ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް މިދިޔަ މަހު އަވަހާރަވި ކ. ގުރައިދޫ ދާއިރާގެ މަޖިލިސް މެމްބަރު އިބްރާހީމް ރިޒާ ނިޔާވުމުގެ ދުވަސްކޮޅެއް ކުރިން ވާހަކަ ދެކެވުނު ކަމަށާއި، އެދުވަހުވެސް އެދުނީ ޤުރުއާންމުބާރާތެއް ބޭއްވުމަށް ކަމަށް ގުރައިދޫ ކައުންސިލް ރައީސް ޔާމީން ވިދާޅުވެއްޖެއެވެ.
ރިޒާގެ ހަނދާނުގައި މިރޭ ޕްރޮގްރެސިވް ކޯލިޝަނުން ގުރައިދޫގައި ބޭއްވި ތައުބީނުގެ ޖަލްސާގައި ވާހަކަ ދައްކަވަމުން ޔާމީން ވަނީ ވަރަށް އަސަރާއިއެކު ރިޒާގެ ހަނދާންތައް ހިއްސާ ކުރައްވާފައެވެ. މަސައްކަތުގެ ދާއިރާއިންނާއި، އަދި ގާތް ރައްޓިސެއްގެ ގޮތުގައިވެސް ރިޒާގެ ފަރާތުން ލިބިގެންދިޔަ އެއްބާރުލުން ޔާމީން ވަނީ ހިއްސާ ކުރައްވާފައެވެ.
ވާހަކަ ދައްކަން ފެށީއްސުރެ ނިމެންދެންވެސް ރޮމުން އަސަރާއިއެކު ވާހަކަ ދެއްކި ޔާމީން ވިދާޅުވީ ރިޒާ އަވަހާރަ ވުމުގެ ކުރިންވެސް ދެތިން ފަހަރު ވާހަކަ ދެކެވެނު ކަމަށެވެ. އެންމެ ފަހުން ގުޅިފަހަރު އެދުނީ ޤުރުއާން މުބާރާތެއް ބޭއްވުމަށް ކަމަށެވެ. އަދި ހާލު ރަނގަޅު ވަމުން އަންނަ ކަމަށާއި، ވަރަށް އަވަހަށް ބައްދަލުވާނެ ކަމަށްވެސް ވިދާޅުވި ކަމަށެވެ. ނަމަވެސް ކަން ދިމާވީ ވަރަށްވެސް ހިތްދަތިކޮށް ކަމަށާއި، އޭގެ މަދު ދުވަސްތަކެއްގައި ލިބުނު ހަބަރާއިއެކު މުޅި ދާއިރާ ވަނީ ހިތްދަތިކަމާއި ކުރިމަތި ވެފައިކަމަށް ޔާމީން ވިދާޅުވިއެވެ.
އޭނާ ވިދާޅުވީ ރިޒާ އެދިވަޑައިގެންނެވި ގޮތަށް ޤުރުއާން މުބާރާތެއް ބޭއްވުމަށް ނިންމާފައިވާކަމަށެވެ. މަސައްކަތުގެ ދާއިރާއިން ރިޒާގެ ފަރާތުން ލިބިގެންދިޔަ އެހީތެރިކަން ހިއްސާ ކުރައްވަމުން ޔާމީން ވިދާޅުވީ މީގެ 10 އަހަރު ކުރިން އެދައިރާގައި އަސާސީ އެތައްކަމެއް ނުވެ އޮތްކަމަށެވެ. ނަމަވެސް މިއަދު ދާއިރާގެ ހާލަތު ބަދަލުކޮށްދެއްވީ މަރުހޫމް ރިޒާގެ މަސައްކަތުން ކަމަށެވެ. ފާއިތުވެދިޔަ 13 ވަރަކަށް އަހަރު ރިޒާގެ ފަރާތުން ފެނުނު ބައެއް ކަންކަން ހިއްސާ ކުރައްވަމުން ޔާމީން ވިދާޅުވީ ކައުންސިލް ކަމެއްގައިވެސް އެނޫން ކަމެއްގައިވެސް ގުޅައިލާ ކޮންމެ ފަހަރަކު ފޯނަށް ޖަވާބު ދެއްވާ ކަމަށެވެ.
އަލްއުސްތާޛު އަލްމަރްޙޫމް އިބްރާހީމް ރިޟާގެ ތަޢުބީންގެ ޖަލްސާ pic.twitter.com/xJlRg7Vyvi
— Progressive Party of Maldives (@ProgressPartyMV) March 10, 2023
ދުވަހަކުވެސް ރިޒާ ކައުންސިލުން ވަކި ކަމެއް ވަކި ގޮތަކަށް ނިންމަން ނުބުނާނެކަމަށް ޔާމީން ވިދާޅުވިއެވެ. ރަށުގައި މީހަކު ނިޔާވެގެން އުޅުނަސް، ނުވަތަ ގުދުރަތީ ހާދިސާއެއް ދިމާވިޔަސް ވަގުތުން ގުޅައި އެކަމެއް އޮޅުން ފިލުވައި ދަތިވާކަމެއް އޮތްނަމަ އެކަމެއް ވަގުތުން ވަގުތަށް ހައްލު ކޮށްދެއްވަން އެދޭކަމަށެވެ.
ދުވަހަކުވެސް ފޯނަށް ގުޅައިގެން ދިމާ ނުވާ ވަގިތެއް ނުދޭ. އެއީ އަޅުގަނޑު ބައްޕައެއްފަދަ ލޯބިވާ މީހެއް. ރަށުގައި މީހަކު ނިޔާވިޔަސް، ހާދިސާއެއް ދިމާވިޔަސް، އެންމެ ފުރަތަމަ ގުޅާނީ ރިޒާ.
– ޔާމީން ވިދާޅުވިއެވެ.
ޔާމީން ވިދާޅުވީ ރިޒާގެ އެންމެ ޚާއްސަ ސިފައަކީ ދުވަހަކުވެސް އެއްވެސް މީހަކައި ހިތްބުރަ ކަމެއް ނުބޭއްވުން ކަމަށެވެ. ދާއިރާގެ އިތުރުން ސިޔާސީ ގޮތުންވެސް ރިޒާއާއި ޚިޔާލު ތަފާތުވެގެން ކޮންމެ އެއްޗެއް ކީ ކަމުގައިވީނަމަވެސް އެކަމަށް ރައްދުދީ އަދި އެހެން ބަޔަކު ރައްދުދިން ކަން އެގުނު ނަމަވެސް އެކަމެއް ވަގުތު ހުއްޓާލަން އެދޭކަމަށެވެ. ރިޒާގެ ފަރާތުން ފެނިގެންދިޔަ އެތައް ރީތި ސިފައެއް އަސަރާއިއެކު ޔާމީން ވަނީ މިޖަލްސާގައި ހިއްސާ ކުރައްވާފައެވެ.
