ރައްޔިތުންގެ މަޖިލީހުގެ ސުޕަ މެޖޯރިޓީއެއް އޮތް ވެރިކަން ކުރާ މައި ޕާޓީ އެމްޑީޕީގެ ތެރޭގައި، އެއީ އެމްޑީޕީ މެމްބަރެއްކަން ޔަގީން ނުވާ މެމްބަރުންތަކެއްވެސް އެބަތިބި ކަމުގައި އެމްޑީޕީ ޕާލިމަންޓްރީ ގްރޫޕްގެ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިހެން ވިދާޅުވީ ކ. ގުޅީގައި، ގުރައިދޫ ދާއިރާގެ ބައި އިލެކްޝަންގެ ކެމްޕޭން އެމްޑީޕީން ރަސްމީކޮށް ފެށުމަށް ބޭއްވި ޖަލްސާގައި ވާހަކަދައްކަވަމުންނެވެ. ރޭގެ ޖަލްސާގައި އަސްލަމް ވިދާޅުވީ އެމްޑީޕީއަށް މިހާރު އޮތް އެންމެ ބޮޑު ގޮންޖެހުމަކީ ޕްރައިމަރީތަކުން ބަލިވުމުން ބަލިވާ ކެނޑިޑޭޓް މޮޅުވާ ކެނޑިޑޭޓުގެ ފަހަތަށް ނޭރުންކަމަށެވެ.
ނަމަވެސް ގުރައިދޫ ދާއިރާގެ ބައި އިލެކްޝަން ޕްރައިމަރީގައި އެކަން ފެނިގެން ދަނީ މުޅިން އެހެން ގޮތަކަށް ކަމަށާއި، ބަލިވި ކެންޑިޓޭޓް މޮޅުވާ ކެނޑިޑޭޓާއިއެކު ހުރުމަކީ ލިބޭ ބޮޑު ހިތްހަމަ ޖެހުމެއް ކަމަށެވެ. އޭނާ ވިދާޅުވީ ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ޕްރައިމަރީގައިި ބަލިވި ކެނޑިޑޭޓްވެސް މޮޅުވި ކެނޑިޑޭޓާއިއެކު ކުރިއަށް ދާންޖެހޭ ކަމަށެވެ.
ރިޔާސީ ޕްރައިމަރީގައިވެސް ބަލިވި ކެނޑިޑޭޓަށް އަޅުގަނޑު ދަންނަވާލަން ބޭނުމީ ފަހަތަށް އަރާ ވަޑައިގަންނަވާށޭ. ޕާޓީގެ އުސޫލުތަކާއި ހަމަތަކާއި ޕާޓީ، ޕާޓީގެ ގޮތުގައި ހިފަހައްޓަވަން މަސައްކަތް ކުރައްވާށޭ.
– އަސްލަމް ވިދާޅުވިއެވެ.
އަސްލަމް ވިދާޅުވީ ރައްޔިތުންގެ މަޖިލީހުގައި އެމްޑީޕީގެ ބޮޑު މެޖޯރިޓީއެއް އޮތަސް މިހާރު ކަންކަން ދާގޮތުން މަޖިލީހުގެ އެމްޑީޕީ ޕީޖީ ގްރޫޕްގައިި ބައެއް މެމްބަރުންނަކީ އެމްޑީޕީ މެމްބަރުންކަންވެސް ވަކި ނުވާ ހިސާބަށް ގޮސްފައިވާކަމަށެވެ. އެމެމްބަރުން އިދިކޮޅު ޕީޕީއެމް މެމްބަރުންނަށް ވުރެވެސް ބޮޑަށް މަޖިލީހުގައި އެމްޑީޕީގެ އަސާސްތަކަށް ހުރުމަތްތެރިކޮށް ނުހިތައި އުސޫލުތައް މުގުރާލަމުންދާކަމަށް އަސްލަމް ވިދާޅުވިއެވެ.
މަޖިލީހުގައި އެމްޑީޕީގެ 65 މެމްބަރު އެބަތިބި. ރަނގަޅު ވާހަކައެއް. އެހެން ނަމަވެސް މިހާރު އޭގެ ތެރޭގައި އެބަތިއްބަވާ އަޅުގަނޑުމެންނަށް އެއީ އެމްޑީޕީގެ މެމްބަރުންކަންކަން ޔަގީންނުވާ، އަދި ޕީޕީއެމްއަށްވުރެވެސް، ބޮޑަށް އެމްޑީޕީގެ އަސާސްތަކާއި އުސޫލުތައް ކަމުނުގޮސްގެން އުޅުއްވާ މެމްބަރުންވެސް.
– އަސްލަމް ވިދާޅުވިއެވެ.
އަސްލަމް ވިދާޅުވީ މެމްބަރެއްގެ ވަރަށް ބޮޑު މަސްއޫލިއްޔަތުތަކެއް އޮންނަ ކަމަށެވެ. ޤާނޫނު އަސާސީންވެސް އެކަން ކަށަވަރު ކޮށްފައިވާއިރު މެމްބަރުންގެ ޒިންމާއަކަށް ވާންޖެހޭނީ އުސޫލުތަކާއި އަސާސްތަކުގައި ހިފަހައްޓާ ބަޔަކަށް ވަންޖެހޭނެކަމަށެވެ. ދޮގާއި މަކަރު ހެދުމަކީ މެމްބަރުން ކޮށްގެންވާނެ ކަމެއް ނޫންކަމަށް އަސްލަމް ވިދާޅުވިއެވެ.
