މާލެ އާއި ތިލަފުއްޓާ ދެމެދު އަޅަމުންދާ ބުރިޖުގެ މަސައްކަތުގައި ގެންގުޅޭ އުޅަނދެއް އަނެއްކާވެސް ވިލިމާލެ ފަރަށް އަރައިފި ކަމަށް ބުނެ ފެތުރެމުންދާ ވާހަކަތައް ޕްލޭނިން މިނިސްޓްރީން ދޮގުކޮށްފިއެވެ.
ބްރިޖު މަސައްކަތުގައި ބޭނުންކުރި އުޅަނދެއް ވިލިމާލޭ ފަރަށް އެރި ކަމަށް ބުނެ ރޭ ދަންވަރު ފޮޓޯތަކެއް ވަނީ އާންމުވެފައެވެ. ތިލަމާލެ ބްރިޖުގެ ޕްރޮޖެކްޓް މެނޭޖަރު މުހައްމަދު ޖިނާން ވިދާޅުވި ގޮތުގައި ފްލޯޓިން ބެޗް ދިޔައީ ވިލިމާލެ ފަރު ކައިރިން ކަމަށެވެ. އަދި ފްލޯޓިން ބެޗް ވިލިމާލޭ ފަރަށް ނާރާކަމުގެ ޔަގީންކަން ޖިނާން ދެއްވިއެވެ.
ޖިނާން ވިދާޅުވީ ޑައިވަރުން އެ ސަރަހައްދަށް ފައިބައިގެން ފަރަށް އެއްވެސް ގެއްލުމެއް ލިބިފައި ހުރިތޯ ބަލަމުން އަންނަ ކަމަށެވެ. ތިލަމާލެ ބްރިޖުގެ މަސައްކަތަށް ބޭނުންކުރާ ޕްލެޓްފޯމެއް މިދިޔަ އަހަރުގެ އޯގަސްޓްމަހު ފަރަށް އަރާފައިވަނީ އެ ސަރަޙައްދުގައި ޕްލެޓްފޯމް އެޅުމުގެ ތެރޭގައެވެ. ނަގިއްޔަށް ދިމާވި ޓެކްނިކަލް މައްސަލައެއްގެ ސަބަބުން ވިލިމާލެ ފަރަށް އެރި ޕްލެޓްފޯމު ނެގޭވަރުވީ، ފަރަށް އެރިތާ 12 ދުވަސްވީ ފަހުންނެވެ. އަދި ވިލިމާލެ ފަރަށް ބޮޑެތި ގެއްލުންތަކެއްވެ، ބޮޑެތި ވަޅުގަނޑުތައް ފަރުތެރޭގައި ހެދިފައިވާތަން ފޮޓޯތަކާއި ވީޑިއޯތަކުން ފެނެއެވެ.
ވިލިމާލޭގެ ހުޅަނގު ފަރާތު ފަރަށް ޕްލެޓްފޯމް އެރުމާ ގުޅިގެން ފަރުގެ މާޙައުލަށް ލިބުނު ގެއްލުންތަކަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން އަދި ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާޢިދުގެ ދަށުން އީޕީއޭއިން، އެފްކޮންސް ކުންފުނި ޖޫރިމަނާކޮށްފައިވަނީ 69,411,800.00 (ފަސްދޮޅަސް ނުވަ މިލިއަން ހަތަރުލައްކަ އެގާރަހާސް އަށްސަތޭކަ) ދިވެހި ރުފިޔާއިންނެވެ.
އެކަމާއި ގުޅިގެން ތިމާވެށީގެ ގިނަ ޖަމްއިއްޔާތަކުންނާއި އިދިކޮޅު ސިޔާސީ ފަރާތްތަކުންވެސް ވަނީ ސަރުކާރަށާއި އެފްކޮންސްއަށް ވަރަށް ބޮޑަށް ފާޑުކިޔާފައެވެ.
