2008 ވަނަ އަހަރު، މަލްޓި ޕާޓީ ޑިމޮކްރަޓިކް ނިޒާމު ދިވެހިން ބަލައިގަތުމާއެކު ސިޔާސީ ގޮތުން ދިވެހިރާއްޖެއަށް އައި އެންމެ ބޮޑު ބަދަލެއްގެ ގޮތުގައި ފެންނާން އޮތީ ސިޔާސީ ޕާޓީތައް އުފެދި، އެ ޕްލެޓްފޯމުގައި ސިޔާސީ ހަރަކާތްތައް ހިންގުމަށް ލިބިގެންދިޔަ ތަނަވަސް ފުރުސަތުތަކެވެ. އަދި އެފުރުސަތުގެ ބޭނުންކޮށް ގައުމުގެ ވެރިކަމަށް އައިސް، ގައުމީ މަސްލަހަތާއި އަމިއްލަ މަސްލަހަތުވެސް ކުރިއެރުވުމަށް ވަކިވަކި ސިޔާސީ ލީޑަރުންނަށް ހުޅުވިގެންދިޔަ ރަނުގެ ފުރުސަތަކަށް އެފުރުސަތު ވެގެން ދިޔައެވެ.

މިގޮތުން، އާގާނޫނު އަސާސީއަށްފަހު އުފެދިގެން އައި ސިޔާސީ ޕާޓީތަކުގެ ނިޒާމްގެ ތެރެއަށް، 30 އަހަރުގެ ދިގުވެރިކަމެއް ކުރައްވަމުން އޭރު ވަޑައިގެންނެވި ރައީސް މައުމޫންވެސް ވެދެވަޑައިގެންނެވިއެވެ. 30 އަހަރުގެ ދިގު ވެރިކަމަށްފަހުވެސް ވެރިކަމުގެ އާރާއި އޭގެ ބާރާއި ލައްޒަތު މުށުތެރެއިން ދޫވެގެން ދިޔަ ނުދެއްވުމުގެ މަގުސަދުގައެވެ.

އެއާއެކު ދެން ފެނިގެންދިޔައީ ރައީސް މައުމޫނަށް ވަގަށް ގޮވާ، އެމަނިކްފާނުގެ "ޚުދުމުޚްތާރު" ވެރިކަމާއި ދެކޮޅަށް ޑިމޮކްރަސީގެ ނަމުގައި މެޑަލް ޖައްސަވަމުން ވަޑައިގެންނެވި ބޭފުޅުންވެސް ރާއްޖެއަށް އަލަށް ތައާރަފްވެގެން އައި ރިޔާސީ ނިޒާމުގެ ތެރެއިން، ރޭހަށް ނިކުންނެވި މަންޒަރެވެ. އެ ވާދަވެރިވެރިކަމުގެ ތެރެއިން ފާހަގަވެގެންދިޔަ އެއް ބޭފުޅެއްގެ ގޮތުގައި ހުންނެވީ، އޭގެ ފަހުން ކުރު މުއްދަތަކަށް ނަމަވެސް ރާއްޖެގެ ވެރިކަން ކުރެއްވި، ކުރީގެ ރައީސް މުހައްމަދު ނަޝީދެވެ.

އެހެންނަމަވެސް، ހަޔާތުން ދުވަސްތައް ފާއިތުވެ، ސިޔާސީ މަސްރަހު އެގޮތް މިގޮތަށް އޮޅެމުން ނިއުޅެމުން އައިސް މިއަދު ދިވެހި ރައްޔިތުންނަށް ހުއްޓި މިތިބަ މަންޒިލުން ފަހަތަށް އެނބުރި ބަލާލުމުން ފެންނާން އޮތީ، ބާރުތައް މުށުތެރެއަށް ލައްވައިގެން، ވެރިކަމާއި ޕާޓީގެ ލީޑަރުކަން ނޫން އެހެންކަމެއްގެ އެދުންވެރިކަން ނެތި ދިއުމުން ރާއްޖޭގެ ލީޑަރުން ފެއިލްވެ، ހަވާސާވެ، އެބޭފުޅުންގެ ލެގަސީވެސް ފަނޑުވެ ނެތިގެން ދިޔަ ތަނެވެ.

އޭގެ އެންމެ ފުރިހަމަ ދިރިހުރި މިސާލެއްގެ ގޮތުގައި މިއަދު ފެންނާން ހުރީވެސް ކުރީގެ ރައީސް މައުމުން އަބުދުލްގައްޔޫމްއެވެ. ދިވެރިހާރާއްޖޭގައި 30 އަަހަރުގެ ދިގުވެރިކަމެއް ކުރެއްވި، އަދި ޚުދުމުޚްތާރު ވެރިކަމެއްގެ ތެރެއިން ނަމަވެސް ރަގަޅު ހެޔޮ ބަދަލުތަކެއްނަމަވެސް ރާއްޖެއަށް ގެނެސްދެއްވި މައުމޫން މިއަދު ހިންގަވަމުން ގެންދަވަނީ އެއްދުވަހު 3،000 މެމްބަރުން ހަމަވިނަމަ، އަނެއްދުވަހު އެއަދަދަށް މެމްބަރުން ހަމަނުވާ، ރާއްޖޭގަ މިވަގުތު އޮތް އެންމެ ކުޑަ އެއް ސިޔާސީ ޕާޓީއެވެ.

ހަމައެއާއެކު، ކުރީގެ ޑީއާރުޕީ ބައިބައިވެ އެ ޕާޓީ ނެތި އުވިގެންދިޔަ ގޮތާއި، ކުރީގެ ޕީޕީއެމް ބައިބައިވެ އެޕާޓީއަށް ކުރިމަތިވީ ހާލަތުތަކާއި، މިއަދު އެމްޑީޕީ ބައިބައިވެ، އެޕާޓީ ދޫކޮށް، ނަޝީދު ފިކުރެއްގެ ދިރުން ޕާޓީ އުފެއްދެވުމާއި ހަމައަށް ކުރެއްވި ދަތުރަށް ރަގަޅަށް ނަޒަރެއް ހިންގާލުމުން ފެންނާން އޮތީ ރައީސް މައުމޫނެކޭ އެއްފަދައިން ނަޝީދުގެ ސިޔާސީ ތަރި އޮއްސިއްޖެކަމަށް ތާރީޚުން ފެންނާން އޮތް ސާފު ހަގީގަތްތަކެވެ.

ފިކުރެއްގެ ދިރުން ޕާޓީ ވަޔަކު ނުހިފާނެ! އެމްޑީޕީގެ މެމްބަރުން އެ ޕާޓީއާއި ގުޅެންޖެހޭ އެއްވެސް ސަބަބެއް ނެތް!

ރައީސް އިބުރާހިމް މުހައްމަދު ސާލިހު ވެރިކަމަށް ވަޑައިގެންނެވުމަށްފަހު، އެމްޑީޕީގެ އެންމެ އިސް ދެލީޑަރުންގެ މެދުގައި އުފެދުނު ސިޔާސީ ވާދެވެރިކަމުގައި ނަޝީދުގެ އެންމެ ފުރަތަމަ އަމާޒަކަށް ހެއްދެވީ ޕާޓީގެ އެތެރޭގައި އުފެދުނު ކޯޅުންތަކާއެކުވެސް އެމްޑީޕީ ދޫކޮށް ދުރަށް ވަޑައި ނުގެންނެވުމެވެ. ޕާޓީގެ އެތެރޭގައި ރައީސް ސާލިހާއި ދެކޮޅަށް ހަނގުރާމަކޮށް، ޕާޓީގެ ބާރުތައް ހޯދުނު ގޮތަކުން ހޯއްދެވުމެވެ.

އެއީ ޕާޓީގެ ގްރާސް ރޫޓުގައި ނަޝީދަށް ތާއީދު އޮންނާނޭކަމަށް އަބަދުވެސް ކުރެވެމުން ގޮސްފައިވާ ހީތަކާއި، ނަޝީދު ތާއީދުކުރާ ފަރާތަކަށް އެޕާޓީގެ އެތެރޭގައި ބޮޑު ތާއީދެއް އޮންނާނޭ ކަމަށް އަބަދުވެސް ގިނަބަޔަކު ބުނަމުން ގޮސްފައިވާ ބުނުންތަކުގެ އަލީގައި، ޕާޓީގެ އެތެރޭގެ އިންތިޚާބުތައް ކާމިޔާބުކޮށް ލީޑަޝިޕަށް، ދެގޮތެއްނުވާ ނަޝީދުގެ ބޭފުޅުން ގެންނަވައިގެން ޕާޓީ މުށުތެރޭގައި ބޭއްވުމަށް ކުރައްވަމުން ގެންދެވި އުއްމީދުތަކެވެ.

އެ އުއްމީދުގައި ޕާޓީގެ ޗެއަރޕާސަންގެ މަގާމް މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއަށް ހޯއްދަވައި ދެއްވުމަށް މަސައްކަތް ކުރެއްވިއެވެ. އެހެންނަމަވެސް އެ ހަނގުރާމަވެސް ކާމިޔާބު ނުކުރެއްވި ދެން ނަޝީދު އެންމެ ފަހުން ކުރިމަތި ލެއްވީ ޕާޓީގެ ރިޔާސީ ޓިކެޓް ރައީސް ސާލިހާއި ވާދަ ކުރައްވާ ކާމިޔާބު ކުރެއްވުމަށެވެ.

އެއީވެސް، އަމިއްލަފުޅު ހައިސިއްޔަތުން އެމްޑީޕީގެ އެތެރޭގެ ކެމްޕޭނަކަށް ނިކުންނެވުމުން ހާލަތު ތަފާތުވާނެކަމަށް ޒަމާނުއްސުރެ ގަބޫލުކުރެވި، އެމަގުން ކުރެވިފައިވާ ގިނަ ހީކުރުންތަކާއެކު، ރައީސް ސާލިހާއި ޗެލެންޖުކޮށް، ޕާޓީގެ ގްރާސް ރޫޓުގެ ތާއީދު އޮތްކަން ސާބިތު ކޮށްދެވި، ޕާޓީގެ އެތެރޭގައި އޮތްކަމަށް ބުނަމުންއައި ނަޝީދުގެ ވަރުގަދަ ނުފޫޒު ދެމެހެއްޓޭނޭކަމުގެ އުއްމީދުތަކާއެކުއެވެ.

އެހެންނަމަވެސް، އެމްޑީޕީގެ ރިޔާސީ ޕްރައިމަރީގައި، ގިނަބައެއްގެ ހީކުރުންތަކާއި ޚިލާފަށް، ރައީސް ސާލިހާއި ވާދަކޮށް ބޮޑު ބައްޔަކުން ބަލިވެ، ހަގީގީ މާނާގައި ނަޝީދުގެ މުށުތެރެއިން ޕާޓީގެ ގެއްލި ދިޔައީއެވެ. އެއަށްފަހު ދެން ފެއްޓެވީ ފިކުރެއްގެ ދިރުން ނަމުގައި ގޮތްޕެއް އުފެއްދުމުގެ މަސައްކަތްތަކެވެ. އެއީ އެ ގޮތްޕަށް އާދަޔާ ޚިލާފަށް ގިނަ އަަދަދެއްގެ މެމްބަރުން ގުޅި، ޕާޓީގެ އެތެރެއިން ސިޔާސީ އިންގިލާބެއް ގެނެސް، ރައީސް ސާލިހަށް ބޮޑު ޗެލެންޖެއް ދެވޭނެކަމުގެ އުއްމީދުގައެވެ.

އެހެންނަމަވެސް 50،000 މެމްބަރު ހަމަކުރުމަށް އަމާޒުކޮށްގެން ފެށި މިމަސައްކަތްވެސް ކޮޅެއްގަ ނުޖެހި، މިއަދު ގަބޫލުކުރަން މަޖުބޫރު ވެފައި މިވަނީ، އެންމެ ފަހުން "ފިކުރެއްގެ ދިރުން" ނަމުގައި ސިޔާސީ ޕާޓީއެއް އުފައްދަވަން ނަޝީދު ނިންމެވީ އަރުއްވާނޭ ހުރިހާ ގޮޅިއެއް ހުސްވެގެން ގަމުގައެވެ.

އެހެންނަމަވެސް، އެމްޑީޕީގެ އެތެރޭގައި ބޭއްވުނު އިންތިޚާބުތަކުގައި ނާކާމިޔާބުވެ، ނަޝިދަށް އޮތްކަމަށް އެންމެވެސް ބުނަމުން އައި ގްރާސް ރޫޓުގެ ތާއީދުވެސް ނުފެނި، އުފައްދަވަން މަސައްކަތް ކުރެއްވި "ފިކުރެއްގެ ދިރުން" ގޮފި ނެހެއްދެވި، ޕާޓީގެ ގައުމީ މަޖިލީހާއި ޕާލަމެންޓްރީ ގުރޫޕްގެ ތާއީދުވެސް ގެއްލި، އެތައް ޒަމާނެއްވަންދެން އަރިހުގައި އުޅުއްވި ސިޔާސީ ގިނަބަޔަކު ނަޝީދު ދޫކޮށް އެމްޑީޕީއާއެކީ ކުރިޔަށް ދާތަން މިއަދު ފެންނާން އޮތުމުން، ނަޝީދު އަލަށް އުފައްދަވާ ފިކުރެއްގެ ދިރުން ސިޔާސީ ޕާޓީއާއި އެމްޑީޕީގެ ގިނަބަޔަކު ގުޅިދާނެ ކަމަށް ގަބޫލުކުރުމަށް އެއްވެސް ޖާގައެއް ފެންނާން ނެތްކަމަކީ ކަށަވަރުވެ ޔަގިންވާން އޮތް ކަމެކެވެ.

ގަބޫކު ކުރަން އުދަގޫ ހަގީގަތެއް، އެހެންމަވެސް ތަރި އޮއްސިއްޖެ!

ރާއްޖޭގެ ސިޔާސީ މަސްރަހުގައި ގިނަ ބަޔަކު މިއަދު ގަބޫލުކުރާ އެއް ހަގީގަތެއްގެ ގޮތުގައި ފެންނާން އޮތީ، ރާއްޖޭގެ ސިޔާސީ ލީޑަރުންނަކީ ގައުމަށް ހެޔޮއެދިގެން ވެރިކަން ކުރެެއްވުމުގެ ބަދަލުގައި، ވެރިކަމުގެ ބާރުތައް އުމުރަށް މުށުތެރެއަށް ލައްވައިގެން އޭގެ ލައްޒަތުގައި އެކަނި ވެރިކަން ކުރައްވަން ބޭނުންފުޅުވާ ފަރާތްތައް ކަމެވެ.

އަދި ފެނާން އޮތްހަގީގަތަކީވެސް ސިޔާސީ ލީޑަރުން އެމަގުން ދަތުރު ކުރައްވާ މަންޒަރުވެސްމެއެވެ. އެއްޕާޓީ މުށުން ދޫވެ ދިއުމުން އަނެއް ޕާޓީ ހައްދަވައިގެންވެސް، އެތައް މަސައްކަތަކުން ބިނާ ކުރެވުނު ލެގަސީ ގެއްލި، ކަތިވަޅި ގެއްލި މަރިޔނަބު ގެއްލި ދާއިރުވެސް ވެރިކަމުގެ ބާރުތައް ފަހާ ދުވުމުގެ ސަގާފަތް ފާއިތުވެދާ ހުރިހާ ވެރިންގެ ކިބައިންވެސް ފެންނަމުންދާކަމީ މިރާއްޖެއިން މާސާފުކޮށް ފެންނާން އޮތް ހަގީގަތެކެވެ.

ރައީސް މައުމޫން ހެއްދެވި ޑީއާރުޕީ ދޫކޮށް ޕީޕީއެމް އުފެއްދެވުމާއި، ޕީޕީއެމް ދޫކޮށް އެންމެ ފަހުން އަމިއްލަފުޅު ނަމުގައި އެމްއާރުއެމް އުފެއްދެވުމާއި، އަދި އެންމެ ފަހުން އެޕާޓީގެ ޒައީމްކަމުގައި ހުންނަވާ، ޕާޓީގެ ރައީސް ކަމުގައި އަމިއްލަފުޅު ދަރިކަލުން ބައިންދަވައިގެން ރާއްޖޭގަ މިވަގުތު އޮތް، ސިޔާސީ ބުރަދަނެއް ނެތް، އެންމެ ކުޑަ ޕާޓީ ހިންގަވަމުން ގެންދަވާ ގެންދެވުމުންވެސް ފެންނާން އޮތީ އިސްވެ ދެންނެވުނު ހަގީގަތް އެކަންޏެވެ. އެހެންނަމަވެސް ރައީސް މައުމޫންގެ ތަރި އޮއްސި، އެ ސަފުހާއަށް ނިމުން އައިތާ އެތައް އަހަރެއް ފާއިތުވެއްޖެއެވެ.

ހަމަ އެބީދައިން، ނަޝީދު އެޕާޓީއެއްގެ ރައީސްކަން 15 އަހަރުވަންދެން ކުރައްވާ، އެއީ އަމިއްލަފުޅު ތަރިކައެއް ކަމުގައި ދެކެމުންއައި އެމްޑީޕީ ގެއްލި، ގާތުގައި އެތައް ޒަމާނެއް ވަންދެން، ހިތާހިތުގެ ގުޅުމުން މެޑަލް ޖައްސަވައިގެން އުޅުއްވި އެތައް ބަޔަކު ދުރަށްގޮސް، އެންމެ ފަހުން، އަމިއްލަފުޅު ފިކުރަށް ނިސްބަތްކޮށް، އަމިއްލަފުޅު އުފަންދުވަހާއި ދިމާކޮށް އާ ޕާޓީއެއް އުފެއްދެވި ނަމަވެސް ތާރީޚު ހެކިދެނީ ތަފާތު ހަގީގަތްތަކެއްގެ މައްޗަށެވެ.

ކިރިޔާ 3،000 ހަމަވާ ޕާޓީއެއްގެ ގޮތުގައި ނަޝީދު އުފައްދަވާ ފިކުރެއްގެ ދިރުން ޕާޓީއަށް ދެމި އޮވެވިދާނެއެވެ. އެހެންނަމަވެސް ނަޝީދުގެ ތަރި އޮއްސިއްޖެ ކަމުގައި މިއަދި ވަނީ ގަބޫލުކުރާން މަޖުބޫރު ވެފައެވެ.