އެހެން ބަޔަކާއި ކޯލިޝަން ހަދާ ވާހަކަ ދައްކަން ވާނީ އަމިއްލަ ޕާޓީގެ އެތެރެ އެއްބައި ކުރުމުގެ އުރައްޕެއް ހުރެގެން ކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.
އޭނާ މިހެން ވިދާޅުވީ އެމްޑީޕީގެ ރިޔާސީ ޕްރައިމަރީއަށްފަހު ބައިބައިވެފައިވާ ޕާޓީ އެއްބައިވަންތަ ކުރުމަށް އެއްވެސް މަސައްކަތެއް ނުކޮށް އެހެން ޕާޓީތަކާއި ކޯލިޝަން ހެދުމަށް އެމްޑީޕީން ކުރަމުންދާ މަސައްކަތަށް ފާޑު ވިދާޅުވެ ކުރެއްވި ޓުވީޓެއްގައެވެ.
އެމްޑީޕީގެ ރިޔާސީ ޓިކެޓާއި ހަވާލުވުމަށްފަހު ރައީސް ޞާލިހު ވަނީ ވެރިކަން ކުރާ ކޯލިޝަންގައި ހިމެނޭ ޖުމްހޫރީ ޕާޓީ އާއި އަދާލަތު ޕާޓީގެ އިތުރުން ކުރީގެ ރައީސް މައުމޫން އަބްދުލްގައްޔޫމް އުފެއްދެވި އެމްއާރުއެމްއަށް ކޯލިޝަން ހެދުމަށް ދައުވަތު ދެއްވާފައެވެ. ރައީސް ދެއްވި ދައުވަތު މިހާތަނަށް އެއްވެސް ޕާޓީއަކުން ބަލައިގަނެ، ކޯލިޝަން ހެދުމަށް ނިންމާފައި ނުވެއެވެ. ނަމަވެސް އަދާލަތުން ވަނީ އެމްޑީޕީއާއިއެކު މަޝްވަރާ ކުރުމަށް ނިންމާފައެވެ.
މެމްބަރު ވައްޑެ ވިދާޅުވީ ފެނިގެން ދަނީ އެމްޑީޕީ ތެރޭގައި ބޮޑެތި ބައިބައި ވުންތަކެއް އޮތް އިރުވެސް ޕާޓީ އެއްބައިވަންތަ ކުރުމަށް ރައީސް ޞާލިހުގެ ފަރާތްޕުޅުން އެއްވެސް މަސައްކަތެއް ނުކުރައްވާތަން ކަމަށެވެ. މިހާލަތުގައި އަމިއްލަ ޕާޓީގެ ތެރެ އެއްބައި ވަންތަ ކުރުވަން މަސައްކަތް ނުކުރެވުނު މީހަކަށް ހެދޭނެ އިތުރު ކޯލިޝަނެއް ނެތްކަމަށް ވައްޑެ ވިދާޅުވިއެވެ. އޭނާ ވިދާޅުވީ ރައީސްގެ ދައުވަތާއިއެކު ލަސްވެގެންދާ ކޮންމެ ދުވަހަކީ ރައީސާއި އެމްޑީޕީއާއި ފެޔަށް އެހެން ޕާޓީތަކުން ޖެހޭކަމުގެ ނިޝާނެއްކަމަށެވެ.
ކޯލިޝަނެއް އުފައްދަން އެހެންބަޔަކު އެއްބަސްކުރުވޭނީ، ފުރަތަމަ އަމިއްލަ ޕާޓީގެ އެތެރެ އެއްބައި ކުރުމުގެ އުރައްޕެއް ހުރެގެން. މިހާރު ރައީސް ސޯލިހު ފަހަތަށް ނޭރި ބަޔަކު، އިތުރު ދުވަސް ވާވަރަކަށް ޖެހޭނީ އިތުރަށް ފެޔަށް.
– ވައްޑެ ވިދާޅުވިއެވެ.
އެމްޑީޕީ އިސްވެ އިއްތިހާދުވާން މަސައްކަތްކުރަމުން އަންނަ އިރު، އެ ޕާޓީގެ ރައީސް މުހައްމަދު ނަޝީދު އަބަދުވެސް ގެންދަވަނީ އިއްތިހާދުގެ ވެރިކަމާ ދެކޮޅަށް ވާހަކަ ދައްކަވަމުންނެވެ. އިއްތިހާދު ހަދައިގެން އެމްޑީޕީ ބާކީވެ އެހެން ސިޔާސީ ޕާޓީތަކަށް ވެރިކަމުން ފުރުސަތު ބޮޑުވާ ކަމުގެ ހިތްހަމަނުޖެހުން އެމަނިކުފާނު ފާޅުކުރައްވައެވެ. ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސޯލިހާ ވާދަކުރައްވައި ނާކާމިޔާބުވުމުން، އެ މަނިކުފާނު ވަނީ "ފިކުރެއްގެ ދިރުން" ނަމުގައި ސިޔާސީ ހަރަކާތެއް ފައްޓަަވައިފަ އެވެ. ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއީދު ނުކުރައްވާނެ ކަމަށާއި މި އިންތިހާބަކީ ގާސިމަށް "ރަނުގެ ފުރުސަތެއް" ކަމަށް ނަޝީދު ވިދާޅުވެފައިވެއެވެ.
ނަޝީދު ގެންގުޅުއްވާ ވިސްނުން ދޫކޮށްލައްވައި ޕާޓީއަށް އެންމެ ފައިދާ ހުރި ގޮތަކީ ރިޔާސީ އިންތިހާބުގައި އެމަނިކުފާނު ވެސް ޕާޓީއާ އެކު ކުރިއަށް ވަޑައިގަތުން ކަމަށާއި މިހާރު ނިންމަވައިގެން ހުންނެވި ގޮތް ބަދަލުކުރައްވަން ޕާޓީގެ ޗެއާޕާސަން ފައްޔާޒް އިސްމާއިލް ވަނީ އެދިވަޑައިގެންފައެވެ.
ކޯލިޝަން ހަދަން އެމްޑީޕީގެ ގަރާރު ފާސްކޮށްފައި އޮތީ، "ސިޔާސީ ހަރަކާތެއްގެ ލީޑަރަކާ އިއްތިހާދުވާން" ފެނިއްޖެ ނަމަ އެކަން ވެސް ކުރިއަށް ގެންދާ ގޮތަށެވެ.
