ރޭ ބޭއްވުނު އެމްޑީޕީގެ ގައުމީ މަޖިލިސް ޖަލްސާ އެޕާޓީގެ ނަޝީދު ފެކްޝަނުން ބޮއިކޮޓް ކޮށްފިއެވެ.
ރޭ އެމްޑީޕީން އެޕާޓީގެ ގައުމީ މަޖިލިހުގެ ޖަލްސާއެއް ބައްވާފައިވަނީ ކުރިޔަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބު ކޮށްދިނުމަށްޓަކާ، ސިޔާސީ ލީޑަރުންނާއި އަދި ސިޔާސީ ޕާޓީތަކާއެކު ކުރާންޖެހޭ މަޝްވަރާތަކެއް ކުރިޔަށް ގެންދިއުމުގެ ހުރިހާ ބާރެއް، އެމްޑީޕީގެ އެންމެ އިސް ލީޑަރު، ރައީސް އިބުރާހިމް މުހައްމަދު ސާލިހަށް ދިނުމަށެވެ.
މިގޮތުން އެމްޑީޕީގެ ގައުމީ މަޖިލީހުގައި 140 އަށް ވުރެ ގިނަ މެމްބަރުން ތިއްބަވާއިރު، ރޭގެ ބައްދަލުވުމަށް ހާޒިރުވެފައިވަނީ 85 މެމްބަރުންނެވެ.
ކޯލިޝަން ހެދުމަށް ކުރާންޖެހޭ އެންމެހާ މަސައްކަތްތަކެއް ކުރުމުގެ ހުރިހާ ބާރެއް ރައީސް ސާލިހަށް ދިނުމަށް، ރޭގެ ގައުމީ މަޖިލިސް ޖަލްސާއިން ފާސްކޮށްފައިވަނީ ހުށެހެޅުނު ގަރާރަށް، ގައުމީ މަޖިލީހަށް ހާޒިރުވި 85 މެމްބަރުންގެ ތެރެއިން 81 މެމްބަރުންގެ ވޯޓު ދީގެންނެވެ.
ރޭއް ބޭއްވުނު ގައުމީ މަޖިލިސް ޖަލްސާގައި، ކޯލިޝަން ހެދުމުގެ ބާރު ރައީސަށް ދިނުމަށް ހުށަހެޅުއްވީ ކިނބިދޫ ދާއިރާގެ މެމްބަރު މުހައްމަދު ނާޝިޒްއެވެ.
އޭނާގެ ގަރާރުގައި ބުނެފައިވަނީ އެމްޑީޕީގެ ރިޔާސީ ޓިކެޓް ރައީސް ސާލިހާއި ހަވާލުކުރަން އެޕާޓީގެ ޕްރައިމަރީން މެމްބަރުން ނިންމާފައި ވާކަމަށާއި، އެހެންކަމުން ރިޔާސީ އިންތިހާބު ނިމުމާ ހަމައަށް އެ ޕާޓީގެ އެންމެ އިސް ފަރާތަކަށް ވާނީ ރިޔާސީ ކެންޑިޑޭޓު ކަމަށް އަސާސީ ގަވައިދުގެ 59 ވަނަ މާއްދާގެ (ނ) ގައި ކަނޑައަޅާފައިވާ ކަމަށެވެ.
އެހެންކަމުން، ޕާޓީގެ ގައުމީ މަޖިލީހާއި، ގައުމީ ހިންގާ ކޮމިޓީއާއި އަދި ޕާލަމެންޓްރީ ގުރޫޕުގެ ލަފާގެމަތިން، ޕާޓީގެ ސިޔާސަތުތައް ތަންފީޒު ކުރަމުން ދިއުމަކީ ޕާޓީގެ އެންމެ އިސްފަރާތުގެ މަސްއޫލިއްޔަތެއް ކަމުގައިވެސް ނާޝިޒު ހުށަހެޅުއްވި ގަރާރުގައި ބުނެފައި ވެއެވެ.
މިގޮތުން ފާއިތުވެދިޔަ އިންތިޚާބުތަކުގައިވެސް އިއްތިހާދު ނުވެ އެމްީޕީއަށް އެކަށީގެންވާ ނަތީޖާއެއް ނެރެވިފައި ނުވާކަމަށް ބުނެ، ފާސްކުރި ގަރާރުގައި ވަނީ ރިޔާސީ އިންތިޚާބަށް އިއްތިހާދުވުމުގެ ހުރިހާ މަޝްވަރާއެއް ކުރިއަށް ގެންދިއުމުގެ ބާރު ރައީސަށް ދިނުމަށް ނިންމާފައެވެ.
ރިޔާސީ އިންތިޚާބަށް ކޯލިޝަން ހެދުމުގެ ބާރު ރައީސަށް ދީފައިވާއިރު، އަދި މިހަފްތާގެ ހުކުރު ދުވަހުގެ ރޭ، އެމްޑީޕީގެ ރިޔާސީ ޓިކެޓް ހަވާލު ކުރުމަށް އެޕާޓީން ހަމަޖައްސާފައި ވަނިކޮށް، ރިޔާސީ ޓިކެޓް ހަވާލުކުރުން ހުޓުވާ ދިނުމަށާއި، އަދި އެޕާޓީގެ ރިޔާސީ ޕްރައިމަރީ އަލުން ބާއްވާ ދިނުމުގެ ވަގުތީ އަމުރެއް ހޯދުމަށް، ޕޮލިސް ބޯޑުގައި ހިމެނިވަޑައިގަންނަވާ، އަދި އެމްޑީޕީގެ ކުރީގެ އިންޓަރނޭޝަނަލް ސްޕޯލްސްޕާރސަން ހާމިދު އަބުދުލް އަފޫލު ވަނީ ސިވިލް ކޯޓަށް މައްސަލަ ހުށަހަޅުއްވާފައެވެ.
