ބަންގްލަދޭޝްގެ ރައްޔިތެއްކަމުގައިވާ، އެމްޑީ އަލަމްގިރިއާއެކީ އެއްޖިންސުން ގުޅުން ހިންގުމުގެ ކުށުގައި ހިމެނޭ ފުލުސް މީހާގެ މައްޗަށް ކުރިމިނަލް ކޯޓުން ކުރި ހުކުމަށް ތާއީދުކޮށް، އެހެންނަމަވެސް ހުކުމުގެ އަދަބުގެ މިންވަރު މަތިކުރި ގޮތް ގޯސް ކަމަށް ހައިކޯޓުން ނިންމައިފިއެވެ.
ބަންގަލްދޭޝްގެ އަލަމްގިރިއާ އެކު އެއްޖިންސުން ގުޅުން ހިންގި މައްސަލާގައި ކުރީގެ ފުލުހެއް ކަމަށްވާ އަބްދުއްރަހްމާން ރަފީއުގެ މައްޗަށް ކުރިމިނަލް ކޯޓުން ހުުކުމް ކޮށްފައިވަނީ، އެއް އަހަރާއި އެއް މަހާއި 28 ދުވަހަށް އޭނާ ޖަލަށް ލުމަށެވެ.
އެހެންނަމަވެސް އޭނާގެ ފަރާތުން މައްސަލަ ހައި ކޯޓުގައި އިސްތިއުނާފް ކޮށްފައިވަނީ، އޭނާގެ މައްޗަށް އަދަބުގެ މިންވަރު ކަނޑައެޅިގޮތާމެދު ހިންގަމަ ނުޖެހިގެންނެވެ. މިމައްސަލާގައި ހައިކޯޓުން ހުކުމް ކޮށްފައިވަނީ، އޭނާގެ އަދަބުގެ މިންވަރު މަތިކުރުމަށް ދަށު ކޯޓުން ނިންމު ނިންމުމަކީ ރަގަޅު ނިންމުމެއް ކަމުގައެވެ. އެހެންނަމަވެސް އަދަބުގެ މިންވަރު މަތިކުރި ގޮތް ގޯސްކަމަށް ހުކުމުގައި ބުނެފައި ވެއެވެ.
ހައި ކޯޓުގެ ހުކުމުގައިވާ ގޮތުން، އަސާސީ މިންގަޑުން، އޭނާ ކުރި ކުށުގެ އަދަބަކީ ނުވަ މަހާއި 18 ދުވަހަށް ޖަލަށްލުން ކަމަށް ވިޔަސް، އޭނާ ކުށަށް އެއްބަސްވުމުން ހަތް މަހާއި ހަ ދުވަހުގެ ޖަލު އަދަބުގެ މިންވަރު ދަށް ވާނެ ކަމުގައެވެ. އަސާސީ މިންގަޑުން އަދަބު ބޮޑުކުރިއިރު، ދަށު ކޯޓުން އޭނާ އަދަބު ބޮޑުކުރީ އަދަބުގެ ދެ ދަރަޖައިގެ ބަދަލުގައި އަދަބު ދެ ގުނަކޮށްގެން ކަމަށް ހުކުމުގައިވެ އެވެ.
ހައި ކޯޓުގެ ހުކުމުގައި ބުނެފައިވަނީ، ގާނޫނުލް އުގޫބާތުގައި ވާގޮޮތުން މަތިކުރެވޭނީ އަދަބުގެ ދެދަރަޖަ ކަމުގައެވެ. މިގޮތުން ދެދަރަޖަ މަތިކުރުމުން، އޭނާ ޖަލަށް ލެވޭނީ އެއް އަހަރަށްކަމުގައިވެސް ހުކުމްގައި ބަޔާން ކޮށްފައި ވެއެވެ. އަދި މި އިސްލާހާއެކު، މި އަދަބުގައި އޭނާ މިހާތަނަށް ތަންފީޒު ކޮށްފައިވާ މުއްދަތު އުނިކުރަންޖެހޭނެ ކަމަށްވެސް ހައިކޯޓުގެ ހުކުމުގައި ބުނެފައިވެއެވެ.
ދަށު ކޯޓުން، މި މައްސަލާގައި އަދަބު ކަނޑައެޅިގޮތް ރަގަޅު ނޫންކަމަށް ޕީޖީންވެސް ބުނެފައި ވެއެވެ.
ގިނަބަޔަކާއެކު އެއްޖިންސުން ގުޅުން ހިންގާ، އަދި މަންޒަރުތައް ރެކޯޑު ކުރި މައްސަލާގައި އަލަމްގިރި މިހާރު ދަނީ 3 އަހަރުގެ ޖަލު ހުކުމެއް ތަންފީޒު ކުރަމުންނެވެ. އޭނާގެ މައްޗަށް ހުކުމް ކޮށްފައިވަނީ، އެއް ޖިންސުން ގުޅުން ހިންގުމުގެ ކުށުގައި ހަތް މަހަށް އަދި އޮރިޔާން ކާޑު އުފެއްދުމުގެ ކުށުގައި ދެ އަހަރާއި ނުވަ މަހަށް ޖަލަށް ލުމަށެވެ.
