މާލޭ ސިޓީގެ މޭޔަރު ޑރ.މުހައްމަދު މުއިއްޒުގެ މައްޗަށް އުފުލާފައިވާ ދޮގު ބަޔާން ދިންކަމުގެ ކުށުގެ ދައުވާގެ ޝަރިޢަތުގެ އަޑުއެހުންތައް ނިންމާލައިފިއެވެ. ދެން އޮންނާނީ މިމައްސަލައިގެ ޙުކުމް އިއްވޔުމެވެ.
ޑރ. މުއިއްޒުގެ މައްޗަށް ދޮގު ބަޔާން ދިންކަމަށް ތުހުމަތުކުރަނީ ނޫމަޑި ކުންފުންޏާއެކު ސަރުކާރުން ހެދި އެއްބަސްވުން ބާޠިލްކުރި މައްސަލައިގެ އާބިޓްރޭޝަނުގައި ޑރ.މުޢިއްޒު ނޫމަޑިއާ އެއްކޮޅަށް ދިން ބަޔާނަކީ ދޮގު ބަޔާނެއްކަމަށް ބުނެއެވެ.
މިމައްސަލައިގެ ޝަރީޢަތުގެ އެންމެ ފަހު އަޑުއެކުން މިއަދު ކްރިމިނަލް ކޯޓުގައި ވަނީ ބާއްވަފައެވެ. އަޑުއެހުންތަައް ނިމުމާއެކު ދެން އޮންނާނީ މައްސަލައިގެ ހުކުމް އިއްވުންކަން ޝަރީޢަތުންވަނީ ހާމަކުރައްވާފައެވެ. ޝަރިޢަތުން ވިދާޅުވި ވާހަކަތަކަށް ބަލާއިރު، މިމައްސަލައިގެ ޙުކުމްކުރިން އަންނަމަހު އޮންނާނެކަމަށް ބެލެވެއެވެ.
ދައުލަތުން މުއިއްޒުގެ މައްޗަށް ތުހުމަތު ކުރަނީ، ހައުސިން މިނިސްޓަރު ކަމުގެ މަގާމުގައި ހުންނަވައި އޭނާ އަމިއްލައަށް ނިންމެވި ނިންމުންތަކެއް އެއީ ދޮގެއް ކަމަށް ވިދާޅުވެ، މިނިސްޓަރު ކަމުގެ މަގާމުން ވަކިވެވަޑައިގަތުމަށް ފަހު އާބިޓްރޭޝަނަށް ބަޔާން ދެއްވި ކަމުގެއެވެ.
މުއިއްޒުގެ މައްޗަށް ދައުވާ އުފުލާފައިވަނީ ގާނޫނުލް އުގޫބާތުގެ 520 ވަނަ މާއްދާގެ ދަށުންނެވެ. ދައުވާ ސާބިތުވެއްޖެ ނަމަ، އޭނާގެ މައްޗަށް ހަތަރު މަހާއި 24 ދުވަހުގެ ޖަލު ހުކުމެއް އަންނާނެއެވެ.
މީގެ ކުރިން ރައްޔިތުންގެ މަޖިލީހުގެ ކޮމިޓީއަކަށް ވެސް މުއިއްޒު ހާޒިރުކޮށް އެ ކަމާ ގުޅޭ ގޮތުން ސުވާލުކޮށްފައިވެއެވެ. ނެދަލެންޑްސްގެ އާބިޓްރޭޝަނަށް ނޫމަޑީގެ ހެކިވެރިއެއްގެ ގޮތުގައި އެއްވެސް ބަޔާނެއް ދީފައިވޭތޯ މަޖިލިސް މެންބަރުން ސުވާލު ކުރެއްވުމުން، އެ ސުވާލަށް އެއްވެސް ޖަވާބެއް މުއިއްޒު ނުދެއްވައެވެ.
