އެމްޑީޕީގެ ރައީސް މުހައްމަދު ނަޝީދަކީ ރާއްޖޭގެ ވެރިކަން ކުރުމުގެ ފުރުސަތު ލިބި ތިން އަހަރުވެސް ވެރިކަން ކޮށްލަން ނޭގުނު މީހެއްކަމަށް ވިދާޅުވެ ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު މުޙައްމަދު ރާޝިދު ރައީސް ނަޝީދަށް ފާޑު ވިދާޅުވެއްޖެއެވެ.
ގިނަ ބަޔަކު ރައީސް ނަޝީދުގެ ޓުވިޓާ އެކައުންޓެއްކަމަށް ތުހުމަތުކުރާ ހަސަން ކުރުސީގެ ޓުވިޓާ އެކައުންޓުން ރޮޒޭނާ އަށް ފާޑުކިޔައި ކުރި ޓުވީޓާއި ގުޅިގެން ރާޝިދު ވަނީ ނަޝީދަށް ވަރަށް ބޮޑަށް ފާޑުކިޔާފައެވެ. ހަސަން ކުރުސީގެ އެކައުންޓުން ކުރި ޓުވީޓުގައި ބުނެފައިވަނީ ރާއްޖޭގައި ހަށިވިއްކުން ތަޢާރަފްކުރީ ރޮޒޭނާ ކަމަށެވެ.
ހަސަން ކުރުސީ މާނަކޮށްފައިވާ ހަށި ވިއްކުމަކީ ސިޔާސީގޮތުން ޕާޓީ ބަދަލުކުރުމުގެ ސަގާފަތްކަމަށް ބެލެވެއެވެ. ކުރުސީ ބުނެފައިވަނީ ރޮޒޭނާގެ ފަރާތުން އެކަން ދަސްކޮށް މިއަދު ގިނަ ބަޔަކު އެކަން ކުރަމުންދާކަމަށެވެ.
ރާއްޖޭގައި ހަށިވިއްކުން ތައާރަފްކޮށްދެއްވި ބޭފުޅާ ރޮޒޭނާ އާދަމް. ގިނަ ބޭފުޅުން މިހާރު ދަނީ އެވިޔަފާރީގެ ތެރެއަށް ވަދެ، އޭގެން ނަފާ ހޯދަމުން.
– ހަސަން ކުރުސީގެ ޓުވިޓާ އެކައުންޓުން ކުރި ޓުވީޓުގައި ވެއެވެ.
ކުރުސީގެ ވާހަކަތަކަށް ރައްދު ދެމުން ރާޝިދު ވިދާޅުވީ އެމްޑީޕީގެ ރައީސް މުހައްމަދު ނަޝީދަކީ އެމްޑީޕީގެ ރައީސް ކަމުގައި 18 އަހަރު ހޭދަކޮށްފައިވާ ބޭފުޅަކަށް ވީނަމަވެސް ވެރިކަން ލިބުމުން 3 އަހަރުވެސް ވެރިކަން ކޮށްލަން ނޭގުނު ބޭފުޅެއްކަމަށެވެ. މިއަދު ދަނީ ނަޝީދުގެ އަމިއްލަ އެދުން ބޮޑުވެ ގެންގުޅުއްވާ އަމިއްލަ ސިޔާސަތުގެ ސަބަބުން ޕާޓީވެސް އަތުން ދޫވަމުންކަމަށް ރާޝިދު ވިދާޅުވިއެވެ.
އެންމެ ބޮޑު ޕާޓީގެ ރައީސްކަން 18 އަހަރު ކުރިއިރު، ވެރިކަން ކޮށްލަން 3 އަހަރުވެސް ނޭގުނު. ނުވިތާކަށް މިއަދު ޕާޓީވެސް ގެއްލެނީ. ހައްތަހާވެސް މިއީ އަމިއްލަ އެދުމާއި ހެދި ވާގޮތް. ވެރިކަން ނުލިބި ބޮޑުކަން ނުލިބުމުން މިއީ އެހެން މީހުންގެ ބޮލުގައި މިފަދަ އިލްޒާމުތައް އަޅުވަން ޖެހޭ ސަބަބެއް ނޫން.
– މެމްބަރު ރާޝިދު ވިދާޅުވިއެވެ.
ދެބައި ވެފައިވާ އެމްޑީޕީގެ ތެރޭގައި ރައީސް ނަޝީދާއި ދެކޮޅު މަޖިލިސް މެމްބަރުން ގެންދަނީ ވަރަށް ފާޅުގައި ނަޝީދަށް ފާޑު ވިދާޅުވަމުންނެވެ. ޚާއްސަކޮށް 19 ވަނަ މަޖިލީހަށް އަލަށް އިންތިޚާބުވި މެމްބަރުންގެ ތެރެއިން ރައީސް ޞާލިހަށް ތާއީދުކުރާ މެމްބަރުން ރައީސް ނަޝީދަށް ފާޑުކިޔުން އަމާޒުކުރާ މިންވަރު އިތުރުކަން ފާހަގަކުރެވެއެވެ.
