އިނގިރޭސި ފޯވާޑް، ބުކާޔޯ ސަކާ، މިހާރު ވެސް ކުޅެމުން އަންނަ ކްލަބް، އާސެނަލާ އެކު ހަދާފައިވާ ކޮންޓްރެކްޓް އާ ކޮށްފިއެވެ.
އިންގްލެންޑްގެ ފޯވާޑް އާސެނަލްގައި ދިގު މުއްތަށް މަޑުކުރަން ނިންމާ ސޮއިކުރި އެއްބަސްވުމުގެ ދަށުން 2027 ވަނަ އަހަރުގެ ނިޔަލަށް ކްލަބާއެކު ދެމިހުންނާނެއެވެ. މިސީޒަންގައި މޮޅަށް ކުޅެ 14 ލަނޑު ޖެހި ސަކާއަކީ ކޯޗު އާޓެޓާގެ ޕްލޭންގެ މުހިއްމު ކުޅުންތެރިއެވެ. ލަނޑު ޖެހުމުގެ އިތުން މިސީޒަންގައި 11 ލަނޑު ޖަހަން ފުރުޞަތު ތަނަވަސްކޮށްދިނެވެ. 21 އަހަރު ވީއިރު އޭނާ ވަނީ އާސެނަލްއަށް 178 މެޗު ކުޅެދީފައެވެ. މިދިޔަ ދެސީޒަންގެ ލީގުގެ ހުރިހާ މެޗެއްގައި ކުޅުނެވެ.
ސަކާ ބުނީ އާސެނަލްގައި މަޑުކުރަން ނިންމި އެންމެ ބޮޑު ސަބަބަކީ އޭނާ އެންމެ މޮޅު ކުޅުންތެރިޔާ އަށް ވުމަށް ޓަކައި، ކުރަން ޖެހޭ ކަންކަމަށް ފޯކަސްކޮށް ކެރިއަރުގައި ކުރިއަށްދިއުމަށް ފުރުސަތު އެންމެ ބޮޑުކޮށް އޮތް ޓީމަކީ އާސެނަލް ކަމަށް ވާތީއެވެ.
އާސެނަލްގެ ސީނިއާ ޓީމުން ސަކާ އަށް ފުރުސަތު ދިނީ 2018 ވަނަ އަހަރު އެ ޓީމުގެ ކޯޗަކަށް އުނާއި އެމެރީ ހުރިއިރުއެވެ.
އާސެނަލްގެ މިހާރުގެ ކޯޗު، މިކޭލް އާޓެޓާގެ ޕްލޭނުގައި ވެސް މުހިންމު ރޯލެއް އަދާކުރަމުން އަންނަ ސަކާއާ ބެހޭގޮތުން، އާޓެޓާ ބުނީ އެ ޓީމުން ދާން ބޭނުންވާ ލެވަލަށް ގެންދިއުމަށްޓަކައި އެ ޕްލޭނުގެ ތެރެއިން އެންމެ އިސް ދައުރެއް އަދާކުރާނެ ކުޅުންތެރިއަކީ ސަކާ ކަމަށެވެ. އަދި އެ ފަދަ ކުޅުންތެރިއަކު ކްލަބްގައި މަޑުކުރަން ނިންމުމަކީ މުޅި ޓީމަށް ލިބޭ އުފާވެރިކަމެއް ކަމަށެވެ.
