ސައުދީ އަރަބިއާގެ ކިންގް ކަޕް އޮފް ޗެމްޕިއަންސްގެ ސެމީ ފައިނަލުގައި އަލް ވޭދާ އަތުން ބަލިވެ، ޕޯޗުގަލް ތަރި ކްރިސްޓިއާނޯ ރޮނާލްޑޯގެ ކެޕްޓަން ކަމުގެ ދަށުން ކުޅެމުންދާ އަލް ނަސްރު ކަޓައިފިއެވެ.
ކިންގް ސައުދު ޔުނިވާސިޓީގެ އަލް އަވާލް ޕާކްގައި ރޭ ކުޅުނު ސެމީގެ މެޗުގައި އަލް ވޭދާ އަތުން އަލް ނަސްރު ބަލިވީ 1-0 ގެ ނަތީޖާއަކުންނެވެ.
މެޗު ފަށައިގެން ދެ ޓީމުން ވެސް ވަނީ ލަނޑު ޖެހުމަށް މަސައްކަތްކޮށްފައެވެ. އަލް އެހްދާގެ އަންސެލްމޯ، ޢަބްދުލް ކަރީމް ޔޮޑާ އަށް ލިބުނު ފުރުސަތުގެ ބޭނުން އެންމެ ރަނގަޅު ގޮތުގައި ނުހިފުނެވެ. އަލް ނަސްރަށް ކުޅެމުން އަންނަ ބްރެޒިލްގެ ޓަލިސްކާ އަށް ވެސް ވަނީ ލަނޑު ޖެހުމަށް ރަނގަޅު ފުރުސަތު ލިބި، ބޭކާރުވެފައެވެ. އޭގެ ފަހުން އެ ޓީމަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ފޮނުވާލި ހަމަލާ ވެސް ގޯލަށް އަމާޒުވެފައެއް ނުވެއެވެ. މެޗުގައި އަލް ނަސްރަށް ލީޑު ނެގުމަށް ވެސް އެންމެ އެކަށީގެންވާ ފުރުސަތެއް ލިބުނީ ރޮނާލްޑޯ އަށެވެ.
އަރިމަތިން ގިސްލައިން ކޮނާން ހުރަސްކޮށްދިން ބޯޅައެއް، އަލް ވެހްދާގެ އޭރިޔާ ތެރޭ ހުރެ ބޮލުން ފޮނުވާލުމަށް ރޮނާލްޑޯ މަސައްކަތް ކުރި ނަމަވެސް އެ ޓީމުގެ ގޯލް ކީޕަރު މުނީރް ވަނީ ހުށިޔާރުކަމާއެކު މަތަކޮށްފަ އެވެ. މެޗުގައި އަލް އެހްދާ އިން ލަނޑު ޖަހައި ލީޑު ނެގީ 23 ވަނަ މިނެޓުގައެވެ. އެއީ އަލް ނަސްރުގެ އޭރިޔާ ތެރެއިން ބޯ މައްޗަށް ލިބުނު ބޯޅައެއްގައި ބައިސިކަލް ކިކަކުން ބޯޅަ ގޯލަށް ވައްދާލައިގެންނެވެ.
ސައުދީ ލީގުގައި އެންމެ ފަހުން ކުޅުނު ދެ މެޗުން ވެސް އަލް ނަސްރަށް މޮޅެއް ހޯދިފައެއް ނުވެއެވެ. ލީގުގައި އަލް ފެއިހާއާ ދެކޮޅަށް ކުޅުނު މެޗުން ގޯލެއް ނުޖެހި އެއްވަރުވި އިރު، އަލް ހިލާލްއާ ދެކޮޅަށް ކުޅުނު މެޗުން 2-0 ގެ ނަތީޖާއަކުން ވަނީ ބަލިވެފައެވެ.
ސައުދީ ޕްރޯ ލީގުގައި އަލް ނަސްރު އޮތީ ކުޅުނު 24 މެޗުން ލިބުނު 53 ޕޮއިންޓާއެކު ތާވަލުގެ ދެވަނައިގައެވެ. އެއްވަނައިގައި އޮތް އަލް އިއްތިހާދުން ވަނީ 23 މެޗުން 56 ޕޮއިންޓު ހޯދައިފައެވެ.
