ޝަރުއީ ކޯޓުތަކުގައި ކުރިއަށްދާ ޝަރީއަތްތަކުގައި ދެކެވޭ ވާހަކަތައް ލިޔެދިނުމަށް ނުވަތަ މަޙްޟަރު ކުރުމަށް ބޭނުންވާ މީހުންގެ ދަފްތަރެއް އެކުލަވާލުމަށް ނިންމައިފިއެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން މިހާރު ވަނީ މިކަމާ ގުޅޭ އުސޫލެއް އެކުލަވާލައި އާންމުކޮށްފައެވެ. "ކޯޓުތަކުގެ ޝަރީޢަތްތަކުގައި ދެކެވޭ ވާހަކަތައް މަޙްޟަރުކުރާ ފަރާތްތަކުގެ ދަފުތަރާ ގުޅޭ އުޞޫލް" ގެ މަޤްޞަދަކީ ރާއްޖޭގެ ކޯޓުތަކުން ހިންގާ ޝަރީޢަތްތަކުގައި ދެކެވޭ ވާހަކަތަކުގެ ރިކޯޑިން އަޑުއަހައިގެން އެ ވާހަކަތައް ލިޔުމުގައި ކޯޓުތަކަށް ދިމާވާ ދަތިކަން ޙައްލުކުރައްވައި، ޝަރީއަތުގައި ދެކެވޭ ވާހަކަތައް އަވަސްކަމާއެކު ލިޔެވޭނެ ނިޒާމެއް ޤާއިމްކުރުމެވެ.
ދަފްތަރުގައި ރަޖިސްޓްރީ ވެވޭ ޝަރުތުތައް:
– އުމުރުން 18 އަހަރު ފުރިފައިވާ ދިވެހި ރައްޔިތެއް ކަމުގައިވުން
– ޝަރުއީ ކޯޓުތަކާއި އިދާރާތަކުގައި މަސައްކަތް ކުރާ ފަރާތެއް ކަމުގައި ނުވުން
– ޖިނާއީ ބޮޑު ކުށެއް ކަމަށް ގާނޫނެއްގައި ނުވަތަ ގަވައިދެއްގައި ބަޔާންކޮށްފައިވާ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުން
– ޖިނާއީ ކުށެއް ވޭތުވެދިޔަ ފަސް އަހަރުގެ ތެރޭގައި ސާބިތުވެފައިވާ މީހަކު ކަމުގައި ނުވުން
– ސަރުކާރުގެ ނުވަތަ އަމިއްލަ ކުންފުންޏެއްގެ އޮފީހެއްގައި މަސައްކަތް ކުރާ މީހެެއް ކަމުގައި ވާނަމަ، އެ މީހެއްގެ ވަޒީފާގެ އިތުރުން – އާމްދަނީ ހޯދުމަށް އެހެން މަސައްކަތެއް ކުރުން ވަޒީފާ އަދާކުރާ ތަނުން މަނާކޮށްފައިވާ މީހަކު ކަމުގައި ނުވުން
މި ދަފްތަރުގައި ރަޖިސްޓަރވާން ބޭނުންވާ މީހުން އެކަމަށް ޚާއްޞަ ފޯމް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނަށް ހުށައަޅަންޖެހެއެވެ. އަދި ފޯމާއެކު ކުށުގެ ރެކޯޑްވެސް ހުށައަޅަންޖެހެއެވެ.
މި އުޞޫލްގައި ވާގޮތުން ޝަރީޢަތުގެ ރިކޯޑިން މަޙްޟަރުކުރަން ބޭނުންވާކަން އެ ފަރާތްތަކަށް އެންގުމާއި ބޭނުންވާ އިންތިިޒާމްތައް އެ ކޯޓަކުން އެމީހަކަށް ފޯރުކޮށްދެއްވަން ޖެހެއެވެ. އަދި ކޯޓަށް ޙާޟިރުކުރާ ދުވަސްތަކުގެ ޙާޟިރީ ކޯޓުތަކުން ބަލަހައްޓަވަންޖެހެއެވެ. ދަފްތަރުގައި ހިމެނޭ ފަރާތްތައް މެދުވެރިކޮށް މަޙްޟަރުކުރާ ރިކޯޑިންއަކީ 20 މިނެޓަށްވުރެ ކުރު ނޫން ރިކޯޑިންއެއް ކަމުގައި ވާންޖެހޭނެކަމަށް އެ އުޞޫލްގައިވެއެވެ.
މިއުސޫލުގެ ދަށުން ދަފްތަރު ކުރެވޭ މީހުންނަށް އެ މީހުން ލިޔާ ކޮންމެ ސަފްހާ އަކަށް އުޖޫރައެއްގެ ގޮތުގައި 45 ރުފިޔާ ލިބެއެވެ. އުޖޫރަ ދޭނީ އުސޫލާ އެއްގޮތަށް މަސައްކަތްތައް ނިންމުމުން، ހިދުމަތް ލިބިގަންނަ ކޯޓަކުން އެކަމަށް ހާއްސަ ފޯމު ކޯޓުގެ ފައިސާއާ ބެހޭ ސެކްޝަނަށް ފޮނުވުމުން އެސެކްޝަނުންނެވެ.
ދަފްތަރުގައި ރަޖިސްޓަރީވާ މީހާ ވެފައިވާ އިޤްރާރާއި ޒިންމާތަކާ ޚިލާފުވެއްޖެނަމަ ދަފްތަރުން ވަކިކުރުމުގެ ބާރު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނަށް ލިބިވަޑައިގަންނަވާނެއެވެ. އަދި ބަޔާންތަކުގެ ފެންވަރު ދަށްވެ ކޯޓުތަކުން ޑީޖޭއޭއަށް ހުށައަޅުއްވައިފނަމަ އެކަން ބެއްލެވުމަށްފަހު ދަފްތަރުން ވަކި ކުރެވޭނެއެވެ.
