މި ވަގުތަކީ ރައްޔިތުންގެ ކުރިމަތީގައި ސިޔާސީ ލީޑަރުންނާއި ސިޔާސީ ޕާޓީތަކުގެ އިތުރުބާރު ވަރަށް ބޮޑަށް ގެއްލިފައިވާ ދަނޑިވަޅެއްކަމަށް ފާރިސް މައުމޫން ވިދާޅުވެއްޖެ.

ސޯޝަލް މޯރއަށް ދެއްވި އިންޓަވިއުއެއްގައި ފާރިސް ވިދާޅުވީ، މިވަގުތަކީ ރައްޔިތުންގެ ކުރިމަތީގައި ސިޔާސީ ލީޑަރުންނާއި ސިޔާސީ ޕާޓީތަކުގެ އިތުރުބާރު ވަރަށް ބޮޑަށް ގެއްލިފައިވާ ދަނޑިވަޅެއްކަމަށެވެ. އަދި މި އިތުބާރު ހޯދުމަށް ވަރަށް ބޮޑަަށް މަސައްކަތަކެއް ކުރަން ޖެހިފައިވާކަން ފާހަގަކުރައްވާ ފާރިސް ވިދާޅުވީ މީގެ ތެރޭގައި އެމްއާރްއެމްވެސް ހިމެނޭކަަމަށާއި. އެ ޕާޓީއިންވެސް މަސައްކަތް ކުރަނީ ރައްޔިތުންގެ އިތުބާރު ހޯދުމަށްކަމަށެވެ. އަދި އެޕާޓީގެ އެތެރޭގެ ކަންކަން އިސްލާހުކުރުމަށް މަޝްވަރާތައް ކުރަމުން އަންނަކަމަށް ވިދާޅުވިއެވެ.

ރައްޔިތުންގެ އިތުބާރު އަލުން ހޯދުމަށް ކުރަންޖެހޭ އެންމެ މުޙިއްމުކަމަކީ ޕާޓީގެ އެތެރޭގެ ކަންކަން އިސްލާހުކޮށް ހަރުދަނާކުރުންކަން ފާރިސްގެ ވާހަކައިގައި ފާހަގަކުރައްވާފައިވެއެވެ. އެހެންކަމުން އެޕާޓީއިން މަޝްވަރާކުރަމުން އަންނަ ކަންކަމުގެ ތެރޭގައި ޕާޓީއިން އަޅާ ފިޔަވަޅުތައް ދެފުށް ފެންނަ ގޮތަކަށް ބައްޓަންކުރުމަށްވެސް މަޝްވަރާކުރެވެމުން އަންނަކަން ފާހަގަކުރެއްވިއެވެ.

ސިޔާސީ މީހުންނާއި މެދު ރައްޔިތުންގެ މެދުގައި އެންމެ ބޮޑަށް އިތުބާރު ގެއްލިފައި އޮތް ކަމަކީ މާލީ އަދި ފައިސާގެ ކަންކަމުގައި ކަމަށް ފާރިސް ވިދާޅުވިއެވެ.

"ރައްޔިތުން ޤަބޫލްކުރާ ގޮތުގައި ސިޔާސީ މަޤާމަކަށް އަންނަ ބޭފުޅަކު މުއްސަނދި މަހުޖަނަކަށް ބަދަލުވެގެން އަންނަތަން ފެންނަމުންދޭ. މިކަމަކީ ރައްޔިތުން ބަލައި ގަންނަ ކަންކަމެއް ނޫން. މިކަން އިސްލާހުކުރުމަށް އެމްއާރްއެމްގެ ލީޑަޝިޕްގައި ސަރުކާރުގެ މަޤާމްތަކުގައި ތިއްބަވާ ބޭފުޅުން އެސެޓް ޑިކްލެރޭޝަން ހައްދަވާފައި ތިއްބެވި ބޭފުޅުންނަށް ވާންޖެހޭ. ރައްޔިތުންނަށް އިނގެންޖެހޭ ރައްޔިތުންގެ ހައްގުގައި މަސައްކަތްކުރާ ފަރާތްތަކަކީ ނުވަތަ ރައްޔިތުންގެ ފައިސާއިން މުސާރަ ންނަގަވައިގެން ހުންނަވާ ބޭފުޅުންގެ ޒިންމާ ވަރަށް ބޮޑުކަން. އެހެންކަމުން އޭނަ ދައްކަން ޖެހޭ އޭނާ މަސައްކަތް ކުރަނީ ރަނގަޅަށްކަން. އަދި އެސެޓް ޑިކްލެރޭޝަން ރަނގަޅަށް ހުށަނޭޅުމަކީ ޖިނާއީ ކުށަކަށްވެސް ވާ ހާލުގައި އެކަންވެސް އެގޮތަށް ވާނެކަން ދެނެތިބެ އެޕާޓީގެ ބޭފުޅުން އެގޮތަށް އެކަން ކުރައްވާނެ. ފާރިސް ވިދާޅުވިއެވެ.

އެމްއާރްއެމްއަށް ވަންނަ ފައިސާއާއި ބޭނުންކުރާ ފައިސާގެ މުއާމަލާތްތައްވެސް ހަމަ އެ އުސޫލުން ބަލަހައްޓަމުން އަންނަކަމަށް އޭނާ ވިދާޅުވިއެވެ.

ޕާޓީތަކަށް ލިބޭ ފައިސާވެސް ގިނަ ޕާޓީތަކުން ނަހަމަ ގޮތުގައި ބޭނުން ކުރައްވަމުން ގެންދަވާކަން ފާރިސް ފާހަގަކުރެއްވިއެވެ.

ނަމަވެސް އެމްއާރްއެމްގެ އެތެރޭގެ މާލީ ހާލަތު ރަނގަޅުކޮށްފައިވާނެކަމަށާއި، ޕާޓީއަށް ވަންނަ ފައިސާއާއި ބެހޭ ހުރިހާ ތަފްސީލްތަކެއް ހުންނާނެކަމަށް ވިދާޅުވިއެވެ.

މީގެ އިތުރުން ފާރިސް ވިދާޅުވީ، ރާއްޖޭގެ ތާރީޚަށް ބަލާއިރު، މިދުވަސްވަރު ރާއްޖޭގެ ސިޔާސީ މަޝްރަހު ހަލަބޮލި ނޫންކަމަށާއި، މިއަށްވުރެ މާ ހަލަބޮލި ދުވަސްތައް ރާއްޖޭގެ ސިޔާސީ ހަޔާތުގައި ދެކިފައިވާކަމަށް ވިދާޅުވިއެވެ. މިދުވަސްވަރު ސިޔާސީ މަޝްރަހުގައި އޭނާ ހަރަކާތްތެރި ނުވި ނަމަވެސް، އެމްއާރްއެމްއިން މިހާރު ކުރަމުން އަންނަނީ ޕާޓީ ތެރޭގެ ކަންކަން އިސްލާހު ކުރުމުގެ މަސައްކަތްތައްކަމަށާއި، ދެފުށް ފެންނަ ސިޔާސަތުތަކެއް ދެމެހެއްޓުމަށް ޕާޓީގެ ތެރޭގެ ކަންކަން ކުރަމުން އަންނަކަމަށް ވިދާޅުވިއެވެ.