ޝައުބާން މަސް އަޅުކަމުގައި ހޭދަކުރަން މިއަދުގެ ހުތުބާގައި ގޮވާލައިފިއެވެ.
މިއަދުގެ ހުތުބާ ގައި މައިގަނޑު ގޮތެއްގައި އަލި އަޅުވާލައިފައި ވަނީ ޝައުބާން މަހުގައި ހެޔޮ އަމަލު ކުރުމުގެ މައްޗަށެވެ. ހުތުބާގައި ބުނެފައިވަނީ ޝައުބާން މަހަކީ އެތައް ގޮތަކުން ހާއްސަ މަހެއް ކަމަށެވެ. އެއީ ރަމަޟާން މަހަށް މަރުހަބާ ކިއުމަށް ތައްޔާރުވަމުން އަންނަ މަހަކަށް ވާތީ ކަމަށް ހުތުބާގައި ބުނެފައި ވެއެވެ.
އެގޮތުން ޝައުބާން މަހުގެ ހަނދު ފެނުމާއިއެކު، ރޯދައިގެ މާތްކަމާއި، ރޭ އަޅުކަމާއި، ހެޔޮ އަމަލުތަކުގެ ހިޔާލުތައް ކޮންމެ މުސްލިމެއްގެ ހިތަށް ވަންނަމުންދާ ކަމަށް ވެސް ބުނެފައި ވެއެވެ. އަދި ޝައުބާން މަހު އަޅުކަމުގައި ހީވާގި ވުމަކީ ރަމަޟާން މަހު އަޅުކަމުގައި މަސްއޫލުވުމަށް ލިބޭ ތަމްރީނަކަށް ވާ ކަމަށްވެސް ހުތުބާގައި ބުނެފައި ވެއެވެ.
އެއްވެސް މީހަކަށް އެމީހެއްގެ އަޖަލު ހަމަވާނެ އިރެއް ނޭނގޭނެކަން ފާހަގަކޮށް ޚުތުބާގައި ވަނީ "ވެހޭތާ ފެންނަގާށޭ" ބުނާފަދައިން ފުރުސަތުގެ ބޭނުން ހެޔޮގޮތުގައި ހިފުމަށް ނަސޭހަތްތެރިވެފައެވެ. ގިނަގިނައިން ހެޔޮ އަމަލުކުރުމަކީ ގަސްދަކާނުލައި ކުރެވޭ ފާފަތަކުން މާތް ރަސްކަލާންގެ މީސްތަކުން ސަލާމަތްކުރައްވާނެ ކަމެއް ކަމަށާއި، މިފަދަ ބަރަކާތްތެރި މައްސަރެއްގައި މާތް ނަބިއްޔާ އުންމަތަށް ނަމޫނާ ދައްކަވާފައިވާގޮތަށް ހެޔޮ އަމަލުކުރުންމަތީ ދެމިތިބުން މުހިންމުކަމަށް ޚުތުބާގައި ވަނީ ބުނެފައެވެ.
މީގެ އިތުރުން ރޯދަމަހަށް ތައްޔާރުވަމުންދާއިރު ވޭތުވެދިޔަ އަހަރުގެ ފަރުޟު ރޯދައެއް ގަޟާކުރަން ޖެހިފައިވާނަމަ އެ ރޯދައެއް އަވަހަށް ގަޟާކުރުމަށް ޚުތުބާގައި ވަނީ ނަސޭހަތްތެރިވެފައެވެ. އަދި ރަމަޟާންމަހުގެ އަޅުކަމަށް ވަގުތު ދެވޭގޮތަށް ވަގުތުތައް ރާވާލުމަށް ނަސޭހަތްތެރިވެފައިވެއެވެ.
އޭގެ އިތުރުން ރަސޫލާގެ ހަދީސަކާއި ހަވާލާދީ، އެކަލޭގެފާނު ޝައުބާން މަހު އަޅުކަމުގައި ވަރަށް ބޮޑަށް މަސްއޫލުވެ ވަޑައިގެންނެވި ކަމަށް ވެސް ހުތުބާގައި ބުނެފައި ވެއެވެ.
