މާލޭގައި ހަދަމުންދިޔަ އިމާރާތެއްގެ މަތިން ދެ ބިދޭސީއަކު ވެއްޓުނު ހާދިސާގައި ސަލާމަތީ ފިޔަވަޅުތަކަށް އިހުމާލުވި ފަރާތް 5،000 ރުފިޔާއިން މާލެ ސިޓީ ކައުންސިލުން ޖޫރިމަނާކޮށްފިއެވެ.
މަޖީދީމަގުގައި ހަދަމުންދިޔަ މި އިމާރާތުން ވެއްޓިފައިވަނީ އުމުރުން 22 އަހަރުގެ ނޭޕާލް ފިރިހެނަކާއި 39 އަހަރުގެ ބަންގްލަދޭޝް ފިރިހެނެކެވެ. މި ދެ މީހުންނަށް އައިޖީއެމްއެޗްގައި ފަރުވާދިނުމަށްފަހު އޭގެ ތެރެއިން އެކަކު މިހާރު ހޮސްޕިޓަލުން ދޫކޮށްލާފައިވާއިރު، އަނެއް މީހާއަށް އަދިވެސް އަންނަނީ ވޯޑުގައި އެޑްމިޓްކޮށްގެން ފަރުވާދެމުންނެވެ.
މާލޭ ސިޓީ ކައުންސިލުން މައުލޫމާތު ދިން ގޮތުގައި، މި ހާދިސާ ހިނގަން މެދުވެރިވީ އެތަނުގައި މަސައްކަތްކުރަމުންދިޔައިރު އަޅަންޖެހޭ ސަލާމަތީ ފިޔަވަޅުތައް އެކަށީގެންވާ ގޮތެއްގައި އަޅާފައި ނުވުމާއި، ބަލަންޖެހޭ ވަރަށް ކަންކަން ބަލާފައި ނުވުމުގެ ސަބަބުންނެވެ. އެހެންކަމުން، މިކަމުގައި އިހުމާލުވި ފަރާތް ހޯދައި ކައުންސިލުން ވަނީ 5،000 ރުފިޔާގެ ޖޫރިމަނާއެއް އައިސްފައެވެ.
މި ހާދިސާއާ ގުޅޭ އިތުރު ކަންކަން ދިވެހި ފުލުހުންގެ ޚިދުމަތުން މިހާރު އަންނަނީ ތަހުގީގު ކުރަމުންނެވެ.
ކޮމެންޓު ފޮނުވާ