ބޮލީވުޑް އާއި ހޮލީވުޑްގައި ވެސް މަޝްހޫރު ބަތަލާ ޕްރިޔަންކާ ޗޯޕްޅާގެ ވެބް ސީރީޒް "ސިޓަޑެލް" ގެ އޮފިޝަލް ޓްރެއިލާ ދައްކާލައިފި އެވެ.
ޕްރިޔަންކާ ވަނީ އޭނާގެ އިންސްޓަގްރާމުގައި މި ޓްރެއިލާ ހިއްސާ ކޮށްފައިއެވެ. މީގެ ކުރިން އޭނާ ވަނީ ފިލްމްގެ ބައެއް މަންޒަރުތަށް ފެންނަ ފޮޓޯތަކެއްވެސް އޭނާގެ ސޯޝަލް މީޑީއާގައި ހިއްސާ ކޮށްފައިއެވެ. އަދިޝެއާކުރި އެ ސީރީޒްގެ ފޮޓޯތަކުގައި އޭނާގެ ގިނަ އެކްޝަން ސީންތަކެއް ހިމަނާފައިއެވެ.
މި ސީރީޒަކީ "އެވެންޖާސް: އެންޑްގޭމް" ފަދަ ފިލްމުތައް ގެނެސްދިން ކުޅަދާނަ ޑައިރެކްޓަރުން ކަމަށްވާ އެންތަނީ އާއި ޖޯ ރުސޯ ގެނެސްދޭ އެއްޗެކެވެ.
View this post on Instagram
ޕްރިޔަންކާ އާއި އެކުގައި މީގެ ލީޑުން ދެން ފެންނަނީ މަޝްހޫރު ސްކޮޓިޝް އެކްޓަރު ރިޗާޑް މޭޑަން އެވެ. "ޕްރައިމް ވީޑިއޯ" އާ ގުޅިގެން ރޫސޯ ބްރަދާސް އުފައްދާ އެ ތްރިލާގައި ޕްރިޔަންކާ ކުޅޭނީ ނާޑިއާ ސިންހް ކިޔާ ސްޕައި އޭޖެންޓެއްގެ ރޯލެވެ.
ސައިންސް ފިކްޝަން/ސްޕައި ޖޯންރާގެ "ސިޓަޑެލް" ގެ އިތުރު ކާސްޓުންގެ ތެރޭގައި ސްޓޭންލީ ޓަކީ، ލެސްކީ މެންވިލް، އޭޝްލީ ކަމިންސް، ރޯލަންޑް މޮލާ އަދި އޮޒީ އިކައިލް ހިމެނެ އެވެ. "ސިޓަޑެލް" ޕްރީމިއާކުރާނީ އަންނަ އެޕްރީލް މަހުގެ 28 ގަ އެވެ.
