މިހާރު އޮތް ވެރިކަމުގެ ފަސް އަހަރުގެ ތެރޭގައި ރައްޔިތުންގެ ނުތަނަވަސް ކަމާއި، އަތްމަތި ދަތިކަން ވީ ބޮޑުކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.

އޭނާ މިހެން ވިދާޅުވީ ފ.އަތޮޅަށް ރައީސުލްޖުމްހޫރިއްޔާ ކުރައްވާ ދަތުރުފުޅުގައި ތަރައްޤީއާއި ގުޅޭގޮތުން ދައްކަވަމުނންދާ ވާހަތަކަށް އިޝާރާތް ކުރައްވައި ކުރެއްވި ޓުވީޓެއްގައެވެ. ރައީސް ޞާލިހު ވިދާޅުވެފައިވަނީ އެއްވެސް ރަށެއް ތަފާތު ކުރުމެއްނެތި ތަރައްޤީ ގެނެސް އަސާސީ ހައްގުތައް ކަށަވަރު ކޮށް ދިނުމަކީ މިސަރުކާރުން ޚާއްސަ އިސްކަމެއް ދީގެން ކުރަމުންދާ މަސައްކަތެއް ކަމަށެވެ.

ރައީސްގެ ވާހަތަކާއި ގުޅިގެން މެމްބަރު ވައްޑެ ވިދާޅުވީ ތަރައްޤީއަކީ މިހާއަށް އަންނަ ބަދަލެއް ކަމަށެވެ. ނަރުދަމާ އެޅުމާއި، އިންޖީނުގެ އެޅުމާއި، ބަނދަރު ހެދުމަކީ ރައްޔިތުންނަށް ބަދަލު އަންނާނެ ތަރައްޤީއެއް ނޫންކަމަށެވެ. މިވެރިކަމުގެ ތެރޭގައި ފެނިގެން ދިޔައީ ތަރައްގީއަށްވުރެ ބޮޑަށް ރައްޔިތުން ނިކަމެތިވި ތަންކަމަށް ވައްޑެ ވިދާޅުވިއެވެ. ރައްޔިތުންގެ ނިކަމެތިކަން އިންތިހާއަށް ދަށަށް ދިޔައިރު ފެނިގެން ދިޔައީ ދަތި ފަސް އަހަރުގެ ގޮތުގައިކަމަށް ވައްޑެ ވިދާޅުވިއެވެ.

ތަރައްޤީއަކީ އަސްލު އަގަށްވުރެ އެތައްގުނައެއް ޚަރަދުބޮޑު އިންޖީނުގެ އާ އިމާރާތެއް އެޅުމެއް ނޫން. ތަރައްޤީއަކީ ރައްޔިތުންގެ ދިރިއުޅުމުގެ ނުތަނަވަސްކަން ކުޑަވުން. ގައިމުވެސް މި ފަސްއަހަރު ނުތަނަވަސްކަމާ އަތްމަތި ދަތިކަން ވީ މާބޮޑު.

– ވައްޑެ ވިދާޅުވިއެވެ.

ނިލަންދޫފައި ވާހަކަ ދައްކަވަމުން ތައީސް ވިދާޅުވީ މި ސަރުކާރު އައުމާއި ހަމައަށް ރަށްރަށުގައި އަސާސީ ޚިދުމަތް ޔަޤީން ނުވެ އޮތް އޮތް އޮތުމަށް، މީގެ ކުރިން ނުކުރެވި އޮތްކަންކަން ފައިސާ ހޯދައިގެން ކުރައްވަމުން އަންނަކަމަށެވެ. އޭގެ ނަތީޖާ ރަށްރަށުން ފެންނަމުންދާކަމަށާއި، އެކަން ރާއްޖޭގެ ސިޔާސީ ބޭފުޅުންވެސް ޤަބޫލުކުރައްވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.

ރައީސްގެ ވާހަކަފުޅުގައި މި ސަރުކާރުން ގެންނަމުން އަންނަ ތަރައްޤީ ފެނި ސިޔާސީ ބޭފުޅުން ވެރިކަމަށް އަމާޒު ހިފާފައިވާ ކަމަށް ވިދާޅުވިއެވެ. އޭގެ ތެރޭގައި އަލަށް ސިޔާސީ ދާއިރާއަށް ވަންނަ ފަރާތްތައްވެސް ހިމެނޭކަމަށް ރައީސް ވިދާޅުވިއެވެ.