މުޒާހަރާ ކަވަރުކުރި ނޫސްވެރިންނަށް އަނިޔާވި މައްސަލާގައި މޯލްޑިވްސް ބްރޯޑްކާސްޓިން ކޮމިޝަނުން ފުލުހުންނާ މަޝްވަރާކޮށްފިއެވެ.
އެކޮމިޝަނުން ވިދާޅުވީ ވޭތުވެދިޔަ ހަފްތާގައި ބޭއްވި އެއްވުމެއް ފުލުހުން ރޫޅާލުމުގެ ތެރޭގައި ބައެއް ނޫސްވެރިންނަށް އަނިޔާވެފައިވާތީ، އެކަން ހިނގައި ދިޔަ ގޮތް ބަލައި، މިފަދަ ހާލަތްތަކުގައި ގުޅުންހުރި ފަރާތްތަކުން ޢަމަލުކުރަންޖެހޭ ގޮތް ދެނެގަތުމާ ބެހޭގޮތުން ފުލުހުންގެ އިދާރާއާ ކޮމިޝަނުން މަޝްވަރާކޮށްފަައިވާކަމަށެވެ.
އަދި އެއްވުންތަކާއި މުޒަހަރާތައް ކަވަރުކުރާ ނޫސްވެރިންނަށް އަމާޒުކޮށް ދެއިދާރާ ގުޅިގެން ވަރަށް ޚާއްސަ ތަމްރީން ޕްރޮގްރާމެއް ހިންގުމާ ގުޅޭގޮތުންވެސް މަޝްވަރާކޮށްފައިވާކަމަށް ބްރޯޑްކޮމްއިން ވިދާޅުވެއެވެ.
މިއަހަރަށް ރައްޔިތުންގެ މަޖިލިސް ހުޅުވި ޖަލްސާގައި ރައީސް ޞާލިޙް ރިޔާސީ ބަޔާން އިއްވެވުމާ ދެކޮޅަށް އިދިކޮޅު ފަރާތްތަކުން ކުރި މުޒާހަރާ ކަވަރުކުރަން ދިޔަ ޗެނަލް13ގެ ނޫސްވެރިޔަކަށް އަނިޔާވެ އައިސީޔޫގައި ފަރުވާދީފައިވެއެވެ. އަދި އޭނާއަށް އިތުރު ފަރުވާ ދިނުމަށް ވަނީ ސްރީލަންކާއަށް ފޮނުވާލާފައެވެ.
މިމުޒާހަރާއަށް ހުރަސްއަޅައި ބާރުގެ ބޭނުންކޮށްގެން ފުލުހުންވަނީ މުޒާހަރާ ރޫޅާލާފައެވެ. މުޒާހަރާ ރޫޅާލުމުގެ ތެރޭގައި ބައެއް މީހުންނަށް އެކިވަރުގެ ހާނީއްކަވެފައިވެއެވެ. އިދިކޮޅު ޕީޕީއެމްއިންވަނީ މި މުޒާހަރާގައި ބައެއް މީހުންނަށް ބޮޑެތި އަނިޔާތައް ވެފައިވާކަމަށް ބުނެފައެވެ. މީގެ ފަހުން ބޭއްވި ބައެއް މުޒާހަރާތަކުގައިވެސް ނޫސްވެރިން އެކިވަރުގެ އަނިޔާތައްވެފައިވެއެވެ. މިކަމާގުޅިގެން މޯލްޑިވްސް މީޑިއާ ކައުންސިލުންވެސް ވަނީ ކަންބޮޑުވުން ފާޅުކޮށްފައެވެ.
