ޖާރމަނީގައި މިހާރު ކުރިޔަށްދާ އައިޓީބީ ބާލިން 2023 ޓްރޭޑް ޝޯވއަށް ރައީސް ސާލިހުގެ ދެކަނބަލުން ޒިޔާރަތް ކުރައްވަައިފިއެވެ.
މި މަހުގެ ހަތަކުން ނުވައަކަށް ޖަރުމަނުގެ ވެރިރަށުގައި އޮންނަ ދުނިޔޭގެ އެންމެ ބޮޑު މި ފެއަރއަށް ރައީސް ސާލިހު ޒިޔާރަތް ކުރެއްވީ ތިން ޤައުމަކަށް ކުރައްވަމުން ގެންދަވާ ރަސްމީ ދަތުރުފުޅެއްގައި ޖަރުމަނު ވިލާތަށް ވަޑައިގެންނެވެ.
މި ފެއާގައި ހުންނަ ރާއްޖޭގެ ސޮޓޯލްގައި ސަގާފީ ގްރޫޕުގެ ނެށުންތެރިން އެކި ދިވެހި ލަވަތަކައް ތަމްސީލު ކުރުމަށް ވަނީ ހަމަޖެހިފައިއެވެ. އަދި އޭގެ އިތުރުން މި ފެއަރގައި، ދިވެހި ޝެފުންގެ ޓީމަކުން ވަނީ ފެއަރއަށް ޒިޔާރަތްކުރާ އެކި ފަރާތްތަކަށް ދިވެހި ކާބޯތަކެތި ތައްޔާރު ކުރާ ގޮތް ލައިވް ސްޓޭޝަންގައި ދައްކާލުމަށް ހަމަޖެހިފައިއެވެ.
މި ފެއާގައި ތަމްސީލުކުރާ ކުންފުނިތަކުގެ ތެރޭގައި ދުނިޔޭގެ އެކިކަންކޮޅުތަކުގެ ހޮޓާތަކާއި، ޓޫރިސްޓް ބޯޑުތަކާއި އަދި ޓުއާ އޮޕަރޭޓަރުން ހިމެނެއެވެ.
މި އަހަރު އައިޓީބީ ބާލިން 2023ގަައި އެމްއެމްޕީއާރްސީގެ ވިޒިޓް މޯލްޑިވްސްގެ ސްޓޯލްގައި ފަތުރުވެރިކަމާއި ބެހޭ 82 ކުންފުންޏަކުން 200 އަށް ވުރެ ގިނަ މީހުން ބައިވެރިވެއެވެ.
ރައީސުލްޖުމްހޫރިއްޔާ މިހާރު ކުރައްވަމުން ގެންދަވާ ރަސްމީ ދަތުރުފުޅުގައި އެންމެ ފުރަތަމަ މަންޒިލެއްގެ ގޮތުން ވަޑައިގަތީ ޤަޠަރަށެވެ. ޤަތަރަށް ވަޑައިގެން އެގައުމުގައި އޮތް، އެންމެ ކުޑަކޮށް ތަރައްޤީވެފައިވާ ޤައުމުތަކުގެ އދ.ގެ ފަސްވަނަ ކޮންފަރެންސްގައި ރައީސް ސާލިހުވަނީ ބައިވެރިވެ ވަޑައިގެންފައެވެ.
ޤަތަރަށްފަހު ދެން ރައީސް ސާލިހު ވަޑައިގަތުމަށް ހަމަޖެހިފައިވަނީ ސާރބިއާއަށާއި ޖަރުމަނަށެވެ. ރައީސުލްޖުމްހޫރިއްޔާގެ މި ދަތުރުފުޅުގެ އެންމެ ފަހު މަންޒިލެއްގެ ގޮތުން ޖަރުމަނު ވިލާތަށް ވަޑައިގެން އެ ޤައުމުގެ ރައީސް ފްރޭންކް ވޯލްޓަރ ސްޓައިންމަޔަރއާ ބައްދަލުކުރައްވައި ދެ ޤައުމުގެ ދެމެދު ރަސްމީ މަޝްވަރާތައް ބޭއްވެވުމަށް ވަނީ ހަމަޖެހިފައެވެ.
ކޮމެންޓު ފޮނުވާ