ސަރުކާރު ހިއްސާވާ ކުންފުނިތައް އުފެއްދުމާއި އުވާލުން އަދި ރެގިއުލޭޓްކޮށް މޮނިޓާކުރެވޭނެ ގާނޫނެއް އެކުލަވާލުމަށް ގޮވާލާ ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
މި ގަރާރު ހުށަހަޅުއްވާފައިވަނީ ސަރުކާރު ހިއްސާވާ ކުންފުނިތަކުގެ ކަންކަން ބެލުމަށް މަޖިލީހުގައި އުފައްދާފައިވާ އެސްއޯއީ ކޮމިޓީގެ މުގައްރިރު، ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އެ ގަރާރުގައި ބުނެފައި ވަނީ ދައުލަތުގެ ވިޔަފާރި ތަންތަން ޕްރަވަޓައިޒްކުރުމާއި ކޯޕަރަޓައިޒްކުރުމާއި މޮނީޓާކޮށް އިވެލުއޭޓް ކުރުމުގެ ގާނޫނުގައި ބަޔާންކޮށްފައިވާ ގޮތުން، "ސަރުކާރުގެ ވިޔަފާރި ތަންތަން" ސަރުކާރުގެ ކުންފުނިތަކުގެ ތެރޭގައި ސަރުކާރުގެ ކުންފުނިތަކުގެ ސަބްސިޑިއަރީ ކުންފުނިތައް ވެސް ހިމެނޭ ހިނދު، އެފަދަ ކުންފުނިތައް އުފައްދާނެ، އުވާލާނެ، ރެގިއުލޭޓްކޮށް މޮނީޓާ ކުރެވޭނެ ގާނޫނެއް އޮތުމަކީ މުހިންމުކަމެއް ކަމަށް ދެކޭ ކަމަށެވެ.
ސަރުކާރުގެ ކުންފުނިތަކުން ދައުލަތަށް ހޯދައިދޭ ފިސްކަލް ރެވެނިއު ދައްވަމުން އަންނަ ކަމަށާއި ކުންފުނީގެ މާލީ ގާބިލުކަމަށް ނުބަލާ އެކި ޕްރޮޖެކްޓްތައް ހިންގުމާއި އެނޫންވެސް ގޮތްގޮތުން ހަރަދުކުރުމުގެ ސަބަބުން ކުންފުނިތަކަށް އެކަށީގެންވާ ފައިދާއެއް ނުލިބޭ ކަމަށް މި ގަރާރުގައި ބުނެފައިވެއެވެ.
ސަރުކާރު ހިއްސާވާ ބައެއް ކުންފުނިތަކުގައި ވިޔަފާރި ފުޅާކޮށް ކުރިއަރުވާނެ ގޮތުގެ ބިޒްނަސް ޑިވެލޮޕްމަންޓް ޕްލޭނެއް ނެތްކަމާއި، ކުންފުނީގެ މަގުސަދުތައް ހާސިލުކުރުމުގައި ވަކި މިސްރާބެއް ނެތުމުން ކުންފުނިތަކަށް ސަރުކާރުން ދޫކުރާ ކެޕިޓަލް އެންމެ އެދެވޭ ގޮތެއްގައި ބޭނުން ނުކުރެވޭކަން.
– ގަރާރުގައި ފާހަގަކޮށްފައިވެއެވެ.
ގަރާރުގައި ބުނެފައިވަނީ ބައެއް ކުންފުނިތަކުގެ އަސާސީ ގަވާއިދުގައި ކަނޑައަޅާފައިވާ ކުންފުނީގެ މަގުސަދުތަކުގެ ތެރޭގައި ނުހިމެނޭ މަސައްކަތްތައް ސަރުކާރުން އެ ކުންފުނިތަކާ ހަވާލުކުރާ ކަމަށެވެ. އަދި ކުންފުނީގެ ޑިރެކްޓަރުންގެ ބޯޑުން ކުންފުނީގެ މަގުސަދުތަކުގެ ތެރޭގައި ނުހިމެނޭ މަސައްކަތްތައް ކުރިއަށް ގެންދިއުމަށް ނިންމާފައި ހުންނަކަން ފާހަގަކުރެވިފައިވާ ކަމަށްވެސް ގަރާރުގައިވެއެވެ.
