ކުނި މެނޭޖުކުރުމަށް ސަރުކާރުން އުފައްދާފައިވާ ކުންފުނި، ވޭސްޓު މެނޭޖުމަންޓު ކޯޕަރޭޝަން (ވެމްކޯ)އިން ކުނި އަޅާ ކޮތަޅު ވިއްކައިގެން ނުވާނެކަމަށާ، ކޮތަޅު ދޭންޖެހޭނީ ހިލޭކަމުގައި ރައްޔިތުންގެ މަޖިލީހުގެ މައިނޯރިޓީ ލީޑަރު އަޙްމަދު ސަލީމް ވިދާޅުވެއްޖެއެވެ.
އޭދަފުށީ ދާއިރާ ތަމްސީލްކުރައްވާ އަޙްމަދު ސަލީމް ކުރެއްވި ޓްވީޓެއްގައި ވަނީ ވެމްކޯއިން ކޮތަޅު ވިއްކުމާމެދު ސުވާލު އުފައްދަވާފައެވެ. ސަލީމް ވިދާޅުވީ ވެމްކޯއިން ކޮތަޅުވިއްކަން ޖެހެނީ ކީއްވެގެންތޯ ސުވާލު އުފެދޭކަމަށާ، އެކޮތަޅު ހިލޭ ރައްޔިތުންނަށް ފޯރުކޮށްދިނުމަށް ސަރުކާރަށް ގޮވާލައްވާކަމަށެވެ. ވެމްކޯއިން ކުނި އުކައިދެނީވެސް ވަރަށްބޮޑު އަގަކަށްކަމަށާ، އެހެންވީމާ ކޮތަޅުން އަގު ނަގައިގެން ނުވާނެކަމަށާ، މީގެ ދުވަސްކޮޅެއްކުރިން ވެމްކޯއިންވަނީ ކުނި އުކާއަގު ދެގުނަ ބޮޑުވެސްކޮށްފައިކަމަށް ސަލީމް ވިދާޅުވިއެވެ.
އަދިވެސް "ރައްޔިތުން ފެލަންވީ"ތޯ ސަލީމް ސުވާކުކުރައްވާފައިވެއެވެ.
ރެޑްވޭވް ސަލީމަކީ މަޝްހޫރު ރެޑްވޭވް ފިހާރަތަކުގެ ވެރިޔާއެވެ. އޭނާގެ ފިހާރަތަކުން ކަސްޓަމަރުންނަށް ކޮތަޅުދެނީ ހިލެއެވެ. ދާދިފަހުން ސަރުކާރުން ގެނައި ބަދަލާއެކު ކޮންމެ ޕްލާސްޓިކް ކޮތަޅަކުން ދެރުފިޔާގެ ފީއެއް ނަގަން ވިޔަފާރިކުރާ ތަންތަނަށް ލާޒިމްކުރެއެވެ. އެއާއެކު ކޮތަޅުގެ މައްސަލަ ވަނީ ބޮޑުވެފައެވެ. މި ބަދަލާއެކުވެސް ރެޑްވޭވް ފިހާތަރަކުން ކޮތަޅަކަށް އަގެއް ނުނަގައެވެ. އެތަނުން ވަނީ ތިމާވެއްޓާ ރައްޓެހި އަމިއްލަ ކޮތަޅެއް އުފައްދައި އެކޮތަޅު ކަސްޓަމަރުންނަށް ހިލޭ ދޭން ފަށާފައެވެ.
Wemco in kuni alhaa kothalhu vihkan jehenee keeve tho wemco in vihkan ulhey kothalhu hiley dhinumah sarukaarah govaalan wemco in kuni ukaadhenee v bodu aguga kothalhun agu negigen nuvaane meege dhuvas kolheh kurin kuni ukaa agu 2 guna bodu kohfi adhives rayyithun felan v dho pic.twitter.com/MgbVGQnH2i
— Ahmed Saleem (@redwave_saleem) April 23, 2023
ކޮތަޅުގެ މައްސަލަ ބޮޑުވެފައިވަނިކޮށް އަންނަ ބުރާސްފަތި ދުވަހުން ފެށިގެން ކުނި އެޅުމަށް ޚާއްސަ ކޮތަޅު"ބިންލައިނަރ"ގެ ނަމުގައި ވިއްކުމަށް ވޭސްޓް މެނޭޖްމަންޓް ކޯޕަރޭޝަން ވެމްކޯއިން ވަނީ ނިންމާފައެވެ.
މިވެމްކޯއިން ބުނެފައިވަނީ މިއީ ރައްޔިތުންނަށް ލުއިފަސޭހަކޮށްދިނުމުގެ ގޮތުން ކުރާކަމެއްކަމަށެވެ. ކުނި އެޅުމަށް ޚާއްސަކޮށްގެން ކަޅު އަދި ފެހި ކުލައިގެ ތިން ސައިޒެއްގެ ކޮތަޅު ވިއްކުމަށް ހަމަޖެހިފައިވާކަމަށް ވެމްކޯއިން ބުނެއެވެ.
