ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީއާއެކު ކޯލިޝަން ހެދުމުގެ ދައުވަތު، އެމްއެމްޕީއާރުސީގެ ޚިޔާނާތުގެ ތުހުމަތުގައި ހުކުމް ތަންފީޒު ކުރައްވަމުން ގެންދަވާ، ކުރީގެ ނާއިބު ރައީސް އަހުމަދު އަދީބު ރައީސްކަން ކުރައްވާ ތާރޑްވޭ ޑިމޮކްރަޓިކް ޕާޓީ (އެމްޓީޑީ) އަށް ޖުމުހޫރީ ޕާޓީން ފޮނުވައިފިއެވެ.
މިއަހަރު ސެޕްޓެމްބަރުމަހު ބޭއްވުމަށް ހަމެޖެހިފައިވާ ރިޔާސީ އިންތިޚާބަށް އެކީގައި މަސައްކަތް ކުރުމުގެ ދައުވަތު ގާސިމް އިބުރާހިމްގެ ފަރާތުން އެމްޓީޑީއަށް ފޮނުވާފައިވާކަން ޖުމުހޫރީ ޕާޓީގެ އިސް އޮފިޝަލަކުވަނީ ޚަބަރު އޮންލައިނަށް ކަށަވަރު ކޮށްދެއްވާފައެވެ.
ޖޭޕީން ކޯލިޝަން ދައުވަތު އެމްޓީޑީއަަށް ފޮނުވުމާއެކު އެޕާޓީން ކޯލިޝަން ހެދުމަށް ދައުވަތުދިން ޕާޓީތަކުގެ އަދަދު މިހާރުވަނީ 6 އަށް އަރާފައެވެ. އެހެންނަމަވެސް މިހާތަނަށް، އެމްޑީޕީގެ ރައީސް މުހައްމަދު ނަޝީދުގެ ފިކުރެއްގެ ދިރުން ފިޔަވާ އެހެން އެއްވެސް ފަރާތަކުން ޖޭޕިއާއެކު ކޯލިޝަން ހެދުމަށް ނިންމާފައެއް ނުވެއެވެ.
މިގޮތުން ޖޭޕީން ދިން ކޯލިޝަންގެ ދައުވަތު އިދިކޮޅު ޕީޕީއެމްއާއި އަމިއްލަގޮތުން ވާދަކުރާ އުމަރު ނަސީރުގެ އިތުރުން ޑރ. މުނައްވަރު ރައްދު ކޮށްފައިވި ނަމަވެސް، ރައީސް މައުމޫން އުފައްދަވާފައިވާ އެމްއާރުއެމްއިންވަނީ ޖޭޕީއާއެކު ކޯލިޝަން ހެދުމުގެ މަޝްވަރާތައް ފެއްޓުމަށް ނިންމާފައެވެ.
ޖޭޕީން ރިޔާސީ އިންތިޚާބުގައި ވާދަކުރުމަށް ނިންމާ، ކޯލިޝަން ހެދުމަށް ޕާޓީތަކަށް ދައުވަތު ފޮނުވަމުން ގެންދާއިރު ރައީސް ސާލިހު މިހާރުވަނީ އަދާލަތު ޕާޓީގެ އިތުރުން އެމްޑީއޭއާއެކު ކޯލިޝަން ހަދާފައެވެ. އަދި ރައީސް ސަލިހުވަނީ އެމްއާރުއެމްއާއެކުވެސް މަޝްވަރާ ކުރައްވާފައެވެ.
ކުރިޔަށް އޮތް ރިޔާސީ އިންތިޚާބަށް ޖޭޕީއާއެކު ކޯލިޝަން ހަދާފައިވާ އެމްޑީޕީގެ ރައީސް މުހައްމަދު ނަޝީދަކީ އެމްއެމްޕީއާރުސީގެ ޚިޔާނާތުގެ މައްސަލާގައި އެމްޓީޑީގެ ބާނީ އަހުމަދު އަދީބަށް އެންމެ ބޮޑަށް ފާޑު ވިދާޅުވަމުން ގެންދަވާ އެއް ބޭފުޅާކަން ފާހަގަ ކޮށްލެވެއެވެ. އެހެންނަމަވެސް އަދީބުގެ އެމްޓީޑީއާއެކު ޖޭޕީން ކޯލިޝަން ހެދުމުން، ޖޭޕީ އާއެކީ ފިކުރެއްގެ ދިރުމުން ހަދާފައިވާ ކޯލިޝަނަށް އޭގެ އަސަރެއް ކުރާނެކަމެއް އަދި ޔަގީން ކުރެވިފައެއް ނުވެއެވެ.
އެމްއެމްޕީއާރުސީގެ ޚިޔާނާތުގެ ކުށް ސާބިތުވެ ކުރީގެ ނާއިބު ރައީސް އަދީބު ގެންދަވަނީ ދިގު މުއްދަތުގެ ޖަލުހުކުމެއް ތަންފީޒު ކުރައްވަމުންނެވެ. އެހެންނަަމަވެސް އަދީބު ހުންނަވަނީ ގޭގައެވެ.
