ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ އާ ޕާޓީ، "ދަ ޑިމޮކްރެޓްސް" ފަރާތުން ކެނޑިޑޭޓަކު ވާދަކުރައްވާނެ ކަމަށް އެޕާޓީ އުފެއްދެވުމަށް ހުށަހެޅުއްވި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
އޭނާ މިހެން ވިދާޅުވީ ރައީސް ނަޝީދަށް ތާއީދު ކުރައްވާ ގިނަ އަދަދެއްގެ ބޭފުޅުންނާއިއެކު މިއަދު ޕާޓީ އުފެއްދުމަށް ފޯމު ހުށަހެޅުއްފަހު ނޫސްވެރިންނާއި ވާހަކަ ދައްކަވަމުންނެވެ. އިލެކްޝަންސް ކޮމިޝަންގެ ބޭރުގައި ނޫސްވެރިންނާއި ވާހަކަ ދައްކަވަމުން ހަސަން ވިދާޅުވީ މިއަހަރު ބާއްވާ ރިޔާސީ އިންތިޚާބުގައި އެޕާޓީން ކެނޑިޑޭޓަކު ވާދަކުރާނެ ކަމަށެވެ.
މިޕާޓީގެ ފަރާތުން ރިޔާސީ އިންތިޚާބުގައި ކެނޑިޑޭޓަކު ވާދަކުރާނެ. ނަމަވެސް އަޅުގަނޑުމެން ގިނަ ބަޔަކާއިއެކު ގުޅިގެން މަސައްކަތް ކުރުމަށް އިސްކަންދޭނަން. ދަންނަވާލަން އޮތީ އަޅުގަނޑުމެންގެ ކެނޑިޑޭޓެއް ވާދަކުރާނެއޭ މިއިންތިޚާބުގައި.
– ހަސަން ވިދާޅުވިއެވެ.
މިޓީއަކީ ރައީސް ނަޝީދު އިސްކޮށް ހުންނަވައިގެން އުފެއްދެވި ޕާޓީއެއްކަމަށް ހަސަން ވަނީ ނުސީދާކޮށް ވިދާޅުވެފައެވެ. އޭނާ ވިދާޅުވީ މިއަދު ޕާޓީ ފޯމު ހުށަހަޅަން ވަޑައިގެންނެވި މެމްބަރުންނަށް ބަލައި ލުމުންވެސް ރައީސް ނަޝީދުގެ ވިސްނުމާއި އެއްގޮތަށް ނޫނީ ޕާޓީގެ ހަރަކާތް ކުރިއަށް ނުދާނެކަން ކަށަވަރު ވާނެކަމަށެވެ.
ތިބޭފުޅުންނަށް ފެންނާނެ މިއަދު މިތަނަށް ވަޑައިގެންނެވި ބޭފުޅުން. މިބޭފުޅުންނަށް ބައްލަވާ ލެއްވީމަ ޔަގީން ކުރައްވާ އަޅުގަނޑުމެންގެ ތެރެއިން އެއްވެސް ބޭފުޅަކު މިމަސައްކަތެއް ނުކުރައްވާނެ ރައީސް ނަޝީދު މިކަމަށް ތާއީދު ނުކުރައްވާނަ.
– ހަސަން ވިދާޅުވިއެވެ.
ރިޔާސީ އިންތިޚާބުގައި ހުރިހާ ފަރާތްތަކަށްވެސް ދި ޑިމޮކްރެޓްސްއާއިއެކު މަސައްކަތް ކުރުމުގެ ފުރުސަތު އޮންނާނެކަމަށް ހަސަން ވިދާޅުވިއެވެ. ޕާޓީގެ ތަރުޖަމާނަކަށް ކަނޑައެޅުއްވި އަފްޝަން ވިދާޅުވީ ޕާޓީއަށް މިނަން ދެވުނީ މިމަސައްކަތުގައި އިސްކޮށް އުޅުއްވާ ބޭފުޅުންނަކީ ޑިމޮކްރަސީގެ އަސާސްތަކަށް ތާއީދުކުރާ ޑިމޮކްރަސީ ނެގެހެއްޓުމަށް މަސައްއްކަތް ކުރާ ބޭފުޅުންކަމަށް ވާތީއާއި، އެބޭފުޅުންގެ އަމާޒަކީވެސް ޑިމޮކްރަސީގެ އުސޫލުން ކަންކަން ކުރުން ކަމަށް އަފްޝަން ވިދާޅުވިއެވެ.
އޭނާ ވިދާޅުވީ އެޕާޓީގެ އަމާޒަކީ ލާމަރުކަޒީ އުސޫލުން ކަންކަން ކުރެވޭނެ މަގު ޕާޓީ ތެރެއިން ފަހި ކުރުންކަމަށެވެ. އަދި މިހާރު އޮތް ނުތަނަވަސް ކަމުގެ ތެރެއިން ރައްޔިތުންނަށް ހަމަޖެހޭ ތަނަވަސް ދިރިއުޅުމެއް ހޯދުމަށް ކުރަންޖެހޭ މަސައްކަތް ކުރުންކަމަށެވެ. އެމަސައްކަތުގައި އެޕާޓީ ދެމި އޮންނާނެކަމަށެވެ.
ދި ޑިމޮކްރެޓްސް ޕާޓީ އުފެއްދުމަށް މިއަދު ހުށަހެޅިއިރު، އެބޭފުޅުންވަނީ ޕާޓީ ވީހާވެސް އަވަހަށް އުފެއްދުމުގެ ހުއްދައަށް އިލެކްޝަންސްގައި އެދިފައެވެ. އިލެކްޝަނުން މިހުއްދަ 7 ދުވަހުގެ ތެރޭގައި ދޭންޖެހޭނެކަމަށް ޤާނޫނުގައި ބުނެފައިވެއެވެ. އެހެން ނަަމަވެސް އޭގެ ކުރިންވެސް ޕާޓީ ހެދުމުގެ ހުއްދަ ދޭނެކަމަށް ބެލެއެވެ.
One Response
އަސްލު ނަމަކަށް ކިޔަން އެންމެ ރަގަޅީ ދަ އަންޑިމޮކްރަޓިކް ޕާރޓީ އެވެ. މިހާރުވެސް އެއުޅެނީ ޑިމޮކްރަސީ ގަބޫލު ނުކުތެވިގެންނެވެ.