އެމްޑީޕީގެ ރައީސް އެމްޑީޕީއާއި މަޝްވަރާ ނުކުރާނެކަމަށް ބުނުމަކީ ކޮންކަހަލަ ޑިމޮކްރަސީއެއްތޯ މެމްބަރު ސަނީފް އެމްޑީޕީގެ ރައީސް މުހައްމަދު ނަޝީދާއިި ސުވާލު ކުރައްވައިފިއެވެ.
އެމްޑީޕީގެ ރިޔާސީ ޕްރައިމަރީގައި ރައީސް ޞާލިހާއި ވާދަކޮށް، އެމްޑީޕީގެ ރައީސް މުހައްމަދު ނަޝީދު ބޮޑު ތަފާތަކުން ބަލިވިފަހުން ގެންދަވަނީ ރައީސް ޞާލިހާއި ދެކޮޅަށް ވަރަށް ބޮޑަށް މަސައްކަތް ކުރައްވަމުންނެވެ. ޕްރައިމަރީއަށްފަހު ނަޝީދާއި ވާހަކަދައްކައިގެން މައްސަލަ ހައްލު ކުރުމަށް މަސައްކަތް ކުރަމުންދާކަމަށް ތަކުރާރުކޮށް އެމްޑީޕީގެ ޗެއާޕާސަން ފައްޔާޒު އިސްލާއިލް ވަނީ ވިދާޅުވެފައެވެ.
ނަމަވެސް އިއްޔެ ރައީސް ނަޝީދު ވިދާޅުވެފައިވަނީ އިންތިހާބާ ގުޅޭގޮތުން ރައީސް އަދި އެމްޑީޕީގެ ރިޔާސީ ކެންޑިޑޭޓު އިބްރާހިމް މުހައްމަދު ސޯލިހާއެކު އިތުރަށް ކުރާނެ މަޝްވަރާއެއް ނެތް ކަމަށެވެ. ނަޝީދުގެ ޓުވީޓުގައި އެމްޑީޕީއައި ކުރާނެ މަޝްވަރާއެއް ނެތްކަމަށް ވިދާޅުވެވުނީ ގޯހުންކަމަށް ވިދާޅުވި ފަހުން އެކަން ރަނގަޅުވެސް ކުރެއްވިއެވެ. ފަހުން ނަޝީދު ވިދާޅުވީ ރާއްޖެއަށް އަދި އެމްޑީޕީއަށް އެންމެ ހެޔޮ ގޮތް ހޯދުމަށް މަސައްކަތް ކުރަންޖެހޭ ކަމަށެވެ. އެހެން ނަމަވެސް އެއީ ރައީސާއެކު ހުރެގެން ވާން އޮތް ކަމެއްގެ ގޮތުގައި ނުފެންނަ ކަމަށް ވިދާޅުވިއެވެ.
ނަޝީދުގެ ވާހަތަކަށް ރައްދު ދެއްވައި ސަނީފް ވިދާޅުވަނީ އެމްޑީޕީގެ ރައީސް ކަމުގައި ހުންނަވައިގެން އެމްޑީޕީއާއި މަޝްވަރާ ނުކުރައްވާނެކަމަށް ބުނުމަކީ ކޮންކަހަލަ ޑިމޮކްރަސީއެއްތޯ ސުވާލު ކުރައްވާފައެވެ. ސަނީފް ވިދާޅުވީ ޑިމޮކްރަސީއަށް އެންމެބޮޑަށް ވަކާލާތު ކުރެއްިވިކަމަށް ބުނާ ބޭފުޅުން އިންތިޚާބަކުން ބަލިވުމުން އެކަން ގަބޫލު ނުކުރެވުމަކީ ދެރަ ކަމެއްކަމަށެވެ.
ޑިމޮކްރައީ ހިފައިގެން ދުވި މީހުންގެ ކިބާގައިި ބަލި ގަބޫލު ކުރުމުގެ ހިތްވަރު ނެތި، މުޅި ޕާޓީ ފުޑާލަން ގަސްތުކޮށް ޚުދުމުހުތާރުވެ، އެމްޑިޕީގެ ރައީސްކަމުގެ މަޤާމުގައި ހުރެ އެމްޑީޕީއާއި ކުރާނެ މަޝްވަރާއެއް ނެތޭ ބުނީމާ، އަހާލަން ބޭނުމީ ތީ ކޮންކަހަލަ ޑިމޮކްރަސީއެއްތޯ ތިގެންގުޅެނީ؟
– މެމްބަރު ސަނީފް ވިދާޅުވިއެވެ.
ރައީސާއި ނަޝީދު އެއް ގަލަކަށް އެރުވުމުގެ މަސައްކަތް އެމްޑީޕީން ކުރަމުން އަންނައިރު، ނަޝީދު ގެންދަވަނީ "ފިކުރެއްގެ ދިރުން" ގެ ނަމުގައި ޕާޓީގެ ތެރޭގައި ވަކި ގޮތްޕެއް އުފެއްދުމުގެ މަސައްކަތް ކުރައްވަމުންނެވެ. އެއީ ރިޔާސީ ޕްރައިމަރީގެ ކެމްޕެއިންގައި ނަޝީދު ގެންގުޅުއްވި ސްލޯގަންއެވެ. އެ ގޮތްޕަށް 50،000 މެމްބަރުން ހަމަކުރުމަށްފަހު ރިޔާސީ އިންތިހާބު ކުރިއަށްގެންދާނެ ގޮތެއް ނިންމާނެ ކަމަށް އެ މަނިކުފާނު ވަނީ ވިދާޅުވެފައެވެ.
އަދިި އެމްޑީޕީގެ ރިޔާސީ ޕްރައިމަރީ ޞައްޙަ ނޫންކަމަށް ކަނޑައަޅައިދިނުމަށް އެދި ސިވިލް ކޯޓަށް ހުށައެޅި މައްސަލަ ބަލައިގަނެ، އަންނަ އަންގާރަ ދުވަހު ފުރަތަމަ އަޑުއެހުން ބާއްވަން ވަނީ ތާވަލް ކޮށްފައެވެ. އެމްޑީޕީގެ ރިޔާސީ ކެނޑިޑޭޓް ކަނޑައެޅުމަށް މިދިޔަ މަހުގެ 28ގައި ބޭއްވި ޕްރައިމަރީގައި ރައީސް ނަޝީދުގެ މައްޗަށް ރައީސް ޞާލިހު ކާމިޔާބު ހޯއްދެވީ ބޮޑު ތަފާތަކުންނެވެ. ޕްރައިމަރީގައި ރައީސް ޞާލިޙަށް %61 ލިބިވަޑައިގެންފައިވާއިރު، އެއީ 24572 ވޯޓެވެ. ރައީސް ނަޝީދަށް ލިބިވަޑައިގަތީ 15631 ވޯޓާއެކު %39އެވެ.
