އެމްޑީޕީގެ ރިޔާސީ ޕްރައިމަރީގައި ރައީސް މުހައްމަދު ނަޝީދަށް ތާއިދު ކުރައްވަމުން ގެންދެވި ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު ފަޅި ބަދަލުކުރައްވައި ރައީސް އިބްރާހިމް މުހައްމަދު ސޯލިހުގެ ކެމްޕާ ގުޅިވަޑައިގެންފިއެވެ.
މުއިއްޒު ރޭ ކުރެއްވި ޓުވީޓެއްގައި ވިދާޅުވީ އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވި ރައީސް އިބްރާހިމް މުހައްމަދު ސޯލިހާއެކު އެ ޕާޓީ އަށް ރިޔާސީ އިންތިހާބު ކާމިޔާބު ކޮށްދިނުމަށް މަސައްކަތް ކުރަން ނިންމާފައިވާ ކަމަށެވެ. މުއިއްޒު ވެސް ރައީސް ފަޅީގައި މަސައްކަތް ކުރައްވަން ފެއްޓެވިއިރު، ނަޝީދާ އެކު ތިއްބެވި އެހެން ގިނަ މެމްބަރުންތަކެއް ވެސް ވަނީ ރައީސަށް ތާއީދުކުރައްވައި އެމަނިކުފާނާއެކު ރިޔާސީ ޕްރައިމަރީއަށް ކެމްޕޭން ކުރައްވައިފައެވެ.
އެމްޑީޕީ ރިޔާސީ ޕްރައިމަރީ ކާމިޔާބު ކުރެއްވެވި ރައީސް އިބްރާހިމް މުހައްމަދު ސޯލިހު އާއެކީ އެމްޑީޕީ އަށް ރިޔާސީ އިންތިހާބު ކާމިޔާބު ކޮށް ދިނުމަށް މަސައްކަތް ކުރުމަށް އަޅުގަނޑު ނިންމައިފިން.
– މުއިއްޒުގެ ޓްވީޓުގައި ވިދާޅުވިއެވެ.
އޭގެތެރޭގައި، ނަޝީދާ އަރިސް މެމްބަރުންގެ ގޮތުގައި ކުރިން ތިއްބެވި ތުޅާދޫ ދާއިރާގެ މެމްބަރު ހިސާން ހުސެއިން އާއި ފޮނަދޫ ދާއިރާގެ މެމްބަރު މޫސާ ސިރާޖް އާއި ގަލޮޅު ދެކުނު ދާއިރާގެ މެމްބަރު މީކާއީލް އަހްމަދު ނަސީމްގެ އިތުރުން އިނގުރައިދޫ ދާއިރާގެ މެމްބަރު ހަސަން އަހްމަދު ހިމެނިވަޑައިގަންނަވައެވެ.
މިއީ ނަޝީދުގެ ކޭމްޕް ދޫކުރައްވައި ރައީސްގެ ކޭމްޕާ މިފަހުން ގުޅިވަޑައިގެންނެވި ދެވަނަ މެމްބަރެވެ. ފޮނަދޫ ދާއިރާގެ މެމްބަރު މޫސާ ސިރާޖު ވެސް ވަނީ އެމްޑީޕީގެ ޕްރައިމަރީގައި ރައީސް ސޯލިހުގެ ފެކްޝަނާ ގުޅި އެމަނިކުފާނަށް އިންތިހާބު ކާމިޔާބު ކޮށްދިނުމަށް މަސައްކަތް ކޮށްދެއްވާފައެވެ.
މުއިއްޒު ނަޝީދުގެ ކޭމްޕް ދޫކޮށްލެއްވުމާ އެކު އެމަނިކުފާނުގެ ކޭމްޕުގައި ތިއްބެވީ މަޖިލިސްގެ މަދު މެމްބަރުންތަކެކެވެ. އަދި، ގައުމީ މަޖިލީހާއި ޕާޓީގެ ހުރިހާ ގުނަންތަކެއްގައި އޮތް ތާއީދު ވެސް އެމަނިކުފާނަށް މިހާރު ވަނީ ގެއްލިފައެވެ. ރިޔާސީ ޕްރައިމަރީ ވެސް ގެއްލި އެމްޑީޕީގެ ޓިކެޓުގައި އިންތިހާބުގައި ވާދަކުރުމުގެ ފުރުސަތު ނަޝީދަށް ނެތްއިރު އެމްޑީޕީގެ ރިޔާސީ ކެންޑިޑޭޓަށް އެމަނިކުފާނު ތާއިދު ކުރައްވާކަން ހާމަކުރައްވާފައި ނުވެއެވެ.
