ގދ. ތިނަދޫގައި އެޅުމަށް ހަމަޖެހިފައިވާ ޓާޝަރީ ހޮސްޕިޓަލުގެ އަމަލީ މަސައްކަތް، މިހާރު ކުރަމުންދާ އެ ހޮސްޕިޓަލްގެ ޑިޒައިން މަސައްކަތްތައް ނިމުމުން ފެށޭނެ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
ތިނަދޫ އުތުރު ދާއިރާގެ މެންބަރު ޢަބްދުލްމުޣުނީ، ލިޔުމުން ޖަވާބު ހޯއްދެވުމަށް ކުރެއްވި ސުވާލުގެ ޖަވާބުގައި މިނިސްޓަރ ނަސީމް ވިދާޅުވީ ތިނަދޫގައި އަލަށް އިމާރާތްކުރަން ހަމަޖެހިފައިވާ ޓާޝަރީ ހޮސްޕިޓަލް އިމާރާތް ކުރެއްވުމަށްޓަކައި ކުރަންޖެހޭ މަސައްކަތްތަކުގެ ތެރެއިން މިހާރު ކުރެވެމުންދަނީ ހޮސްޕިޓަލް ޑިޒައިން ކުރުމުގެ މަސައްކަތް ކަމުގައެވެ. އަދި ޑިޒައިންގ މަސައްކަތް ނިމުނުހާ އަވަހަށް އިމާރާތްކުރުމުގެ އަމަލީ މަސައްކަތް ފެށިގެންދާނެ ކަމަށް މިނިސްޓަރ ވިދާޅުވިއެވެ.
ހެލްތް މިނިސްޓްރީން ނިންމާފައިވަނީ ތިނަދޫގައި މިހާރު ހުރި ޑރ. އަބުދުއް ސަމަދު މެމޯރިއަލް ހޮސްޕިޓަލް ޓާޝަރީ ހޮސްޕިޓަލަކަށް ބަދަލު ކުރުމަށެވެ.
ހެލްތް މިނިސްޓްރީން މީގެ ކުރިން ބުނެފައިވާ ގޮތުން އެ ހޮސްޕިޓަލަކީ މުޅިން އާ ކޮންސެޕްޓަކަށް ވަކި ބިމެއްގައި ހަދާ އިމާރާތެކެވެ. އަދި އެ ހޮސްޕިޓަލް އަޅާނީ އިންޓަނޭޝަނަލް ފެންވަރުގައި ތިމާވެއްޓާ ވެސް ރައްޓެހި ގޮތަކަށް ކަމަށްވެސް ބުނެފައިވެއެވެ.
ތިނަދޫގައި އަޅަން ނިންމާފައި ވަނީ 100 އެނދުގެ ޓާޝިއަރީ ހޮސްޕިޓަލެކެވެ. އެ ރަށުގައި މިހާރުވެސް 50 އެނދުގެ ހޮސްޕިޓަލެއް ހުންނައިރު އެ ހޮސްޕިޓަލުން މިހާރުވެސް ސްޕެޝަލިސްޓުންގެ ހިދުމަތްތަކާއެކު ސިއްހީ ގިނަ ހިދުމަތްތަކެއް ލިބެއެެވެ.
ކޮމެންޓު ފޮނުވާ