އެމްޑީޕީގެ ޕާލިމަންޓްރީ ގްރޫޕުގެ މެމްބަރުންގެ ތެރެއިން އެކި ކޮމެޓީތަކުގެ މުޤައްރިރުންގެ ގޮތުގައި ތިއްބެވި މެމްބަރުންގެ ތެރެއިން ރައީސް މުހައްމަދު ނަޝީދުގެ ފިކުރެއްގެ ދިރުމަށް ތާއީދުކުރާ ބައެއް މެމްބަރުން މުޤައްރިރުކަމުން ވަކި ކުރުމަށް ނިންމައިފިއެވެ.
ކޮމެޓީތަކުގެ މުޤައްރިރު ކަމުން ވަކި ކުރުމަށް ނިންމާފައިވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފް، މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ، ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފް އަދި ހުޅުދޫ ދާއިރާގެ މެންބަރު އިލްޔާސް ލަބީބެވެ.
ހެންވޭރު ހުޅަނގު ދާއިރާގެ މެންބަރު ޙަސަން ލަތީފަކީ އާންމު ކޮމިޓީގެ މުޤައްރިރެވެ. ކުޅުދުއްފުށި އުތުރު ދާއިރާގެ މެންބަރު ޔާސިރު ޢަބްދުއް ލަތީފްއަކީ އިމްތިޔާޒު އަދި ސުލޫކީ ކޮމިޓީގެ މުޤައްރިރެވެ. އޭގެ އިތުރުން، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއަކީ ޖުޑީޝަރީ ކޮމިޓީގެ މުޤައްރިރެވެ. ހުޅުދޫ ދާއިރާގެ މެންބަރު އިލްޔާސް ލަބީބްއަކީ ސްޓޭޓް އޯވންޑް އެންޓަރޕްރައިޒަސް ކޮމިޓީގެ މުޤައްރިރެވެ.
އެމްޑީޕީގެ ޕީޖީ ގްރޫޕްގެ މެމްބަރަކު ވިދާޅުވީ މިބޭފުޅުންނާއިމެދު ފިޔަވަޅު އަޅަން ނިންމީ މިއަދު ބޭއްވި އެމްޑީޕީގެ ޕާލިމަންޓްރީ ގްރޫޕްގެ ބައްދަލުވުމުގައި ކަމަށެވެ. މިބޭފުޅުންނާއިމެދު ފިޔަވަޅު އަޅަން ނިންމީ ތަކުރާރުކޮށް ސަރުކާރާއި އެމްޑީޕީގެ ސިޔާސަތަށް ގޮންޖަހައި އަމިއްލަ އެޖެންޑާ ހާސިލްކުރުމަށް މަސައްކަތް ކުރާތީއެވެ.
މިބޭފުޅުންނާއި، މެދު އެމްޑީޕީގެ ޕާލިމަންޓްރީ ގްރޫޕުން ނިންމާ ނިންމުމުގެ އިތުން މިބޭފުޅުންނާއިމެދު އެމްޑީޕީންވެސް ފިޔަވަޅު އަޅައިދިނުމަށް އެދި ޕާޓީގެ ފިޔަވަޅު އަޅާ ކޮމެޓީއަށްވެސް ޕީޖީ ގްރޫޕުން ވަނީ ފޮނުވާފައެވެ. މިހަތަރު މެމްބަރުންނަކީ މަޖިލީހުގައާއި، މަޖިލީހުން ބޭރުގައިވެސް ރައީސް އިބްރާހިމް މުހައްމަދު ޞާލިހުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވާ، އަދި ކުރިއަށް އޮތް އިންތިޚާބުގައި އެމްޑީޕީގެ ކެނޑިޑޭޓް ރައީސް ޞާލިހަށް ތާއީދު ނުކުރާނެކަމަށް ބުނެފައިވާ ހަތަރު ބޭފުޅުންނެވެ.
މިބޭފުޅުން މުގައްރިރުކަމުން ވަކި ކުރުމަށް ނިންމަފައިވަނީ އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ރާއްޖޭގައި ނޫޅުއްވާ ދަނޑިވަޅެއްގައެވެ. މިބަދަލާއިއެކު މަޖިލީހުގައި އަނެއްކާވެސް އެމްޑީޕީ މެމްބަރުންގެ މެދުގައި ޚިޔާލު ތަފާތުވުން ބޮޑުވެ، ސިޔާސީ ވާދަވެރިކަން ބޮޑުވުމަކީ ފެނިގެންދާނެ މަންޒަރެއްކަމަށް ބެލެވެއެވެ.
