ޔޫކުރެއިންގެ ރައީސް ވޮލޮޑޮމިރު ޒެލެންސްކީ އިނގިރޭސިވިލާތަށް ވަޑައިގެންފިއެވެ. ޒެލެންސްކީ އިނގިރޭސިވިލާތަށް މި ކުރެއްވި ދަތުރުފުޅަކީ، ފާއިތުވި އަހަރުގެ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން އޭނާ އިނގިރޭސިވިލާތައް ކުރައްވާ ފުރަތަމަ ދަތުރުފުޅެވެ. އަދި މިއީ މިހަނގުރާމަ ފެށުނުފަހުން ޒެލެންސްކީ ގައުމުން ބޭރަށް ކުރައްވާ ދެވަނަ ދަތުރުފުޅުވެސްމެއެވެ.
މީގެ ކުރިން ޒެލެންސްކީވަނި އެމެރިކާއަށް ވަޑައިގެން އެގައުމުގެ ގާނޫނުހަދާ މަޖިލިހުގައި ތަގުރީރު ކުރައްވާފައެވެ.
ޒެލެންސްކީގެ މިދަތުރު ފުޅުގައި އޭނާއަށް މަރުހަބާ ވިދާޅުވެފައިވަނީ އިނގިރޭސި ބޮޑުވަޒީރު ރިޝީ ސުނަކްއެވެ. އަދި މިދަތުރުފުޅުގައި އިނގިރޭސި ގާނޫނުހަދާ މަޖިލިހުގައި ތަގުރީރު ކުރައްވަމުން ޒެލެންސްކީ ވިދާޅުވެފައިވަނީ، އޭނާގެ ގައުމުން، މިހާރު ކުރެވެމުންދާ ހަނގުރާމާގައި ރަޝިއާ ބަލި ކުރާނެ ކަމުގައެވެ.
އަދި އޭނާވަނީ، ހުޅަނގުގެ ގައުމުތަކުން ޔޫކުރެއިންއަށް ފައިޓަރޖެޓްތައް ފޯރުކޮށްދިނުމަށް ގޮވާލައްވާފައެވެ. އެހެންނަމަވެސް އިނގިރޭސި ބޮޑުވަޒީރުގެ ތަރުޖަމާން ވިދާޅުވެފައިވަނީ، ޔޫކުރެއިންއަށް ފައިޓަރ ޖެޓްތައް ފޯރުކޮށް ދިނުމާއި ގުޅޭގޮތުން އެގައުމުން އަދި ވަކި ގޮތެއް ނުނިންމާކަމުގައެވެ.
އެހެންނަމަވެސް، އިނގިރޭސިވިލާތުން ޔޫކުރެއިންގެ ޕައިލެޓުން ތަމްރީން ކޮށްދިނުމަށް ވީހާވެސް އަވަހަކަށް ފެށުމަށް ހަމަޖެހިފައިވާ ކަމުގައި ބޮޑުވަޒީރު ސުނަކްގެ ތަރުޖަމާން ވިދާޅުވެފައި ވެއެވެ.
"ބޮޑުވަޒީރު ވަނީ، ޔޫކުރެއިންއަށް ފޯރުކޮށް ދެވިދާނެ ފައިޓަރޖެތައް ބެލުމުގެ ޒިންމާ ޑިފެންސް ސެކެޓްރީއާއި ހަވާލު ކުރައްވާފަ. އެހެންނަމަވެސް ހަގީގަތުގައި ދަންނަވާނަމަ، މިއީ ވަރަށް ދިގު މުއްދަތުގެ ހައްލެއް. ކުރު މުއްދަތުގައި ހޯދާންޖެހޭ އެއްވުރެ މުހިންމު ހައްލުތައް އެބަހުރި،" ތަރުޖަމާން ވިދާޅުވެފައި ވެއެވެ.
ރަޝިއާއިން ޔޫކުރެއިންގައި ކުރަމުންދާ ހަނގުރާމައަށް އަހަރެއް ފާއިތުވެގެން ދާއިރު، ޔޫކުރެއިން ދަނީ، ރަޝިއާއާއި ކުރިމަތި ލުމަށް، ހަނގުރާމަމަތީ ވައިގެ އުޅަނދުފަހަރު އެގައުމަށް ފޯރުކޮށް ދިނުމަށް ހުޅަނގުގެ ގައުމުތަކުން އެދެމުންނެވެ.
މިހާރު އިނގިރޭސިވިލާތައް ކުރައްވާ ދަތުރުފުޅަށްފަހު ދެން ޒެލެންސްކީ ވަޑައިގަތުމަށް ހަމަޖެހިފައިވަނީ ފްރާންސްގެ ޕެރިހަށެވެ. ޕެރިހުގައި ޒެލެންސްކީ ފްރާންސްގެ ރައީސް އެމަނޫލް މެކްރޮންއާއި ބައްދަލު ކުރެއްވުމަށް ހަމަޖެހިފައިވާއިރު، މި ބައްދަލު ކުރެއްވުމުގައި ބައިވެރިވެ ވަޑައިގަތުމަށް ޖާމަނީގެ ޗާންސެލަ ޝޯލްޒްވެސް ޕެރިހަށް ވަޑައިގަތުމަށް ވަނީ ހަމަޖެހިފައެވެ.
