި ޚާއްޞަ ދަތުރުތައް ކުރާ ބަސްތަކެވެ. ބަހުގެ ޚިދުމަތަށް ދަތުރުތަކަށް އަގުނެގުން ދެ ގިންތިއަކަށް ބަހާލެވޭނެއެވެ. އެއީ އޮފީސްތަކުން އެދިގެންކުރާ ދަތުރުތަކަށް ނަގާ ފައިސާއާއި ހުސް ޖާގަ އޮވެގެން ޢާއްމުންގެ ފަރާތުން އަރާ ފަރާތްތަކުގެ އަތުން ނަގާ އަގެވެ.

ބަހުގެ ޚިދުމަތް ބޭނުންކުރާ މާލޭ ސިޓީ ކައުންސިލްގެ މުވައްޒަފުން އަތުން ފީނެގުމެއް ނޯންނާނެއެވެ. ސިޓީ ކައުންސިލްގެ މުވައްޒަފުންނަށް ބަހުގައި ދަތުރުކުރެވޭނީ ބަސްކާޑު ހިފައިގެންނެވެ.

ކައުންސިލްގެ މުވައްޒަފުންގެ އިތުރުން އެހެން އިދާރާއެއްގެ މުވައްޒަފުން ބަހުގައި ގެންދަން ބޭނުންނަމަ ކޮންމެ ދަތުރެއްގެ ކޮޅަކަށް އެ އޮފީހަކުން ދައްކަންޖެހޭ އަދަދަށް އުސޫލުގައިވާ ފަދައިން ފައިސާ ދެއްކުމުން ދަތުރު ކުރެވޭނެއެވެ.

މި އުޞޫލުގެ ދަށުން އެއްވެސް އަގަކާނުލާ ހިލޭ ސާބަހަށް ބަހުގައި ދަތުރު ކުރެވޭނެ ފަރާތްތަކަކީ، އުމުރުން 65 އަހަރުން ފެށިގެން ދޮށީ އުމުރުގެ ބޭފުޅުންނާއި، އެންސްޕާގައި ރަޖިސްޓްރީވެފައިވާ ނުކުޅެދުންތެރިކަން ހުންނަ ފަރާތްތަކުގެ އިތުރުން އުމުރުން 6 އަހަރުން ދަށުގެ ކުޑަކުދީންނެވެ.