ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދުގެ މައްޗަށް ދައުލަތުން އުފުލި އެއްޖިންސުން ޖިންސީ ގުޅުން ހިންގުމުގެ ކުށުގެ ދައުވާ އަށް އެނާ އިންކާރުކޮށްފިއެވެ.
ކުރީގެ މެމްބަރު އަދި ޑީއާރްޕީގެ ކުރީގެ ލީޑަރު ނަޝީދަކީ ބަންގްލަދޭޝްގެ އަލަމްގިރިއާ އެކު ގުޅުން ހިންގި މީހުންގެ ތެރޭގައި ހިމެނޭ އެކަކެވެ. އަލަމްގިރިއާއެކު ގުޅުން ހިންގި މަންޒަރު އާންމުވި ވީޑިއޯތަކުގެ ތެރޭގައި ނަޝީދުގެ ވީޑިއޯއެއް ހިމެނެއެވެ.
މިއަދުގެ އަޑުއެހުމުގައި ކާނަލް ނަޝީދުގެ ފަރާތުން ވަނީ އޭނާ އެއްޖިންސުން އަލަމްގީރާއެކު ގުޅުން ނުހިންގާކަން ސާބިތުކޮށްދިނުމަށް ހެކި ހުށަހަޅާފައެވެ. ނަމަވެސް ސިއްރުކޮށްގެން ބޭއްވި އަޑުއެހުމުގައި ނަޝީދުގެ ފަރާތުން ހުށަހެޅީ ކޮން ހެކިތަކެއް ކަމެއް އެނގިފައެއް ނުވެއެވެ. ކާނަލް ނަޝީދު ވަނީ އޭނާގެ މައްޗަށް އުފުލާފައިވާ ދައުވާއަށް އިންކާރު ކޮށްފައެވެ.
ކާނަލް ނަޝީދުގެ މައްޗަށްކުރާ ދައުވާގެ އަޑުއެހުން ކްރިމިނަލް ކޯޓުގައި ކުރިއަށް ގެންގޮސްފައިވަނީ ސިއްރުކޮށްގެނެވެ.
އަލަމްގީރުގެ މައްޗަށް އުފުލި ދައުވާތައް އޭނާގެ މައްޗަށް ސާބިތުވެ ދަނީ ޖަލު ހުކުމް ތަންފީޒު ކުރަމުންނެވެ. އެއްޖިންސުން ގުޅުން ހިންގާ ވީޑިއޯތަކެއް އާންމުވި މައްސަލައިގައި ކާނަލް ނަޝީދު ހިމެނޭހެން ޖުމްލަ 18 މީހެއްގެ ޕާސްޕޯޓު އޭރު ހިފަހެއްޓިއެވެ. އެހެން ނަމަވެސް،، އެކަށީގެންވާ މިންވަރަށް ހެކި ނެތުމުގެ ސަބަބުން ހަތަރު މީހުންގެ މައްޗަށް އެކަނި ދައުވާ އުފުލަން ނިންމީއެވެ.
އެ މައްސަލައިގައި ޕީޖީއިން ދެން ދައުވާ އުފުލި އަނެއް ތިން މީހުންގެ ތެރެއިން ގާނޫނީ ވަކީލު، ނާޒިމް ސައްތާރު ވަނީ ޝަރީއަތުން ކުރި ހުކުމް ތަންފީޒުކޮށް ނިމުމުން މިނިވަން ވެފައެވެ.
