ފާއިތުވި ފެބްރުއަރީމަހު މީރާއަށް 1.72 ބިލިއަން ރުފިޔާގެ އާމްދަނީއެއް ލިބިފައިވާކަން އެ އޮތޯރިޓީން ހާމަ ކޮށްފިއެވެ. މީރާއިން ހާމަކޮށްފައިވާ ގޮތުގައި މިއީ ފާއިތުވި އަހަރުގެ މިމުއްދަތުގައި ދައުލަތަށް ލިބި އާމްދަނީއާއި އަޅާބަލާއިރު 18.6 އިންސައްތައިގެ ބޮޑު ކުރިއެރުމެކެވެ.
އެހެންނަމަވެސް މިއީ މިއަހަރުގެ މިމުއްދަތުގައި ލިބޭނެކަމަށް ކުރިން އަންދާޒާކޮށްފައިވާ މިންވަރަށްވުރެ 20.8 އިންސައްތައިގެ ދަށް އަދަދެއްކަމަށްވެސް މީރާއިން ބުނެފައި ވެއެވެ.
މީރާއިން ހާމަކޮށްފައިވާ ގޮތުގައި، ފާއިތުވި އަހަރުގެ މިމުއްދަތުގެ އާމްދަނީއަށްވުރެ މިއަހަރުގެ އާމްދަނީ އިތުރުވެފައިވާ ސަބަބަކީ، ކޯޕަރޭޓް އިންކަމް ޓެކްސް، ނޮން-ރެޒިޑެންޓް ވިތުހޯލްޑިންގ ޓެކްސް، ޖީއެސްޓީގެ އިތުރުން އެއަރޕޯޓް ޓެކްސްގެ ގޮތުގައި ލިބިފައިވާ އާމްދަނީއަށް ބޮޑު ކުރިއެރުމެއް އައިސްފައިވާތީއެވެ.
ފާއިތުވި ފެބްރުއަރީމަހަކީ ރާއްޖެއަށް ރެކޯޑު އަދަދަކަށް ފަތުރުވެރިން ޒިޔާރަތްކޮށްފައިވާ މަހެއްކަންވެސް ފާހަގަ ކޮށްލެވެއެވެ.
މީރާއިން ހާމަކޮށްފައިވާ ގޮތުގައި 2022 ވަނަ އަހަރުގެ ޖެނުއަރީމަހާއި އަޅާބަލާއިރު މިއަހަރުގެ ޖެނުއަރީމަހު ރާއްޖެއަށް ޒިޔާރަތްކޮށްފައިވާ ފަތުރުވެރިންގެ ނިސްބަތްވަނީ 30.9 އިންސައްތަ އިތުރުވެފައެވެ. ހަމައެއާއެކު، މިއަަހަރުގެ ޖެނުއަރީމަހުންފެށިގެން ޖީއެސްޓީ ރޭޓް ބޮޑުވެފައިވުމަކީވެސް ޖީއެސްޓީގެ ގޮތުގައި ފެބުރުއަރީމަހު ލިބިނު އާމްދަނީއަށް ބޮޑު ކުރިއެރުމެއް އައިސަބަބެއް ކަމުގައިވެސް މީރާއިން ފާހަގަ ކޮށްފައި ވެއެވެ.
އެހެންނަމަވެސް، މިއަހަރުގެ ފެބްރުއަރީމަހު ދައުލަތަށް ލިބޭނެކަމަށް ކުރިން އަންދާޒާކޮށްފައިވާ މިންވަރަށް އާމްދަނީ ނުލިބިދިޔަ ސަބަބެއްގެ ގޮތުގައި މީރާއިން ފާހަގަ ކޮށްފައިވަނީ، ޖީއެސްޓީން ލިބޭނެކަމަށް ކުރިން އަންދާޒާކުރި އަދަދަށް ޖީއެސްޓީގެ އާމްދަނީ ފެބްރުއަރީމަހު އިތުރުވެގެން ނުދިއުމެވެ.
އެހެންނަމަވެސް މިއަހަރުގެ ފެބްރުއަރީމަހު ޓެކްސްގެ ގޮތުގައި ދައުލަތަަށް ލިބުނު އާމްދަނީގެ އެންމެ ބޮޑުބައެއް ހިއްސާ ކޮށްފައިވަނީ ޖީއެސްޓީންނެވެ. ޖީއެސްޓީގެ ގޮތުގައި ފެބްރުއަރީމަހު ދައުލަތަށް ލިބިފައިވަނީ 182.04 މިލިއަން ރުފިރާއެވެ. އޭގެ އިތުރުން 91.87 މިލިއަން ރުފިޔާ ގްރީން ޓެކްސްގެ ގޮތުގައި ލިބިފައިވާއިރު، 81.87 މިލިއަން ރުފިޔާ އެއަރޕޯޓް ޑިވެލޮޕްމަންޓް ފީގެގޮތުގައި ލިބިފައި ވެއެވެ.
އޭގެ އިތުރުން ޑިޕާޗަރ ޓެކްސްގެގޮތުގައި 78.84 މިލިއަން ރުފިޔާ އަދި 98.55 މިލިއަން ރުފިޔާ އެހެނިހެން ޓެކުހާއި ފީގެ ގޮތުގައި ލިބިފައިވާކަންވެސް މީރާއިން ހާމަ ކޮށްފައި ވެއެވެ.
ފެބްރުއަރީމަހު މީރާއިންވަނީ ދައުލަތަށް ލިބުނު އާމްދަނީގެ ގޮތުގައި 73.60 މިލިއަން ޑޮލަރުވެސް ބަލައިގެންފައެވެ.
ޓެކްސްގެ ގޮތުގައި މީރާއަށް ލިބުނު އާމްދަނީއަށް ބޮޑު ކުރިއެރުމެއް އައިސްފައިވާއިރު، މުދަލާއި ޚިދުމަތުގެ އަގުންނަގާ ޓެކްސް، ޖީއެސްޓީޢާއި، ޓޫރިޒަމް ދާއިރާގެ ޓެކްސް، ޓީޖީއެސްޓީ ވަނީ ޖެނުއަރީ 1އިން ފެށިގެން ބޮޑުކޮށްފައެވެ. ޖީ.އެސް.ޓީ %12 އިން %16 އަށް، އަދި ޖީ.އެސް.ޓީ %6 އިން %8އަށް ވަނީ ބޮޑުކޮށްފައެވެ. ޓެކްސް ބޮޑުކުރުމަށް މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ހުށައެޅި އިޞްލާހު ރައީސުލްޖުމްހޫރިއްޔާ ތަސްދީޤްކުރެއްވީ ފާއިތުވި ޑިސެމްބަރު މަހުއެވެ.
ސަރުކާރުން ހާމަ ކޮށްފައިވާ ގޮތުގައި، މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް އިސްލާހު ހުށަހެޅުއްވުމުގެ މައިގަނޑު ބޭނުމަކީ ދައުލަތުގެ ޚަރަދުގެ ސިޔާސަތުތަކާއި ދުނިއޭގެ އިގްތިޞާދަށް އަންނަ ބަދަލުތަކުގެ ސަބަބުން ދައުލަތުގެ އާމްދަނީ އިތުރުކުރުމަށް ފިޔަވަޅުތަކެއް އެޅުމެވެ. އެ ފިޔަވަޅުތައް ނާޅައިފިނަމަ އާމްދަނީން ރިކަރެންޓް ޚަރަދުތައް ހަމަނުޖެއްސޭނެކަމަށް ލަފާކުރެވޭކަމަށްވެސް ސަރުކާރުން ބުނެފައި ވެއެވެ.
