މިދިއަ އަހަރު ރިލީޒް ކުރި އަދި ބެލުންތެރިންގެ ބޮޑު ކާމިޔާބެއް ލިބިގެންދިއަ ފިލްްމް "އާރްއާރްއާރް" ގެ މުހިންމު ރޯލަކުން ފެނިގެންދިއަ އިނގިރޭސި އެކްޓަރު ރޭ ސްޓީވެންސަން މަރުވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި އުމުރުން 58 އަހަރުގެ އެކްޓަރު މަރުވީ އިޓަލީގައި ފިލްމެއްގެ ޝޫޓިންކުރިއަށް ގެންދަނިކޮށް ކުއްލިއަކަށް ބަލިވެ ހޮސްޕިޓަލަށް ގެންދިޔަ ފަހުންނެވެ.
ރޭ މަރުވީ އިއްޔެގެ ވަގުތެއްގައިއެވެ. އޭނާ މަރުވި ސަބަބު އެއްވެސް މީޑީއާއަކުން މިހާތަނަށް ހާމަކޮށްފައިއެއް ނުވެއެވެ. އޭނާ މަރުވުމުން ގިނަ ބަޔަކު އަންނަނީ ހިތާމަ ފާޅު ކުރަމުންނެވެ. "އާރްއާރްއާރް" ގެ ޑައިރެކްޓަރު އެސްއެސް ރާޖަމޯލީ ވެސް ބުނީ ރޭގެ މަރުގެ ޚަބަރުވީ ވަރަށް ބޮޑު ޝޮކަކަށް ކަމަށެވެ.
އުތުރު އަޔަލޭންޑަށް އުފަން ރޭ އަކީ އާއިލާގެ ތިން ބެއިންގެ ތެރެއިން މެދަށް ހުންނަ މީހާއެވެ. ކައިވެނި ރޫޅިފައިވާ ތިން ކުދިންގެ ބައްޕަ ކުޅެފައިވާ ފާހަގަކޮށްލެވޭ ފިލްމްތަކުގެ ތެރޭގައި 1998 ވަނަ އަހަރު ނެރުނު "ދަ ތިއޮރީ އޮފް ފްލައިޓް"، "ޕަނިޝާ:ވާ ޒޯން، މާވެލްސް ތޯ މޫވީ", "ކިލް ދަ އައިރިޝް މޭން" "ޖީ އައި ޖޯ: ރީޓަލިއޭޝަން" އަދި "ތޯ: ރެގްނަރޮކް" ހިމެނެއެވެ.
