މިއަދު ހަވީރު ހުޅުމާލެއަށް ދިމާވި ކަރަންޓުގެ މައްސަލަ ހައްލުކޮށް މުޅި ހުޅުމާލެއަށް ކަރަންޓު ދީފިއެވެ.
ސްޓެލްކޯއިން ބުނެފައިވަނީ ދިމާވި ޓެކްނިކަލް މައްސަލަ ހައްލުކޮށް 17:40 ގައި ވަނީ މުޅި ހުޅުމާލެއަށް ކަރަންޓު ދެވިފައި ވާކަމަށެވެ. ކަރަންޓު ކެނޑުނުތާ ގާތް ގަނޑަކަށް 2 ގަނޑިއިރު ފަހުން މުޅި ހުޅުމާލެއަށް ކަރަންޓު ދެވިފައިވާއިރު، މިހާރު މައްސަލަ އެއްކޮށް ހައްލު ކުރެވިފައިވާކަމަށް ސްޓެލްކޯއިން ބުނެއެވެ.
މައްސަލަ ހައްލުކުރަމުންދިޔަ އިރު ސްޓެލްކޯއިން އެކި ސަރަހައްދު ތަކަށް ކަރަންޓު ދެމުންދިޔައިރު މައްސަލަ އެއްކޮށް ހައްލު ވެފައިވަނީ އިރު އޮއްސެން އުޅެނިކޮށެވެ.
ދިމާވި ޓެކްނިކަލް މައްސަލަ ހައްލުކޮށް 17:40 ގައި ވަނީ މުޅި ހުޅުމާލެއަށް ކަރަންޓު ދެވިފައި. ކަރަންޓު ކެނޑުމުގެ ސަބަބުން ދިމާވި ދަތިތަކަށް މާފަށް އެދެން. އަދި މިފަދަ ހާލަތްތަކުގައި ކަސްޓަމަރުންގެ ފަރާތުން މިކުންފުންޏަށް އަބަދުވެސް ލިބެމުން އަންނަ އެއްބާރުލުމަށް ޝުކުރު ދަންނަވަން.
— STELCO (@STELCOMALDIVES) December 1, 2020
ހުޅުމާލޭގައި ކަރަންޓުގެ މައްސަލައެއް މިއަދު ދިމާވެފައިވާއިރު މީގެ މަހެއްހާ ދުވަސްކުރިން މުޅި މާލެއިންވެސް ވަނީ ކަރަންޓު ކެޑި ގިނަ ހިދުމަތްތަކަށް ބުރޫ އަރާފައެވެ. ސްޓެލްކޯއިން މާލެ، ހުޅުމާލޭގެ ކަރަންޓުގެ މައްސަލަ ހައްލު ކުރުމަށް ޚާއްސަ ޕްރޮޖެކްޓެއްގެ މަސައްކަތް ކުރަމުންނެވެ. މިމަޝްރޫޢުގެ މަސައްކަތް ނިމުމުން މާލެ، ހުޅުމާލޭގެ ކަރަންޓުގެ ވިއުގަ ގުޅާލެވި މިހާރު ދިމާވަމުންދާ މައްސަލަތަކަށް ހައްލު ލިބިގެންދާނެކަމަށް ސްޓެލްކޯއިން ވަނީ ބުނެފައެވެ.
ކޮމެންޓު ފޮނުވާ