ރައްޔިތުންގެ މަޖިލީހުގައި އަންހެނުންގެ ދައުރު މިހާރަށްވުރެ އިތުރުކުރުމަށް ޤާނޫނަށް އިޞްލާޙު ގެނައުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ލަފާދެއްވައިފިއެވެ.
މިއަދަކީ ބައިނަލްއަޤްވާމީގޮތުން ފާހަގަކުރާ އަންހެނުންގެ ދުވަހެވެ. މިއަދުގެ މުނާސަބަތުގައި ރައްޔިތުންގެ މަޖިލީހުގެ މިއަދުގެ ޖަލްސާ ގައި މަޖިލީހުގެ ރައީސް ނަޝީދު ވިދާޅުވީ، ރައްޔިތުންގެ މަޖިލީހުގައި އަންހެނުންގެ ދައުރު މިހާރަށްވުރެ ފުޅާވުމަކީ މުހިންމުކަމެއްކަމަށެވެ. އަދި މިކަމާމެދު ޢާންމު ރައްޔިތުންވެސް ވިސްނާނެކަމަށް އެމަނިކުފާނު ޤަބޫލުފުޅުކުރައްވާކަމަށް ވިދާޅުވިއެވެ.
މިޙާލަތު ބަދަލުކުރުމަށްޓަކައި މަޖިލިސް މިހާރު އެކުލެވިގެންވާ ގޮތް ބަދަލުކުރަންޖެހޭކަން ފާހަގަކުރައްވައި ނަޝީދު ވިދާޅުވީ ގާނޫނު އަސާސީއަށް އިސްލާހު ގެނައުމަކީ މިކަމަށްޓަކައި ސިޔާސީ ޕާޓީތަކުގެ ޒިންމާއަކަށް ވާން ޖެހޭނެކަމަށެވެ.
ރައްޔިތުންގެ މަޖިލީހުގައި މިހާރު ތިއްބަވަނީ 87 މެންބަރުންނެވެ. އޭގެތެރެއިން މިހާރުގެ މަޖިލީހުގައި އަންހެނުންގެ ޢަދަދަކީ 4 އެވެ. އެހެންނަމަވެސް 87 ދާއިރާއަށް ވާދަކުރުމުގެ ފުރުސަތުވެސް އަންހެނުންނަށް އޮވެއެވެ. މަޖިލީހަށް ވާދަކުރައްވާ އަންހެންބޭފުޅުންވެސް ވަރަށް މަދެވެ. އަދި ވާދަކުރައްވާ މަދު ބޭފުޅުންގެތެރެއިން ހޮވެނީ އަދި މާމަދު އަދަދެކެވެ.
ކޮމެންޓު ފޮނުވާ